Sunday, 18 August 2013

ഉപരോധ പോസ്റ്റ്‌മോര്‍ട്ടം


ചത്തകുഞ്ഞിന്റെ ജാതകം നോക്കേണ്ട എന്ന് പണ്ടേ പറയാറുണ്ട്. ശരിയാണ്. പക്ഷേ, ആ തിയറി പോസ്റ്റ്‌മോര്‍ട്ടത്തിന് ബാധകമല്ല. ചത്തത് കുഞ്ഞാകട്ടെ, പടുവൃദ്ധനാകട്ടെ മരണം അസ്വാഭാവികമാണെങ്കില്‍ പോസ്റ്റ്‌മോര്‍ട്ടം വേണം. ഇടതുമുന്നണി സെക്രട്ടേറിയറ്റിന് മുന്നില്‍ നടത്താന്‍ തുനിഞ്ഞത് അത്യസാധാരണ അതിസാഹസമാണ്.

മഹത്തായ സസ്‌പെന്‍സ് ത്രില്ലര്‍ രാഷ്ട്രീയനാടകത്തിന് ടിക്കറ്റെടുത്തു വന്നവരോട് ചെയ്തത് വന്‍ ചതിയായിപ്പോയി. ആദ്യരംഗത്തിലെ നാല് ഡയലോഗ് കഴിഞ്ഞപ്പോഴേക്കും ജനഗണമന പാടുകയാണ് ചെയ്തത്. ത്രില്ലുമില്ല, സ്റ്റണ്ടുമില്ല. അമ്പലപ്പറമ്പിലോ മറ്റോ ആയിരുന്നെങ്കില്‍ സ്റ്റേജ് കത്തിച്ചുകളയുമായിരുന്നു ജനം. ഇവിടെ ഉണ്ടായ ദി എന്‍ഡ് അത്ര ശുഭമല്ല. സംഗതി അസാധാരണവും അസ്വാഭാവികവുമാണ്. കേസെടുക്കണം, പോസ്റ്റ്‌മോര്‍ട്ടവും വേണം.

സമരങ്ങളുടെ സ്വാഭാവിക അന്ത്യം വ്യത്യസ്തമാണ്. ഡിമാന്‍ഡ് ഉന്നയിക്കുക, സമരം ചെയ്യുക, ചര്‍ച്ചനടത്തുക, പിന്നെയും ചര്‍ച്ചനടത്തുക... ക്രമേണ സമരം തളരും, വീറും വാശിയും കെട്ടടങ്ങും. ഇനി വയ്യ എന്ന ഘട്ടം എത്തുമ്പോള്‍ കിട്ടിയത് വാങ്ങി പിന്‍വാങ്ങും.  വിജയാഹ്ലാദപ്രകടനം നടത്തുന്നതില്‍ വിരോധമില്ല. ഇതാണ് സാധാരണ സമരങ്ങളുടെ സ്വാഭാവിക പരിണാമം. ചോദിച്ചത് മുഴുവന്‍ കിട്ടിയാലേ സമരം നിര്‍ത്തൂ എന്ന് വാശിപിടിച്ചാല്‍ തരാമെന്ന് സമ്മതിച്ചതുപോലും ഒടുവില്‍ കിട്ടാതാവുമെന്ന് അറിയാത്തവരില്ല. തൊഴില്‍ശാലയിലെ പണിമുടക്കുപോലല്ല, ഇവിടെ സമരം ചെയ്യുന്നവര്‍ക്കേ കാശുപോവൂ.

സോളാര്‍ സമരത്തില്‍ രണ്ട് ഡിമാന്‍ഡുകള്‍ ഉണ്ട്. മുഖ്യമന്ത്രി രാജിവെക്കണം, ജുഡീഷ്യല്‍ അന്വേഷണം നടത്തണം. രണ്ട് ഡിമാന്‍ഡിന്റെയും പ്രാധാന്യം തുല്യമാണോ? അല്ല. മുഖ്യമന്ത്രി രാജിവെക്കണം എന്നതാണ് മുഖ്യഡിമാന്‍ഡ്. അതിന് 75 മാര്‍ക്കെങ്കിലും കൊടുക്കണം. ജുഡീഷ്യല്‍ അന്വേഷണത്തിന് 25 മാര്‍ക്കിനേ സ്‌കോപ്പുള്ളൂ. അനിശ്ചിതകാല ഉപരോധം എന്ന അഗ്‌നിപരീക്ഷയില്‍ കിട്ടിയത് 25 മാര്‍ക്ക്. മുഖ്യമന്ത്രിയുടെ പങ്കുകൂടി ഉള്‍പ്പെടുത്തിയല്ല അന്വേഷണമെങ്കില്‍ മാര്‍ക്ക് പത്തായി ചുരുങ്ങും. ചുരുക്കിപ്പറഞ്ഞാല്‍ നൂറില്‍ പത്തുമാര്‍ക്ക് കിട്ടിയ കുട്ടികളാണ് പരീക്ഷ പാസായെന്നും പറഞ്ഞ് ചമ്മി ചമ്മി വീടുകളിലേക്ക് മടങ്ങിയത്. ചമ്മല്‍ ഉണ്ടായിക്കാണണം. സാരമില്ല, ഇത് ആദ്യമായല്ലല്ലോ...

മുഖ്യമന്ത്രിയുടെ രാജി ആവശ്യപ്പെട്ട് ജീവന്മരണസമരം നടത്തുക അത്ര സുഖമുള്ള ഏര്‍പ്പാടല്ല. പ്രതിപക്ഷത്തിന്റെ സമരം പേടിച്ച് ഏതെങ്കിലും മുഖ്യമന്ത്രി രാജിവെച്ച ചരിത്രമില്ല. അഴിമതി ആരോപിച്ചാണ് രാജിയാവശ്യമെങ്കില്‍ പറയാനുമില്ല: പഴയ ഉമ്മന്‍ചാണ്ടി ഭരണത്തില്‍ റെജീനക്കേസും പത്രക്കാര്‍ക്കെതിരെ അക്രമവും എല്ലാം ചേര്‍ന്ന് രംഗം വഷളായിട്ടും മന്ത്രിയുടെ രാജി ആവശ്യപ്പെട്ട് സെക്രട്ടേറിയറ്റ് ഉപരോധമല്ല, പഞ്ചായത്ത് ഓഫീസ് ഉപരോധംപോലും ഉണ്ടായില്ല. കാര്യമായ സമരമൊന്നും ഇല്ലാഞ്ഞതുകൊണ്ട് ഗുണമുണ്ടായി. മന്ത്രി രാജിവെച്ചു - രണ്ട് രണ്ടര മാസം കഴിഞ്ഞാണെങ്കിലും. സമരം നടത്തി മന്ത്രിയെ രാജിവെപ്പിക്കാനാവുമെന്ന് തോന്നുന്നില്ല. സമരങ്ങള്‍കൊണ്ട് നില്‍ക്കക്കള്ളി ഇല്ലാതാവുക ജനത്തിനാണ്. മന്ത്രിമാര്‍ക്ക് ഒരു രാത്രിയിലെ ഉറക്കംപോലും നഷ്ടപ്പെടില്ല.

ഒന്നരനാള്‍ സമരംകൊണ്ട് കെ.എസ്.ആര്‍.ടി.സി.ക്കും റെയില്‍വേക്കും മാത്രമേ നേട്ടമുണ്ടായുള്ളൂ എന്ന് ശത്രുക്കള്‍ പരിഹസിക്കുമായിരിക്കും. സത്യമല്ല. അമൂല്യമായ പാഠങ്ങളാണ് പാര്‍ട്ടി പഠിച്ചത്. പാര്‍ട്ടി ഗവേഷകര്‍ പ്രബന്ധം തയ്യാറാക്കുന്നുണ്ട്. വൈകാതെ ചോര്‍ത്തിക്കിട്ടും. ഒരു ജാഥപോയാല്‍ സ്തംഭിക്കുന്ന സെക്രട്ടേറിയറ്റ് പരിസരത്ത് ഒരു ലക്ഷം ആളുകള്‍ക്ക് വിപ്ലവഗാനം കൊണ്ടുമാത്രം അധികനാള്‍ കഴിച്ചുകൂട്ടാനാവില്ല എന്നതുതന്നെ വലിയ സമരപാഠം. ലക്ഷം പേര്‍ക്ക് തിന്നാനും കുടിക്കാനും കൊടുത്താല്‍ മതി എന്നേ സമരതന്ത്രവിദഗ്ധര്‍ കരുതിയുള്ളൂ. ഇതുരണ്ടും കിട്ടിയാല്‍ ശരീരത്തിന് അനിവാര്യമായ മൂന്നാമത്തെ പ്രക്രിയയ്ക്ക് സ്ഥലവും സൗകര്യവും കിട്ടണം. ഇല്ലെങ്കില്‍ സംഗതി അറുവഷളാകും. അതിനെ നേരിടാന്‍ വിപ്ലവഗാനം പോര. ഡല്‍ഹിയിലെ രാംലീല മൈതാനമല്ല സെക്രട്ടേറിയറ്റ് പരിസരം. നമുക്ക് അണ്ണ ഹസാരെയില്ല. കഷ്ടിച്ച് ഒപ്പിച്ചെടുത്തത് ഒരു ദേവഗൗഡയെ മാത്രം. അഴിമതിവിരുദ്ധ അപ്പോസ്തലനാണ്. രാംലീലയില്‍ പാട്ടും ഡാന്‍സുമായി തമ്പടിച്ച ആയിരങ്ങള്‍ക്ക് കക്കൂസ് പണിതുകൊടുത്തത് ഏതെല്ലാമോ വന്‍കിടക്കാരാണെന്ന് അന്ന് വാര്‍ത്തയുണ്ടായിരുന്നു. എന്തുചെയ്യാം, നമുക്കത് തലയില്‍പോയില്ല. ഇവന്റ് മാനേജ്‌മെന്റുകാരൊന്നും പറഞ്ഞുമില്ല. വെടിമരുന്ന് തീര്‍ന്നുപോയതുകൊണ്ടും മഞ്ഞുമഴ പെയ്തതുകൊണ്ടുമൊക്കെ യുദ്ധം തോറ്റ ചരിത്രമുണ്ട്. ലോകചരിത്രത്തില്‍ ആദ്യമായാവണം നടേ പറഞ്ഞ കാരണംകൊണ്ട് സമരം തോറ്റത് - സോറി, തോറ്റത് എന്ന് പറഞ്ഞുകൂടാ - ജയിച്ചത്.

സമരം പെട്ടെന്ന് തീര്‍ന്നതില്‍ മാധ്യമങ്ങള്‍ക്കേ അതൃപ്തികാണൂ എന്ന് പിണറായി വിജയന്‍ പറഞ്ഞതില്‍ കാര്യമില്ലാതില്ല. പക്ഷേ, മറ്റൊരു കൂട്ടര്‍ക്കും അതൃപ്തിയുണ്ട്. സമരം തീര്‍ന്നതിലല്ല, തീരുന്ന കാര്യത്തെപ്പറ്റി ഒരു സൂചനപോലും സഖാവ് തരാതിരുന്നതില്‍. ജുഡീഷ്യല്‍ അന്വേഷണം പ്രഖ്യാപിച്ചല്ലോ, ഉപരോധം നിര്‍ത്തുമോ എന്ന് ചോദിച്ച മാധ്യമപ്രവര്‍ത്തകരെ ചാടിക്കടിക്കുകയാണ് പാര്‍ട്ടിയിലെയും മുന്നണിയിലെയും കുറേ നേതാക്കള്‍ ചെയ്തത്. അരമണിക്കൂറിനകം സമരം നില്‍ക്കാന്‍പോകുന്ന കാര്യം അവരോട് ആരും പറഞ്ഞില്ല. മോശമായിപ്പോയി. അവര്‍ പിന്നെ 48 മണിക്കൂര്‍ മൗനവ്രതം അനുഷ്ഠിച്ചതായാണ് റിപ്പോര്‍ട്ട്.

 * * *

ജുഡീഷ്യല്‍ അന്വേഷണത്തില്‍ കുറ്റം കണ്ടെത്തിയിട്ട് ഒരാള്‍പോലും ശിക്ഷിക്കപ്പെട്ടിട്ടില്ല. കുറ്റാന്വേഷണമല്ല ജുഡീഷ്യല്‍ അന്വേഷണം. ശിക്ഷിക്കലല്ല കമ്മീഷന്റെ ചുമതല.
തത്കാലത്തെ ജനരോഷം തണുപ്പിക്കാനുള്ള ചെറിയൊരു വിദ്യയാണ് സര്‍ക്കാറുകള്‍ക്ക് ജുഡീഷ്യല്‍ അന്വേഷണം. കമ്മീഷന് ഇരിക്കാന്‍ കസേര കൊടുക്കാന്‍തന്നെ മാസങ്ങളെടുക്കാം. റിപ്പോര്‍ട്ടുണ്ടാകാന്‍ വര്‍ഷങ്ങളെടുക്കാം. സമര്‍പ്പിച്ച റിപ്പോര്‍ട്ട് വായിക്കാന്‍ മാസങ്ങളെടുക്കാം. വായിച്ചത് മാസങ്ങള്‍ ചര്‍ച്ചചെയ്യാം. റിപ്പോര്‍ട്ട് സ്വീകരിക്കണമോ വേണ്ടയോ എന്ന് തീരുമാനിക്കാനുമെടുക്കാം ഇഷ്ടംപോലെ സമയം. ഇതിനിടയില്‍ ഒരു മന്ത്രിസഭയുടെ കാലാവധി കഴിയുകയും അടുത്തത് വരികയും ചെയ്യും. അവര്‍ക്കും ധൃതികാണില്ല. സമര്‍പ്പിച്ച് ഒന്നരവര്‍ഷം കഴിഞ്ഞിട്ടും നിയമസഭയില്‍ വെച്ചിട്ടില്ലാത്ത റിപ്പോര്‍ട്ടുപോലുമുണ്ട്.

ഇങ്ങനെയെല്ലാമുള്ള കമ്മീഷന്റെ ടേംസ് ഓഫ് റഫറന്‍സിനെ ചൊല്ലിയാണിപ്പോള്‍ തര്‍ക്കം. കേട്ടാല്‍തോന്നുക ഇതൊരു തലതെറിക്കുന്ന പ്രശ്‌നമാണ് എന്നാണ്. ടേംസ് ഓഫ് റഫറന്‍സില്‍ ഒരു കാര്യം പെടുത്തിയില്ലെങ്കില്‍ കമ്മീഷന് അത് അന്വേഷിക്കാനേ പറ്റില്ല എന്നതബദ്ധം. മുഖ്യമന്ത്രിയുടെ ഓഫീസിനെ സംഭവവുമായി ബന്ധിപ്പിക്കുന്ന തെളിവ് കൊണ്ടുവന്നാല്‍ കമ്മീഷന്‍ അത് വലിച്ച് ദൂരെയെറിയില്ല. പിന്നെ എന്തിനാണാവോ തര്‍ക്കം.

ഇവിടെ ജസ്റ്റിസുമാര്‍ക്കൊക്കെ വേറെ പണിത്തിരക്കുണ്ട്.

'സൗകര്യമുള്ള' വേറെ ആരെയെങ്കിലും നിയമിച്ചാല്‍ മതി എന്ന് ഹൈക്കോടതി പറയും എന്ന ധൈര്യത്തിലാണ് സര്‍ക്കാര്‍. ഹൈക്കോടതി സിറ്റിങ് ജഡ്ജിമാരെ നിയോഗിക്കാന്‍ സമ്മതിച്ചാല്‍ സംഗതി പൊല്ലാപ്പാകും. ഹൈക്കോടതിക്ക് നല്ല ബുദ്ധിയുണ്ടാകാന്‍ പ്രാര്‍ഥിക്കാം.

 * * *

ഉപരോധത്തിനിടെ പാര്‍ട്ടി സെക്രട്ടറിയെ ആഭ്യന്തരമന്ത്രി വിളിച്ചതായി പാര്‍ട്ടി നേതാവ് എം.വി. ഗോവിന്ദന് ഒരു തെറ്റിധാരണയുണ്ടായി. ഒരിക്കലും ഉണ്ടാകാന്‍ പാടില്ലാത്ത ചിന്താക്കുറ്റംതന്നെ. ഉപരോധം ആര്‍ത്തിരമ്പിമുന്നേറുമ്പോള്‍ ആഭ്യന്തരമന്ത്രിയോട് സംസാരിക്കുമോ പാര്‍ട്ടി സെക്രട്ടറി? സര്‍ക്കാറുമായി ചര്‍ച്ചയില്ല എന്ന് നേരത്തേ പറഞ്ഞതല്ലേ? പിന്നെയെന്ത് വിളി?
സമരം തീര്‍ന്നശേഷം മന്ത്രി വിളിച്ചതും സംസാരിച്ചതും സത്യംതന്നെ. പക്ഷേ, സംസാരിച്ചത് എന്തിനെക്കുറിച്ചാണ് എന്ന് റിപ്പോര്‍ട്ടര്‍മാരോട് പറയില്ല. വാര്‍ത്തയാകുന്ന കാര്യം പത്രക്കാരോട് പറയാന്‍ പറ്റില്ല. വാര്‍ത്തയല്ലെങ്കില്‍ പറയേണ്ട കാര്യവുമില്ല. ബി.പി. കുറയാന്‍ ഒറ്റമൂലി വല്ലതുമുണ്ടോ എന്നോ മറ്റോ ആവും ചര്‍ച്ചചെയ്തത്.


Sunday, 11 August 2013

ഇനി തെരുവില്‍ കാണാം



പണ്ടൊക്കെ നിയമസഭയില്‍ പൊരിഞ്ഞ പോരാട്ടത്തിനുശേഷം പറയാറുള്ളത് ഇനി നമുക്ക് കുരുക്ഷേത്രത്തില്‍ കാണാം എന്നായിരുന്നു. ജനങ്ങളിലേക്ക് പോകുന്നു, അവര്‍ തീരുമാനിക്കട്ടെ എന്നാണ് അര്‍ഥം. അതൊക്കെ മാന്യന്മാരുടെ കാലം. ഇനിയെന്ത് കുരുക്ഷേത്രം ! വാടാ....കാണിച്ചുതരാം എന്നുപറഞ്ഞാണ് ഇറങ്ങുന്നത്. ജനാധിപത്യം ജനഹിതമല്ല, തിണ്ണബലപരിശോധനയാണ്.

സോളാര്‍ അഴിമതിപ്രശ്‌നം തിങ്കളാഴ്ച മുതല്‍ ആരും ചര്‍ച്ച ചെയ്യാന്‍ പോകുന്നില്ല. ഇനി ഉപരോധം, കേന്ദ്രസേന, ലാത്തിച്ചാര്‍ജ്, ഗ്രനേഡ്, തീവെപ്പ്, വെടിവെപ്പ്, രക്തസാക്ഷി, ഹര്‍ത്താല്‍... എന്നിവയെക്കുറിച്ചേ ചര്‍ച്ചയുള്ളൂ. എല്ലാറ്റിന്റെയും ലൈവ് ടെലിക്കാസ്റ്റും പാതിരാവരെ ചര്‍ച്ചയും ഉണ്ടാകും. ആരും നിരാശപ്പെടേണ്ട. അരി, പച്ചക്കറി തുടങ്ങിയവയും മറ്റേ അവശ്യവസ്തുവും വീട്ടില്‍ വാങ്ങിവെക്കുന്നത് നന്ന്.

ഒരാവശ്യം ഉന്നയിച്ച് ഒരു ദിവസം ഹര്‍ത്താല്‍ നടത്താം. ഹര്‍ത്താല്‍ മോശം സംഗതിയാണെങ്കിലും ജനം സഹിക്കും. ഒരു ദിവസമല്ലേ, സാരമില്ല. അനിശ്ചിതകാല ഹര്‍ത്താല്‍ പ്രഖ്യാപിച്ചാലോ ? കളി മാറി. ജനം സഹിക്കില്ല. അതുകൊണ്ടാണ് ആരുമത് ചെയ്യാത്തത്. മുഖ്യമന്ത്രിയുടെ രാജി ആവശ്യപ്പെട്ട് ഒരു ദിവസം സെക്രട്ടേറിയറ്റ് ഉപരോധിക്കാം. ജനങ്ങളുടെയും സര്‍ക്കാറിന്റെയും ശ്രദ്ധയാകര്‍ഷിക്കാനാണ് പ്രക്ഷോഭങ്ങള്‍. ബലം പ്രയോഗിച്ച് മൂക്കുകൊണ്ട് ക്ഷ വരപ്പിക്കാനല്ല. മുഖ്യമന്ത്രി രാജിവെക്കുംവരെ സംസ്ഥാനഭരണത്തിന്റെ സിരാകേന്ദ്രമായ സെക്രട്ടേറിയറ്റ് ഉപരോധിക്കാന്‍ പുറപ്പെട്ടാല്‍ കളിമാറി.

സെക്രട്ടേറിയറ്റിന്റെ ജനവിരുദ്ധതയെക്കുറിച്ച് പരാതി ഇല്ലാത്തവരില്ല. അത് ഇടിച്ചുപൊളിച്ച് ചൊറിയണം നടണം എന്ന് ആര്‍. സുഗതന്‍ പറഞ്ഞത് ഇന്നും പ്രസക്തം തന്നെ. പക്ഷേ, ജനത്തിന്റെ ജീവിതപ്രശ്‌നങ്ങള്‍ തീരുമാനിക്കപ്പെടുന്നത് സെക്രട്ടേറിയറ്റില്‍ ആണ്. അധികാരവികേന്ദ്രീകരണം എന്നൊക്കെ പറഞ്ഞ് താഴെ ജില്ലാ-ബ്ലോക്ക് പഞ്ചായത്തൊക്കെ ഉണ്ടാക്കിയത് ജനങ്ങളുടെ കണ്ണില്‍പൊടിയിടാനും കുറേ പദവികളും തസ്തികകളും ഉണ്ടാക്കാനുമാണ്. ഇപ്പോഴും കാര്യങ്ങള്‍ തീരുമാനിക്കപ്പെടുന്നത് സെക്രട്ടേറിയറ്റിലാണ്. ഇന്ത്യന്‍ കോഫിഹൗസിലെ സപ്ലൈ തൊഴിലാളിയുടെ ശമ്പളം തീരുമാനിക്കുന്നത് സെക്രട്ടേറിയറ്റിലെ ഏതോ സെക്രട്ടറിയാണ്. മസാലദോശയുടെയും വടയുടെയും വില തീരുമാനിക്കാനുള്ള അധികാരം സെക്രട്ടേറിയറ്റിലെ ക്ലാര്‍ക്കിനാണ് എന്ന് ഉത്തരവ് ഇറങ്ങിക്കൂടായ്കയില്ല. അങ്ങനത്തെ ഒരു സെക്രട്ടേറിയറ്റാണ് തിങ്കളാഴ്ചമുതല്‍ സ്തംഭിപ്പിക്കാന്‍ പോകുന്നത്.

എന്തിനാണ് ഇത് ? മുഖ്യമന്ത്രിയെ രാജിവെപ്പിക്കാന്‍. കുറേദിവസം കരിങ്കൊടി കാട്ടിനോക്കി. കാളപ്പോരില്‍ കാളയെ ചുവപ്പുകാട്ടിയാണ് വിറളിപിടിപ്പിക്കുക എന്നുകേട്ടിട്ടുണ്ട്. വിറളി പിടിച്ചാല്‍ ആഞ്ഞുകുത്തും. പരക്കെ കരിങ്കൊടി കാട്ടിയിട്ടും മുഖ്യമന്ത്രിക്ക് വിറളി പിടിക്കുന്ന ലക്ഷണം കാണാത്തതുകൊണ്ടാണ് സമരത്തിന്റെ ട്യൂണ്‍ മാറ്റിയത്. രാപകല്‍ സത്യാഗ്രഹവും നടന്നു. പ്രസംഗം, മുദ്രാവാക്യം, പാതിരാപ്പാട്ട്, രാപകല്‍ പാക്കറ്റ് ഭക്ഷണം എന്നിവ. പാര്‍ട്ടിയുടെ കാശ് കുറെ പോയെന്നല്ലാതെ ഗുണമൊന്നും ഉണ്ടായില്ല. അതെല്ലാം തീര്‍ന്നു. ഇനി രണ്ടാലൊന്നാണ്.

ചോരയൊഴുക്കാതെ രണ്ടുകൂട്ടര്‍ക്കും മടങ്ങാന്‍ പറ്റില്ല.

ആദ്യ കമ്യൂണിസ്റ്റ് മന്ത്രിസഭയ്‌ക്കെതിരെ കോണ്‍ഗ്രസ്സുകാരും പള്ളിക്കാരും പട്ടക്കാരുമെല്ലാം ചേര്‍ന്ന് നടത്തിയ വിമോചനസമരത്തിന്റെ കമ്യൂണിസ്റ്റ് പതിപ്പാണിത് എന്ന മട്ടിലൊരു ഉപമാപ്രയോഗം മന്ത്രി കെ.സി. ജോസഫ് ഈയിടെ നടത്തിയിരുന്നു. പറഞ്ഞത് കമ്യൂണിസ്റ്റുകാര്‍ക്കും പിടിച്ചില്ല, കോണ്‍ഗ്രസ്സുകാര്‍ക്കും പിടിച്ചില്ല. കെ.സി. ജോസഫ് അങ്ങനെയൊരു സിദ്ധി ഈയിടെയായി നേടിയിട്ടുണ്ട്. പത്രക്കാരുടെ വകുപ്പുമന്ത്രി കൂടിയായതുകൊണ്ട് ചാനല്‍ചര്‍ച്ചയ്ക്കും മുഖപ്രസംഗത്തിനുമുള്ള വിഷയം ഉണ്ടാക്കിക്കൊടുക്കേണ്ടതും മന്ത്രിയുടെ ചുമതലയാണല്ലോ. മന്ത്രിയുടെ പുതിയ ഉപമ കേട്ട്, ''ഓഹോ അപ്പോള്‍ വിമോചനസമരം മഹാമോശമായിരുന്നു അല്ലേ ?'' എന്നാണ് കമ്യൂണിസ്റ്റുകാര്‍ ചോദിച്ചത്. വിമോചനസമരത്തോളം മഹത്തരമോ ഈ ഊച്ചാളി സമരം എന്ന് കോണ്‍ഗ്രസ്സുകാരും. രണ്ടും ഞാന്‍ പറഞ്ഞിട്ടില്ല എന്ന് കെ.സി. ജോസഫും.

വിമോചനസമരം ഒരു സര്‍ക്കാറിനെ താഴെയിറക്കാനാണ് നടത്തിയതെങ്കില്‍ ഇതൊരു മുഖ്യമന്ത്രിയെ താഴെയിറക്കാനാണ് എന്ന വലിയ വ്യത്യാസമുണ്ടെന്ന ഇടതുപക്ഷ ന്യായീകരണം കണ്‍ഫ്യൂഷനാണ് ഉണ്ടാക്കിയത്. മന്ത്രിസഭയെ താഴെയിറക്കുന്നത് ജനാധിപത്യവിരുദ്ധം, മുഖ്യമന്ത്രിയെ താഴെയിറക്കുന്നത് ജനാധിപത്യപരം എന്നൊരു തത്ത്വമുണ്ടോ എന്തോ... ആര്‍ക്കറിയാം. ജനാധിപത്യത്തിന്റെ ഒരു സൗകര്യം നമ്മുടെ സൗകര്യത്തിന് അനുസരിച്ച് തത്ത്വങ്ങളുണ്ടാക്കാന്‍ കഴിയും എന്നതാണ്.

സാധാരണയായി സമരക്കാര്‍ക്ക്  തലയ്ക്ക് സമനില തെറ്റിയ ശേഷമേ പോലീസിന് സമനില തെറ്റാറുള്ളൂ. ഇത്തവണ അതും മാറിയിട്ടുണ്ട്. ഭരണപക്ഷം ഒരു കാര്യത്തിലും പ്രതിപക്ഷത്തിന്റെ  പിന്നിലായിക്കൂടല്ലോ. ഓടുന്ന പ്രാന്തിന് ഒരുമുഴം മുമ്പേയാണ് സര്‍ക്കാറിന്റെ പ്രാന്ത്.  തലസ്ഥാനത്തെ യുദ്ധഭൂമിയാക്കി മാറ്റി. പട്ടാളഭരണം പ്രഖ്യാപിച്ച മട്ടിലാണ്  പോക്ക്.  അടിയന്തരാവസ്ഥയുടെ പ്രേതം കൂടിയോ ഭരണനേതൃത്വത്തിന്? സോളാര്‍ വൈദ്യുതിയിലേ  പുതുമയുള്ളൂ. സോളാര്‍ തട്ടിപ്പില്‍  പുതുമയൊന്നുമില്ല. സാധാരണ പോലൊരു തട്ടിപ്പ്. അതിന് വേണ്ടി ചോരയൊഴുക്കേണ്ട കാര്യമൊന്നുമില്ല. കോടതികളുടെ പരിധിയില്‍ വരുന്ന പ്രശ്‌നം  തീര്‍ക്കാന്‍ തെരുവുയുദ്ധം ആവശ്യമില്ലെന്ന ബോധമെങ്കിലും ജനനേതാക്കള്‍ക്കില്ലെങ്കില്‍ ജനമെന്തു ചെയ്യും?

* * *

വെറുതെ പഴങ്കഥ പറയുന്നതെന്തിനെന്ന് പുത്തന്‍ വിപ്ലവകാരികള്‍ പരിഹസിച്ചേക്കും. എങ്കിലും എ.കെ.ജി. - സി.കെ.ജി. എന്നൊക്കെ നാഴികയ്ക്ക് നാല്പതുവട്ടം മന്ത്രം ജപിക്കുന്നവര്‍ അറിയേണ്ട ചില പഴങ്കഥകളുണ്ട്. ചില പഴയ പത്രപ്രവര്‍ത്തകരും സഹപ്രവര്‍ത്തകരായിരുന്നവരും എഴുതിയതാണ്.

പഴങ്കഥ നമ്പര്‍ വണ്‍:
കെ.പി.സി.സി. പ്രസിഡന്റ് സി.കെ.ജി. മുഖ്യമന്ത്രി ആര്‍. ശങ്കറിന്റെ എതിര്‍ഗ്രൂപ്പുകാരനായിരുന്നു. മുഖ്യമന്ത്രിക്കെതിരെ പ്രതിപക്ഷപത്രം കടുത്ത അഴിമതി ആരോപണമുന്നയിച്ചു. ആരോപണത്തെക്കുറിച്ച് അന്വേഷണമാവശ്യപ്പെട്ട് ഡല്‍ഹിക്ക് പോയ സി.കെ.ജി. കൂടെ കൂട്ടിയത് പ്രതിപക്ഷപത്രത്തിന്റെ പത്രാധിപരെയാണ്. ''കോണ്‍ഗ്രസ് മുഖ്യമന്ത്രിക്കെതിരെയാണ് ആരോപണം. സത്യമറിയേണ്ട ബാധ്യത കെ.പി.സി.സി. പ്രസിഡന്റിനുണ്ട്. അതുകൊണ്ട് അന്വേഷണം വേണം'' പ്രസിഡന്റ് പത്രക്കാരോട് പറഞ്ഞു.

പഴങ്കഥ നമ്പര്‍ രണ്ട് : മന്ത്രിയായിരുന്നപ്പോള്‍ പി.ടി. ചാക്കോ സ്വയം ഓടിച്ചിരുന്ന കാറൊരു വണ്ടിയില്‍ തട്ടി നാട്ടുകാര്‍ ഇടപെട്ടു. അപ്പോള്‍ കാറിലൊരു സ്ത്രീ ഉണ്ടായിരുന്നു എന്നത് വിവാദമായി. മന്ത്രിയുടെ രാജിക്കുവേണ്ടി മുറവിളി ഉയര്‍ന്നു. ആരും സെക്രട്ടേറിയേറ്റൊന്നും ഉപരോധിച്ചില്ല. പക്ഷേ, കോണ്‍ഗ്രസ്സിന്റെ തന്നെ എം.എല്‍.എ. പ്രഹ്ലാദന്‍ ഗോപാലന്‍ ആണ് മന്ത്രിയുടെ രാജി ആവശ്യ പ്പെട്ട് സത്യാഗ്രഹം തുടങ്ങിയത്. ചാക്കോ എതിര്‍ഗ്രൂപ്പിലായിരുന്നുവെങ്കിലും സി.കെ.ജി. സ്വന്തം അനുയായിയായ ഗോപാലനെ സത്യാഗ്രഹത്തില്‍നിന്ന് പിന്തിരിപ്പിച്ചു. ഗ്രൂപ്പിസം വേറെ വ്യക്തിഹത്യ വേറെ.

പഴങ്കഥ മൂന്ന്: എ.കെ.ജി. ഇടുക്കി ജില്ലയിലെ അമരാവതിയില്‍ കുടിയിറക്കിനെതിരെ അനിശ്ചിതകാല ഉപവാസം ആരംഭിച്ചപ്പോള്‍ അവിടെ പാഞ്ഞുചെന്നവരില്‍ ഒരാള്‍ എതിര്‍കക്ഷിയുടെ നേതാവായ സി.കെ.ജി. ആയിരുന്നു. എ.കെ.ജി.യുടെ കൈ പിടിച്ച് സി.കെ.ജി. പറഞ്ഞത്രെ - ''നീ മരിക്കാനൊന്നും തുനിയേണ്ട. നിന്നെക്കൊണ്ട് കേരളത്തിന് ആവശ്യമുണ്ട് ''.....

ആര്‍ക്ക് കേള്‍ക്കണം ഈ മാതിരി ഒടഞ്ഞ പഴങ്കഥ...

 * * *

സോളാര്‍ വിവാദത്തിന്റെ വലിയ ഗുണഭോക്താവ് സി.പി.എം. ആണല്ലോ. പ്രകാശ് കാരാട്ട് കാലം കുറേയായി ശ്രമിച്ചിട്ടും തീരാത്ത വി.എസ്.-പിണറായി പോര് സരിത നായര്‍ തീര്‍ത്തും ഇല്ലാതാക്കി. പോരാത്തതിന് കോണ്‍ഗ്രസ്സിലെ ഗ്രൂപ്പിസം ഉച്ചകോടിയിലെത്തിക്കുകയും ചെയ്തു. കോണ്‍ഗ്രസ് ഗ്രൂപ്പുകള്‍ തമ്മില്‍, നേതാക്കള്‍ തമ്മില്‍, ഘടകകക്ഷികള്‍ തമ്മില്‍ പൊരിഞ്ഞ പോരിന് തിരി കൊളുത്തി സരിത. മന്ത്രിസഭ വീഴും എന്ന നിലപോലും ഉണ്ടായി.

കോണ്‍ഗ്രസ്സിനും യു.ഡി.എഫിനും സെക്രട്ടേറിയറ്റ് ഉപരോധം ആപത്കാലത്ത് കിട്ടുന്ന അനുഗ്രഹമാണ്. ഇനി പേടിക്കേണ്ട, തമ്മില്‍ത്തല്ല് ഉപരോധത്തോടെ നില്‍ക്കും. എത്ര അക്രമാസക്തമാവുമോ ഉപരോധം അത്രയും സന്തോഷം.....