Sunday, 30 August 2015

പഞ്ചായത്ത് പുരാണം



സ്റ്റേറ്റ് ഇലക്ഷന്‍ കമ്മിഷന്‍ പഞ്ചായത്ത് സെക്രട്ടറിയല്ല. സ്റ്റേറ്റ് ഇലക്ഷന്‍ കമ്മിഷന് ഹൈക്കോടതി ജഡ്ജിയുടെ ശമ്പളവും ബത്തയും മാത്രമല്ല പദവിയുമുണ്ട്. ഇന്ത്യന്‍ പാര്‍ലമെന്റ് 1993 ല്‍ അംഗീകരിച്ച വകുപ്പുകള്‍ അനുസരിച്ച്, ജഡ്ജിയെ മാറ്റുംപോലെ മാത്രമേ കമ്മിഷനെയും മാറ്റാനാവൂ. ശ്ശി പ്രയാസമാണ് എന്ന് മനസ്സിലായി.
എന്തൊരു പൊല്ലാപ്പ് പിടിച്ച ജനാധിപത്യമാണ് ഇത് ! ഒരു സംസ്ഥാന ഭരണകക്ഷിക്ക് സൗകര്യംപോലെ പഞ്ചായത്ത് തിരഞ്ഞെടുപ്പ് തിയ്യതി നിശ്ചയിക്കാന്‍ അധികാരമില്ലത്രെ. ഇപ്പോഴാണ് ജയിക്കാന്‍ നല്ല തഞ്ചം എന്ന് തോന്നിയാല്‍ അപ്പോള്‍ നിയമസഭാതിരഞ്ഞെടുപ്പ് നടത്താന്‍ സര്‍ക്കാറിന് അധികാരമുണ്ട്. പിരിച്ചുവിട്ട് തിരഞ്ഞെടുപ്പ് നടത്തണമെന്ന് മുഖ്യമന്ത്രി ഗവര്‍ണറോട് പറഞ്ഞാല്‍മതി, അപ്പംതന്നെ പിരിച്ചുവിടും. അതാണ് വകുപ്പ്. കേന്ദ്രനും വേണ്ടപ്പോള്‍ അങ്ങനെ ചെയ്യാം, രാഷ്ട്രപതിയോട് പറഞ്ഞാല്‍ മതി. പക്ഷേ, പഞ്ചായത്ത് തിരഞ്ഞെടുപ്പ് നമ്മുടെ സൗകര്യംനോക്കി ആറുമാസം മാറ്റാന്‍ പാടില്ലത്രെ. ക്രൂരംതന്നെ.

നാലാള്‍ കേള്‍ക്കെ പറയാന്‍ ചമ്മലുണ്ടെങ്കിലും പറയാതിരിക്കുന്നതെങ്ങനെ? ഇതെല്ലാം നമ്മുടെ നേതാവ് രാജീവ്ഗാന്ധി ഉണ്ടാക്കിവെച്ച ഒരു പൊല്ലാപ്പാണ്. അദ്ദേഹം പ്രധാനമന്ത്രിയായ ശേഷമാണ് ഈ പഞ്ചായത്ത് എന്നാല്‍, എന്തോ ഭയങ്കര സംഗതിയാണെന്ന ധാരണ ജനങ്ങള്‍ക്കിടയില്‍ പരത്തിയത്. അദ്ദേഹവും മണി ശങ്കര്‍ അയ്യര്‍ എന്ന മന്ത്രിയും കൂടിയുണ്ടാക്കിയ റിപ്പോര്‍ട്ടിന്റെ പുറത്താണ് പിന്നെയും വര്‍ഷംകുറേ കഴിഞ്ഞ് 1993ല്‍ ഭരണഘടനാ ഭേദഗതിയും കേന്ദ്ര ആക്റ്റും സംസ്ഥാന ആക്റ്റും ഒക്കെ ഉണ്ടായത്. ഇനി തിരഞ്ഞെടുപ്പ് നീട്ടിവെക്കുന്നത് ഭരണഘടനാവിരുദ്ധമാണത്രെ. നിയമസഭയ്ക്ക് പ്രമേയം പാസാക്കിപ്പോലും പഞ്ചായത്ത് തിരഞ്ഞെടുപ്പ് നീട്ടാന്‍ പറ്റില്ലാാാ.

അതിനുമുമ്പ്, പഞ്ചായത്തിന് ഒരു സുവര്‍ണകാലം ഉണ്ടായിരുന്നത് ഇപ്പോഴത്തെ ന്യൂ ജെന്‍ രാഷ്ട്രീയക്കാര്‍ക്കൊന്നും ഓര്‍മ കാണില്ലായിരിക്കും. പഞ്ചായത്ത് തിരഞ്ഞെടുപ്പ് എത്ര തവണ വേണമെങ്കിലും നീട്ടാമായിരുന്നു, ആ നല്ല കാലത്ത്. പതിനഞ്ച് കൊല്ലത്തോളമായിട്ടും തിരഞ്ഞെടുപ്പ് നടത്താതിരുന്നിട്ടുണ്ട്. അല്ലല്ല, ബ്രിട്ടീഷ് ഭരണകാലത്തൊന്നുമല്ല, നമ്മുടെ യു.ഡി.എഫ്. എല്‍.ഡി.എഫ്. ഭരണ സുവര്‍ണകാലത്തുതന്നെ. രണ്ടുകൂട്ടരും മത്സരിച്ച് നീട്ടുകയായിരുന്നു പഞ്ചായത്ത് തിരഞ്ഞെടുപ്പ്. കേന്ദ്രനിയമം വരുന്നതിന് മുമ്പാണ് സംഭവം. പ്രസിഡന്റുമാരും അംഗങ്ങളുമെല്ലാം ആദ്യം സന്തോഷിച്ചെങ്കിലും പിന്നെ എങ്ങനെയെങ്കിലും തടിയൂരിയാല്‍ മതിയെന്ന അവസ്ഥയിലെത്തിയിരുന്നു. ഇന്നത്തെ പഞ്ചായത്തുകാരെപ്പോലെ കാറും സ്‌കൂട്ടറുമൊന്നുമില്ലായിരുന്നു. സൈക്കിള്‍ ചവിട്ടിയും നടന്നും കാലുമുട്ട് തേഞ്ഞുതേഞ്ഞ് അവര്‍ നിലവിളി തുടങ്ങിയപ്പോഴാണ് തിരഞ്ഞെടുപ്പ് നടത്തിയത്. ഇപ്പോഴിത് മറ്റേ തലയ്ക്കല്‍ എത്തിയിരിക്കുന്നു, രണ്ടാഴ്ചപോലും തിരഞ്ഞെടുപ്പ് നീട്ടാന്‍ പാടില്ല. രണ്ടുമാസം നീട്ടി ചില പഞ്ചായത്തും മുനിസിപ്പാലിറ്റിയുമെല്ലാം ഒന്ന് ലെവലാക്കി എടുക്കാനുള്ള സാവകാശം സര്‍ക്കാറിന് തരില്ലെന്ന് പറയുന്നത് മഹാകഷ്ടമാണ്.

വോട്ടര്‍മാരെ ജാതിയും മതവും രാഷ്ട്രീയവും നോക്കി അങ്ങോട്ടും ഇങ്ങോട്ടും തട്ടുന്നത് എന്തോ വലിയ പാതകമാണ് എന്നൊരു കുപ്രചാരണവും ഇപ്പോള്‍ തുടങ്ങിയിട്ടുണ്ട്. ഒരു വാര്‍ഡിലെ ചില പ്രദേശങ്ങള്‍ അടുത്ത വാര്‍ഡിലേക്കും അവിടത്തെ കുറേ പ്രദേശങ്ങള്‍ ഈ വാര്‍ഡിലേക്കും മുറിച്ച് ചേര്‍ത്താല്‍, രണ്ട് വാര്‍ഡിലും നമ്മുടെ സ്ഥാനാര്‍ഥിയെ ജയിപ്പിക്കാനാകും. ഒരുദോഷവും വരാത്ത ഇത്തരമൊരു സല്‍പ്രവര്‍ത്തിയെ എന്തിനാണ് കോടതിയും കമ്മീഷനുമൊക്കെ എതിര്‍ക്കുന്നത് എന്ന് മനസ്സിലാവുന്നില്ല. ജനത്തിന് അത് പിടികിട്ടില്ല. ഒരു പഞ്ചായത്ത് എടുത്ത് അടുത്ത കോര്‍പ്പറേഷനില്‍ ചേര്‍ത്താല്‍ കോര്‍പ്പറേഷന്റെ ഭരണം നമ്മുടെ കൈയിലാക്കാമെന്ന് ഒരു മുന്നണി കരുതും. അതേ പ്രദേശം, അടുത്ത തിരഞ്ഞെടുപ്പില്‍ എടുത്ത് പുതിയ ഒരു മുനിസിപ്പാലിറ്റിയാക്കിയാല്‍ കോര്‍പ്പറേഷനും മുനിസിപ്പാലിറ്റിയും കൈയിലാക്കാമെന്ന് മറ്റേ മുന്നണിയും കരുതും. ജനങ്ങള്‍ക്ക് ഇത് ബഹുരസകരമായ ഏര്‍പ്പാടാണ്. 2005ല്‍ തിരഞ്ഞെടുപ്പ് നടക്കുമ്പോള്‍ മുണ്ടും ഷര്‍ട്ടുമായി നടന്ന പാവം പഞ്ചായത്ത് പൗരന്‍ 2010ലെ തിരഞ്ഞെടുപ്പായപ്പോഴേക്ക് ഒറ്റയടിക്ക് പാന്റും ഷര്‍ട്ടും ഇടുന്ന കോര്‍പ്പറേഷന്‍ സാറായി മാറി. അധികകാലം നെഗളിച്ച് നടക്കാന്‍ പറ്റിയില്ല. 2015 ആവുമ്പോഴേക്ക് ആളെ ഡൗണ്‍ഗ്രേഡ് ചെയ്ത് മുനിസിപ്പാലിറ്റിക്കാരനാക്കി. ഈ തലതിരിഞ്ഞ ഏര്‍പ്പാടിനാണ് ഡിലിമിറ്റേഷന്‍ എന്ന് ഇംഗ്ലീഷില്‍ പറയുന്നത്.

ഇല്ല, ഇത് നമ്മുടെ നാട്ടില്‍ മാത്രമുള്ള ഏര്‍പ്പാടാണ് എന്നൊന്നും തെറ്റിദ്ധരിക്കേണ്ട. ഇതിന്റെ ഇന്റലക്ച്വല്‍ പ്രോപ്പര്‍ട്ടി റൈറ്റ് അമേരിക്കയില്‍ ആണ് രജിസ്റ്റര്‍ ചെയ്തിട്ടുള്ളത്. ലേശം കാലപ്പഴക്കമുണ്ട്. 1812ല്‍ അമേരിക്കയിലെ മസ്സാച്ചുസെറ്റ്‌സ് സ്റ്റേറ്റ് സെനറ്റ് തിരഞ്ഞെടുപ്പില്‍ തന്റെ പാര്‍ട്ടിക്ക് ജയിക്കാന്‍ വേണ്ടി എല്‍ബ്രിഡ്ജ് ജെറി എന്നൊരു ഗവര്‍ണര്‍ സ്റ്റേറ്റിലെ മണ്ഡലങ്ങളെല്ലാം തോന്നിയപോലെ അറുത്തുമുറിച്ച് വിചിത്രമായ രൂപവും കോലവും ഉണ്ടാക്കിയതാണ് ചരിത്രത്തിലെ വലിയ സംഭവമായി രേഖപ്പെടുത്തിയത്. മണ്ഡലങ്ങളുടെ ഭൂപടം ഉണ്ടാക്കിയപ്പോള്‍ ഒരു മണ്ഡലം കണ്ട മണ്ടന്മാര്‍ അതിന് 'സലമാണ്ടര്‍' എന്ന മത്സ്യത്തിന്റെ തല വളഞ്ഞ ആകൃതിയാണെന്ന് കണ്ടുപിടിച്ചത്രെ. അങ്ങനെ ഗവര്‍ണര്‍ ജെറിയും സലമാണ്ടര്‍ മത്സ്യവം ചേര്‍ന്നുള്ള ഈ ഏര്‍പ്പാടിന് രാഷ്ട്രീയ ചരിത്രത്തില്‍ 'ജെറിമാന്‍ഡറിങ്' എന്ന പേരുണ്ടായി എന്ന് ചരിത്രം. നമുക്ക് വേണമെങ്കില്‍ ഇത് മാറ്റാം. അത് ഇപ്പോഴത്തെ മന്ത്രി അലിയുടെ പേരില്‍ 'അലിമാന്തല്‍' എന്നൊന്നും ആക്കരുത്. കാരണം ഈ ഏര്‍പ്പാട് ഇവിടെ ആദ്യം തുടങ്ങിയത് എന്നാണ്, ആരാണ് എന്ന് കണ്ടുപിടിച്ചേ നമ്മള്‍ അങ്ങനെ ചെയ്യാവൂ. ഗവേഷകന്മാരെ ആ പണി ഏല്‍പ്പിക്കാം. നമുക്ക് വേറെ പണിയുണ്ട്.

ഭരണഘടനയോടും പാര്‍ലമെന്റ് ഉണ്ടാക്കിയ നിയമത്തോടും വലിയ ബഹുമാനമായതുകൊണ്ട് നമ്മുടെ നേതാക്കള്‍ അതിന്റെ അക്ഷരവും അര്‍ഥവും വള്ളിപുള്ളി തെറ്റിക്കാതെ പരിപാലിച്ചുകളയും എന്നൊരു വിഷമമുണ്ട്. ഈ കേരളത്തിലൊരു ഇലക്ഷന്‍ കമ്മിഷനുണ്ട്. പഞ്ചായത്ത് തിരഞ്ഞെടുപ്പ് നടത്തലാണ് കമ്മിഷന്റെ പണി എന്നതുകൊണ്ട് മുസ്‌ലിം ലീഗ് നേതാക്കളുടെ വിചാരം പുള്ളിക്കാരന്‍ പഞ്ചായത്ത് സെക്രട്ടറിയുടെ ലവലില്‍ ഉള്ള ആരോ ആണ് എന്നാണ്. കമ്മിഷനും അങ്ങനെ വിശ്വസിച്ചുതുടങ്ങിയിട്ടുണ്ടോ എന്നും സംശയിച്ചുപോകും കമ്മിഷന്റെ ദയനീയാവസ്ഥ കണ്ടാല്‍. അയ്യോ പാവം.

സ്റ്റേറ്റ് ഇലക്ഷന്‍ കമ്മിഷന്‍ പഞ്ചായത്ത് സെക്രട്ടറിയല്ല. സ്റ്റേറ്റ് ഇലക്ഷന്‍ കമ്മിഷന് ഹൈക്കോടതി ജഡ്ജിയുടെ ശമ്പളവും ബത്തയും മാത്രമല്ല പദവിയുമുണ്ട്. ഇന്ത്യന്‍ പാര്‍ലമെന്റ് 1993 ല്‍ അംഗീകരിച്ച വകുപ്പുകള്‍ അനുസരിച്ച്, ജഡ്ജിയെ മാറ്റുംപോലെ മാത്രമേ കമ്മിഷനെയും മാറ്റാനാവൂ. ശ്ശി പ്രയാസമാണ് എന്ന് മനസ്സിലായി. ഇല്ലെങ്കില്‍ ഇതിനകം മാറ്റുമായിരുന്നല്ലോ. നിയമത്തില്‍ വേറൊന്നു കൂടി പറയുന്നുണ്ട്. ഇലക്ഷന്‍ കമ്മിഷന്‍ ഓഫ് ഇന്ത്യയുടെ അധികാരങ്ങളും ചുമതലകളും തന്നെയാണ് സ്റ്റേറ്റ് ഇലക്ഷന്‍ കമ്മിഷണര്‍ക്കും ഉള്ളതെന്ന് ! ഏത് ? സ്റ്റേറ്റ് ഇലക്ഷന്‍ കമ്മിഷന് വേണമെങ്കില്‍ ഒരു ടി.എന്‍. ശേഷന്‍ ആകാനും പറ്റുമെന്ന് ! ചുരുക്കിപ്പറഞ്ഞാല്‍ ആനയെപ്പോലെയാണ് നമ്മുടെ ഇലക്ഷന്‍ കമ്മീഷനും. കുനിയാന്‍ പറഞ്ഞാല്‍ കുനിയും... നടക്കാന്‍ പറഞ്ഞാല്‍ നടക്കും. അതെയയതെ, ആനയ്ക്കും അറിയില്ല ആനയുടെ ബലം.

                                                  ***

പണ്ടൊരു പഞ്ചായത്ത് തിരഞ്ഞെടുപ്പില്‍ സി.പി.എമ്മിന്റെ സ്ഥാനാര്‍ഥിയായി മത്സരിച്ച ആളാണ് ഇപ്പോള്‍ പഞ്ചായത്ത് തിരഞ്ഞെടുപ്പി നിയന്ത്രിക്കുന്ന ഇലക്ഷന്‍ കമ്മിഷണര്‍ എന്ന് മുസ്‌ലിം ലീഗ് നേതാക്കള്‍ ആശങ്കയോടെ ചൂണ്ടിക്കാട്ടുന്നു. ആശങ്കയില്‍ അടിസ്ഥാനമുണ്ട്. രണ്ടുവട്ടം സി.പി.എം. പിന്‍ബലത്തില്‍ എം.എല്‍.എ. ആയ ആള്‍ വകുപ്പ് മന്ത്രിയായിരിക്കുമ്പോള്‍ ഒരു കാരണവശാലും മറ്റൊരു മുന്‍ സി.പി.എമ്മുകാരന്‍ ഇലക്ഷന്‍ കമ്മീഷണറാവാന്‍ പാടില്ലായിരുന്നു.

nprindran@gmail.com

Sunday, 9 August 2015

വിപ്ലവ ബോധോദയങ്ങള്‍






ഇവിടെയും ഒരു ഭീകരശത്രു ഉയിര്‍ത്തെഴുന്നേറ്റ് വന്നാല്‍ ആര്‍.എസ്.പി.ക്കും സി.പി.എമ്മിനും
കോണ്‍ഗ്രസ്സിനുമെല്ലാം തോളോടുതോള്‍ ചേര്‍ത്ത് ഒരു മുന്നണിയായി
നില്‍ക്കാം. കോണ്‍ഗ്രസ്സും അപ്പോള്‍ ഇടതാവും. അങ്ങനെയൊരു അവസരമുണ്ടാകാന്‍
ബി.ജെ.പി.ക്കാര്‍ മുതല്‍ വെള്ളാപ്പള്ളി നടേശന്‍വരെ പ്രാര്‍ഥിക്കുന്നുണ്ട്


പിണറായി വിജയനോട് വിപ്ലവസോഷ്യലിസ്റ്റ് പാര്‍ട്ടിക്കാര്‍ എന്നും നന്ദിയുള്ളവരായിരിക്കും. ഇടതുമുന്നണിയില്‍നിന്ന് പുറത്തുകടക്കാന്‍മാത്രം സീരിയസ്സായ ഒരു കാരണം ഉണ്ടാക്കിയെടുത്തതിന് വേറെ ആരോട് നന്ദിപറയാനാണ്. ആ സത്കര്‍മംമൂലം ആര്‍.എസ്.പി.ക്കും കേരളസമൂഹത്തിനും മതേതരത്വത്തിനും ഉണ്ടായ നേട്ടങ്ങള്‍ ചില്ലറയൊന്നുമല്ല എന്നാണ് വിപ്ലവ സോഷ്യലിസ്റ്റ് പ്രസ്ഥാനത്തിന്റെ ദേശീയ നേതാവായ ചന്ദ്രചൂഡന്‍ ദിവസവും ചൂടായി പറഞ്ഞുകൊണ്ടിരിക്കുന്നത്. കൊല്ലത്ത് ചൂട് മൂര്‍ധന്യത്തിലായിട്ടുണ്ട്. കര്‍ക്കടകമാണെന്ന് പറഞ്ഞിട്ടെന്തുകാര്യം. മഴയും തണുപ്പും ഒട്ടുമില്ല.

ആര് എന്തൊക്കെ പറഞ്ഞാലും അന്തസ്സുള്ള ഒരു പാര്‍ട്ടിയാണ് ആര്‍.എസ്.പി. ഇടതുപക്ഷ ഐക്യം, സോഷ്യലിസ്റ്റ് കൂട്ടായ്മ, വിപ്ലവശക്തികളുടെ ദേശീയ ഐക്യം തുടങ്ങിയ ഇടപാടുകളേക്കാള്‍ അന്തസ്സിന് പാര്‍ട്ടി പരമപ്രാധാന്യം നല്‍കുന്നു. പാര്‍ട്ടിയുടെ അന്തസ്സിനേക്കാള്‍ വലുതായി എന്തെങ്കിലുമുണ്ടോ എന്ന് ചോദിച്ചാല്‍ വേണമെങ്കില്‍ കൊല്ലം പാര്‍ലമെന്ററി സീറ്റ് ഉണ്ട് എന്നുപറയാം. വേറൊന്നുമില്ല. ഭാഗ്യത്തിന് ഇപ്പോള്‍ കൊല്ലം സീറ്റുമുണ്ട്, അന്തസ്സുമുണ്ട്. സി.പി.എമ്മിനാകട്ടെ രണ്ടുമില്ല. ആര്‍.എസ്.പി. മുന്നണിവിട്ടതോടെയാണ് സി.പി.എമ്മിന് രണ്ടും പോയത്.

വര്‍ഗീയതയുമായി വിട്ടുവീഴ്ചചെയ്തതോടെയാണ് സി.പി.എം. തകര്‍ന്നുതുടങ്ങിയതെന്ന ഒരു ബോധോദയം ഇപ്പോള്‍ ആര്‍.എസ്.പി.ക്ക് ഉണ്ടായിട്ടുണ്ട്. ഓരോ തിരഞ്ഞെടുപ്പിലും ഓരോ വര്‍ഗീയപ്പാര്‍ട്ടിയെ സി.പി.എം. സോഫയിട്ടിരുത്തും. ആരോടും ചിരിക്കാത്ത പിണറായി വിജയന്‍ മഅദനിയുടെ വീല്‍ചെയറിന് അടുത്തുപോയി വെളുക്കെ ചിരിച്ചു. ഇതൊന്നും എന്തേ ആര്‍.എസ്.പി. അന്ന് പറഞ്ഞില്ല എന്നുചോദിക്കരുത്. എന്തും ഒരു ബോധോദയത്തിനുശേഷമേ ബോധ്യപ്പെടൂ. അത് കൊല്ലം സീറ്റ് പിടിച്ചുപറിച്ചപ്പോഴേ ഉണ്ടായുള്ളൂ. സി.പി.ഐ.യാണ് ലവലേശം അന്തസ്സില്ലാത്ത പാര്‍ട്ടി. സീറ്റ് പിടിച്ചെടുത്തിട്ടും ബോധോദയം ഉണ്ടായില്ല. മഅദനിയെ പ്രീണിപ്പിക്കുന്നതിന് പിണറായി പൊന്നാനിസീറ്റ് എടുത്ത് 'ഒരു അത്താണി'ക്ക് കൊടുത്തു. പ്രൊഫസര്‍ ചന്ദ്രചൂഡന്‍ വസ്തുതാപരമായ തെറ്റുവരുത്തരുത്. ഒരു അത്താണിക്കല്ല, 'രണ്ടത്താണി'ക്കാണ് കൊടുത്തത്. പൊന്നാനിസീറ്റ് കൊല്ലംപോലെയല്ല. മത്സരിക്കാന്‍ സി.പി.എം. ചിലപ്പോള്‍ സി.പി.ഐ.ക്ക് കൈമടക്ക് അങ്ങോട്ട് കൊടുക്കുന്നുണ്ടാവണം. ജയിക്കുമെന്ന് ഉറപ്പുള്ള ഒരു സീറ്റുപോലും ഇല്ലാത്തതാണ് സി.പി.ഐ.യുടെ ഭാഗ്യം. ഉണ്ടായിരുന്നെങ്കില്‍ എന്നേ അതും പോയേനെ, അന്തസ്സും പോയേനെ.

കോണ്‍ഗ്രസ്സിനെ വേരോടെ പിഴുതെറിയാന്‍ നടക്കുന്നുവെന്ന് പറയുന്ന സി.പി.എമ്മിന് ആ പാര്‍ട്ടിയുമായി അവിഹിതബന്ധമുണ്ടായിരുന്നു എന്നും ചന്ദ്രചൂഡന്‍ സാര്‍ കണ്ടെത്തിയിട്ടുണ്ട്. ഡാങ്കെയും സുര്‍ജിത്തും ഈ അവിഹിതത്തിന്റെ ആശാന്മാരായിരുന്നു. അന്ന് ആര്‍.എസ്.പി.യും ഉണ്ടായിരുന്നില്ലേ ഇടതുപക്ഷത്ത് എന്നുചോദിക്കരുത്. ആര്‍.എസ്.പി.യെ ഒരിക്കലും സി.പി.എമ്മുകാര്‍ അകത്തോട്ട് കയറാന്‍ സമ്മതിക്കാറില്ല. അതുകൊണ്ട് വിഹിതവും അവിഹിതവും ഒന്നും മനസ്സിലായിരുന്നില്ല. കേരളത്തില്‍ പക്ഷേ, കോണ്‍ഗ്രസ്സിനൊപ്പമായിരുന്നു ആര്‍.എസ്.പി.യുടെ വാസം 1969 മുതല്‍ ഏതാണ്ട് രണ്ട് പതിറ്റാണ്ടുകാലം. അതില്‍ പക്ഷേ, രഹസ്യമൊന്നുമില്ലല്ലോ.

എന്തായാലും ആര്‍.എസ്.പി.ക്ക് ഇപ്പോഴും ഒളിച്ചും പാര്‍ത്തുമുള്ള ഏര്‍പ്പാടൊന്നുമില്ല. കേരളത്തില്‍ ആര്‍.എസ്.പി. കോണ്‍ഗ്രസ്സിനൊപ്പമാണ്. കേന്ദ്രത്തില്‍ ഇടതിന് ഒപ്പമാണ്. കേരളത്തിലെ ഇടത് ശരിയല്ല, പുറത്ത് കുഴപ്പമില്ല. പണ്ട് കോണ്‍ഗ്രസ്സുകാര്‍ മുസ്‌ലിംലീഗിനെക്കുറിച്ച് പറയാറുള്ളത് കേരളത്തിലെ ലീഗ് വര്‍ഗീയമല്ല എന്നാണ്. കേരളത്തിനുപുറത്ത് ലീഗില്ല. പിന്നെ എന്തായാലെന്താണ് ചേതം ? സി.പി.എമ്മിന്റെ സ്ഥിതിയും ഇപ്പോള്‍ ഏതാണ്ട് അങ്ങനെയാണ്. പ്രശ്‌നം വേഗം തീരുമെന്ന പ്രതീക്ഷയാണ് ആര്‍.എസ്.പി.ക്കുള്ളത്. ഇവിടെയും ഒരു ഭീകരശത്രു ഉയര്‍ത്തെഴുന്നേറ്റ് വന്നാല്‍ ആര്‍.എസ്.പി.ക്കും സി.പി.എമ്മിനും കോണ്‍ഗ്രസ്സിനുമെല്ലാം തോളോടുതോള്‍ ചേര്‍ത്ത് ഒരു മുന്നണിയായി നില്‍ക്കാം. കോണ്‍ഗ്രസ്സും അപ്പോള്‍ ഇടതാവും. അങ്ങനെയൊരു അവസരമുണ്ടാകാന്‍ ബി.ജെ.പി.ക്കാര്‍ മുതല്‍ വെള്ളാപ്പള്ളി നടേശന്‍വരെ പ്രാര്‍ഥിക്കുന്നുണ്ട്. പ്രതീക്ഷ വെടിയരുത് ചന്ദ്രചൂഡന്‍ സാറേ...

                                          ******

ഡോ. തോമസ് ഐസക്ക് ഗാന്ധിയനാവാന്‍ ജുബ്ബ തയ്പിക്കുന്നുണ്ടോ എന്നൊരു സംശയം. മാധ്യമലോകത്തെ വര്‍ഗശത്രുക്കളെയും സി.ഐ.എ. ചാരന്മാരെയും സൈബര്‍ ലോകത്ത് മാതൃകാപരമായി കൈകാര്യംചെയ്യുന്ന ഇേപ്പാഴത്തെ വിപ്ലവസമ്പ്രദായം അങ്ങേര്‍ക്ക് ഒട്ടും പിടിക്കുന്നില്ല. ഫെയ്‌സ് ബുക്കില്‍ത്തന്നെ അദ്ദേഹമിട്ട ഉപദേശിപോസ്റ്റില്‍ ഇത് പറയുന്നുണ്ട്. സൈബര്‍ പോസ്റ്റിന്മേല്‍ കയറി ഇപ്പോള്‍ ആര്‍ക്കും എന്തും ഇടാം. കാല്‍ക്കാശിന്റെ ചെലവില്ല. ഐ.ടി. ആക്ടില്‍ ഉണ്ടായിരുന്ന ജനാധിപത്യവിരുദ്ധഅഭിപ്രായ സ്വാതന്ത്ര്യഹനന വകുപ്പ് പോയതോടെ ഏത് ഭീരുവിനും എന്തും ഇടാം. വിപ്ലവത്തിന് തടസ്സം നില്‍ക്കുന്ന ഹീനന്മാരെ വേറെ എങ്ങനെ നേരിടും സഖാവേ?

ഈ ലോകത്ത് എതിരാളികളെ നേരിടുന്നതിന് തുടര്‍ന്നുപോന്ന രീതികള്‍ ഇലോകത്തും തുടരണമെന്ന് സഖാവ് ദയവായി പറയരുത്. വളരെ ബുദ്ധിമുട്ടുള്ള ഏര്‍പ്പാടാണ് അതെല്ലാം. തലശ്ശേരിയില്‍പ്പോലും അതുമായി മുന്നോട്ടുപോകാന്‍ കഴിയാതായിരിക്കുന്നു. കാശെത്ര വേണമെന്നാണ് ചേട്ടന്‍ വിചാരിക്കുന്നത്? ബുദ്ധിജീവികളെയൊന്നും അങ്ങനെ കൈകാര്യംചെയ്തിട്ടില്ല ഇതുവരെ. സക്കറിയ ചേട്ടനും അത്യാവശ്യം വേറെചിലര്‍ക്കും ഓരോന്ന് കൊടുത്തിട്ടുണ്ടെന്നത് ശരിതന്നെ. പക്ഷേ, അതൊന്നും ഒരു ശീലമാക്കിയിട്ടില്ല. ഇനി പത്രത്തിലെഴുതുന്നവരെ അങ്ങനെ നേരിടാന്‍ തുടങ്ങണമോ? പത്രത്തിലെഴുതുന്നവരെ നമ്മുടെ പത്രത്തിലൂടെ കൈകാര്യംചെയ്യാറായിരുന്നു പതിവ്. എം.എന്‍. വിജയന്‍മുതല്‍ അപ്പുക്കുട്ടന്‍ വള്ളിക്കുന്ന് വരെയുള്ള കക്ഷികളെയല്ലേ അങ്ങനെ ചെയ്യാന്‍പറ്റുള്ളൂ. അതിനും വേണ്ടേ കുറേ ന്യൂസ് പ്രിന്റ്? ചില്ലറക്കാര്‍ക്കുവേണ്ടി വെറുതേ കാശുമുടക്കണമോ? സൈബര്‍ ഗുണ്ടായിസം പ്രയോജനപ്രദവും എളുപ്പവുമാണ്. സാര്‍ ഒരു സാമ്പത്തികശാസ്ത്രജ്ഞനല്ലേ? എത്ര ലാഭകരമാണ് ഇതെന്ന് പറയേണ്ട കാര്യമുണ്ടോ? ബംഗ്‌ളാദേശില്‍ ഇപ്പോള്‍ ബ്ലോഗിലെഴുതി ജനങ്ങളെ വഴിതെറ്റിക്കുന്നവരെ സമാധാനം എന്ന അര്‍ഥമുള്ള മതത്തില്‍ വിശ്വസിക്കുന്നവര്‍ സമാധാനപരമായി നരകത്തിലേക്ക് അയക്കുന്ന സമ്പ്രദായം നിലവില്‍വന്നിട്ടുണ്ട്. നമ്മള്‍ അത്രത്തോളം പോകാന്‍ ഉദ്ദേശിക്കുന്നില്ലല്ലോ, ഉണ്ടോ ?

                                                   ******

ഇനിയും നിലവിളക്ക് കൊളുത്തില്ല എന്ന് അബ്ദുറബ്ബ് മന്ത്രി പ്രഖ്യാപിച്ചിട്ടുണ്ട്. കൊളുത്തുന്ന പാപികള്‍ നരകത്തില്‍ പോകട്ടെ. നാടമുറിക്കുക എന്ന സമ്പ്രദായത്തില്‍ പിശകുണ്ടോ എന്ന് ഇതുവരെ ഫത്‌വയൊന്നും വരാത്തതുകൊണ്ട് നമുക്ക് അത് തുടരാവുന്നതാണ്. ഇനി പോയിപ്പോയി ഏതെങ്കിലും മതമൗലികവാദികള്‍ കിത്താബുകളെല്ലാം പരതി ഉദ്ഘാടനം എന്ന സമ്പ്രദായംതന്നെ മതവിരുദ്ധമാണെന്ന് കണ്ടുപിടിക്കാതിരുന്നാല്‍ മതിയായിരുന്നു. അങ്ങനെയോ മറ്റോ സംഭവിച്ചാല്‍ പിന്നെ മന്ത്രിയായിരുന്നിട്ട് പ്രയോജനമില്ല. നാടമുറിക്കലായാലും വിളക്കുകൊളുത്തലായാലും കാര്യക്ഷമതയോടെ നടക്കുന്ന ഒരേയൊരു സംഗതി അതാണ്. അതില്ലാണ്ടാക്കല്ലേ പടച്ചോനേ...

2ഹിന്ദുക്കള്‍ ആരാധനയ്ക്കിടയില്‍ നിലവിളക്ക് കൊളുത്തുന്നു എന്നതുകൊണ്ട് ഉദ്ഘാടനത്തിന് നിലവിളക്ക് കൊളുത്തുന്നതും ആരാധനയാണെന്നാണ് മതമൗലിക യുക്തിവാദികള്‍ പറയുന്നത്. നിലവിളക്കില്‍ വെളിച്ചെണ്ണ ഒഴിക്കുന്നതുകൊണ്ട് അത് നമ്മളെടുക്കരുത് എന്ന് നാളെ പറയുമോ എന്തോ. പഴയ മുസ്‌ലിം തറവാടുകളിലും പള്ളികളിലും കയറി ഇനി ഇവര്‍ നിലവിളക്കുകള്‍ കണ്ടുകെട്ടുമോ എന്നറിയില്ല. ക്രിസ്ത്യാനികള്‍ മെഴുകുതിരി കത്തിക്കുന്നത് ആരാധനയ്ക്കായതുകൊണ്ട് ഇനി വൈദ്യുതിനിലയ്ക്കുമ്പോള്‍ മെഴുകുതിരി കത്തിക്കുംമുമ്പ് രണ്ടുവട്ടം ആലോചിക്കുന്നത് നന്ന്.

ചിലകൂട്ടര്‍ യുക്തിനിരത്തി നിലവിളക്ക് കൊളുത്തലിനെ ന്യായീകരിക്കുന്നുണ്ട്. കാര്യമില്ല. യുക്തിക്ക് നിരക്കുന്ന യാതൊന്നും ചെയ്തുകൂടാ. അങ്ങനെ ചെയ്തുതുടങ്ങിയാല്‍ മതേതരത്വത്തെവരെ ന്യായീകരിക്കേണ്ടിവരും. പാടില്ല. എപ്പോഴും നമുക്ക് ഗുണംകിട്ടുന്നത് ചെയ്യുക എന്നതാണ് ഏറ്റവും സ്വീകാര്യമായ യുക്തി. അപ്പോഴപ്പോള്‍ അതിനുള്ള ന്യായങ്ങള്‍ നിരത്തിയാല്‍മതി. ഒരു അറ്റത്തുനില്‍ക്കുന്ന എ തീവ്രവാദികള്‍ മറ്റേ അറ്റത്തുള്ള സെഡ് തീവ്രവാദികള്‍ക്കും അവര്‍ ചെയ്യുന്നത് ഇവര്‍ക്കും പ്രയോജനം ചെയ്യും. അങ്ങനെ രണ്ടും തഴച്ചുവളരട്ടെ. സംസ്‌കാരം, സമാധാനം, സാഹോദര്യം എന്നും മറ്റും ഒരു യുക്തിയുമില്ലാതെ പറയുന്ന മറ്റുള്ളവര്‍ പോയി കടലില്‍ ചാടട്ടെ.

nprindran@gmail.com