Tuesday, 12 November 2019

മുഖപ്രസംഗപേജുകള്‍ രാഷ്ട്രീയക്കാര്‍ കയ്യടക്കുമ്പോള്‍


മീഡിയബൈറ്റ്‌സ്

മുഖപ്രസംഗപേജുകള്‍ രാഷ്ട്രീയക്കാര്‍ കയ്യടക്കുമ്പോള്‍

മിക്ക ഇംഗ്ലീഷ് പത്രങ്ങളുടെയും എഡിറ്റോറിയല്‍ പേജുകളില്‍ ലേഖനമെഴുതാനുളള കരാര്‍ രാഷ്ട്രീയക്കാര്‍ക്ക് കൊടുത്തിട്ടുണ്ടോ? ഓഗസ്റ്റ് മാസത്തില്‍ ദേശീയദിനപത്രങ്ങള്‍ പ്രസിദ്ധപ്പെടുത്തിയ ലേഖനങ്ങളെക്കുറിച്ച്് ഇന്ത്യന്‍ ജേണലിസംറെവ്യു (https://indianjournalismreview.com/)നടത്തിയ നിരീക്ഷണമാണ് ഈ ചോദ്യമുയര്‍ത്തുന്നത്.

കേന്ദ്രസര്‍ക്കാര്‍ കശ്മീരില്‍ ചരിത്രപ്രധാനമായ ഇടപെടല്‍ നടത്തിയ മാസം എന്ന നിലയില്‍ കൂടിയാവാം രാഷ്ട്രീയക്കാര്‍-ബഹുഭൂരിപക്ഷവും ബി.ജെ.പി നേതാക്കള്‍-പത്രങ്ങളുടെ ലേഖനവിഭാഗം കയ്യടക്കിയത്. ആഗസ്റ്റിലെ ഏഴു പ്രമുഖ ഇംഗ്ലീഷ് പത്രങ്ങളില്‍ 42 ലേഖനങ്ങള്‍ എഴുതിയത് രാഷ്ട്രീയ നേതാക്കളായിരുന്നു. നേതാക്കളല്ലാത്ത പാര്‍ട്ടി ബുദ്ധിജീവികള്‍ എഴുതിയതു കൂടി ചേര്‍ത്താല്‍ എണ്ണം 63 ആകും. ഇതില്‍ ഒന്നാം സ്ഥാനം ദി ഇന്ത്യന്‍ എക്‌സ്പ്രസ്സിനായിരുന്നു. 39 ലേഖനങ്ങള്‍ എഴുതിയത് നേതാക്കള്‍, ഇതില്‍ 32ഉം ബി.ജെ.പി നേതാക്കള്‍. സംഘപരിവാര്‍ സഹയാത്രികനായിരുന്ന അധിപന്‍ രാമ്‌നാഥ് ഗോയങ്കയുടെ കാലം മുതല്‍ ദി ഇന്ത്യന്‍ എക്്‌സപ്രസ്സിന് ഈ പക്ഷപാതം ഉണ്ടായിരുന്നതാണ്. 63 ലേഖനങ്ങളില്‍ പത്തു ലേഖനങ്ങള്‍ കോണ്‍ഗ്രസ് പക്ഷ നിലപാടുള്ളവ ആയിരുന്നു.

പുതിയ ആശയങ്ങളും പുതിയ ചിന്തകളും ഗൗരവമുള്ള വിമര്‍ശനങ്ങളും നിരീക്ഷണങ്ങളും നിറഞ്ഞു നില്‍ക്കുന്ന പേജുകളായിരുന്നു ഏതു പത്രത്തിലെയും എഡിറ്റോറിയല്‍ പേജുകള്‍ ഒരു കാലത്ത്. പത്രം ഗൗരവമുള്ള കാര്യങ്ങള്‍ക്കുള്ളതല്ലെന്നും വായനക്കാരില്‍ ഭൂരിപക്ഷത്തിനു ഇഷ്ടപ്പെടുന്ന വിഭവങ്ങളാണ് വേണ്ടതെന്നുമുള്ള പുതിയ കാല കോര്‍പ്പറേറ്റ്  ആശയം ശക്തി പ്രാപിച്ച തൊണ്ണൂറുകളോടെയാണ് പത്രലേഖനങ്ങളുടെ സ്വഭാവങ്ങളില്‍ മാറ്റംവന്നത്.

ഇപ്പോഴത്തെ ബി.ജെ.പി എഴുത്തുകാരില്‍ ഏറ്റവും പ്രമുഖന്‍ ജനറല്‍ സിക്രട്ടറി രാം മാധവ് ആണ്. മിക്ക പത്രം ഓഫീസുകളിലും കാണപ്പെടാറുള്ള ഇദ്ദേഹം ഒരു മാസം നാലു ലേഖനങ്ങള്‍ എഴുതിയിട്ടുണ്ട്. നിയമമന്ത്രി രാംശങ്കര്‍ പ്രസാദ് മൂന്നു ലേഖനങ്ങള്‍ എഴുതി. ഇംഗ്ലീഷില്‍ ഒരു വാചകമെങ്കിലും എഴുതുമെന്ന് ആരും കുറ്റപ്പെടുത്തിയിട്ടില്ലാത്ത ആഭ്യന്തരമന്ത്രി അമിത് ഷാ 22 ദിവസത്തിനുള്ളില്‍ രണ്ടു ലേഖനങ്ങളെഴുതിയെന്നാണു ഐ.ജെ.ആര്‍ റിപ്പോര്‍ട്ടില്‍ പരിഹസിക്കുന്നത്. കോണ്‍ഗ്രസ് നേതാവ് കപില്‍ സിബലും രണ്ടു ലേഖനം എഴുതിയിട്ടുണ്ട്.
.-
'അഭൂതപൂര്‍വമായ' ജന്മദിനവൂം മാധ്യമ ആഘോഷവും

പ്രധാനമന്ത്രി നരേന്ദ്രമോദിയുടെ 69ാം പിറന്നാള്‍ സപ്തംബര്‍ 17-നായിരുന്നു. പിറന്നാളുകള്‍ അഭൂതപൂര്‍വമല്ല. വര്‍ഷംതോറും സംഭവിക്കുന്നതാണ്. അറുപതും എഴുപതുമൊക്കെ പ്രത്യേകതയുള്ള വയസ്സായാണ് കണക്കാക്കാറുള്ളത്. പ്രധാനമന്ത്രിയ്ക്കു അറുപത്തഞ്ചു തികഞ്ഞത് കാര്യമായൊന്നും കൊണ്ടാടിയിരുന്നില്ല. എന്തുകൊണ്ടെന്നറിയില്ല 69ാം പിറന്നാള്‍ വലിയ സംഭവമായിരുന്നു. മാധ്യമങ്ങളിലാണ് അതു കാര്യമായി ആഘോഷിക്കപ്പെട്ടത്. രാജ്യത്തെ എല്ലാ സംസ്ഥാനങ്ങളിലെയും പ്രധാന മാധ്യമങ്ങളില്‍, കേന്ദ്രമന്ത്രിസഭയിലെ രണ്ടാമന്‍ എന്നു കരുതപ്പെടുന്ന അമിത് ഷായുടെ പ്രത്യേകലേഖനം ഉണ്ടായിരുന്നു. ഒരു ജന്മദിനത്തില്‍ പ്രധാനമന്ത്രിയെ പുകഴ്ത്തി രാജ്യത്തെ ഏറ്റവുമധികം പത്രങ്ങളില്‍ മുഖ്യലേഖനം പ്രസിദ്ധീകരിക്കുന്ന ആദ്യവ്യക്തി അമിത് ഷാ ആയിരിക്കാം.

അമിത് ഷായ്ക്ക്ു പുറമെ വാര്‍ത്താവിതരണ പ്രക്ഷേപണവകുപ്പ് മന്ത്രി പ്രകാശ് ജാവഡേക്കറും പ്രകീര്‍ത്തന ലേഖനങ്ങള്‍ എഴുതാന്‍ നിയോഗിക്കപ്പെട്ടിരുന്നു. മലയാളത്തില്‍ മനോരമ പത്രത്തില്‍ അമിത് ഷായുടെയും മാതൃഭൂമിയില്‍ പ്രകാശ് ജാവഡേക്കറുടെയും ലേഖനങ്ങളാണ് ഉണ്ടായിരുന്നത്. ചെറുകിട പത്രങ്ങളില്‍ ലേഖനമൊന്നും കണ്ടില്ല. ടൈംസ് ഓഫ് ഇന്ത്യ മാത്രം കേന്ദ്രമന്ത്രിമാരുടെ ലേഖനത്തിനു പകരും പ്രത്യേകം നിര്‍ദ്ദേശിച്ച്  സദ്ഗുരു ജഗ്ഗി വാസുദേവ് ആണ് പ്രധാനമന്ത്രിയെക്കുറിച്ച് എഴുതിയത്.

മുമ്പ് ഒരു പ്രധാനമന്ത്രിയുടെയും ജന്മദിനം ഈ രീതിയില്‍ ആഘോഷിക്കപ്പെട്ടതായി ആര്‍ക്കും അറിയില്ല. പൊതുതിരഞ്ഞെടുപ്പിനു മുന്‍പുള്ള മൂന്നു വര്‍ഷക്കാലത്ത് കേന്ദ്രസര്‍ക്കാറിന്റെ പദ്ധതികള്‍ക്കു പ്രചാരം നല്‍കാന്‍ 3800 കോടി രൂപയുടെ പരസ്യം മാധ്യമങ്ങള്‍ക്ക് നല്‍കിയതായി ഇപ്പോള്‍ ലേഖനമെഴുതിയ മന്ത്രി പ്രകാശ് ജാവഡേക്കര്‍ പാര്‍ലമെന്റില്‍ അറിയിച്ചിരുന്നു.
എന്തായാലും അടുത്ത വര്‍ഷത്തെ എഴുപതാം ജന്മദിനം അഭൂതപൂര്‍വമായിത്തന്നെ ആഘോഷിക്കപ്പെടുമെന്ന കാര്യത്തില്‍ സംശയം വേണ്ട.


 ദി ടൈംസ് ഓഫ് ഇന്ത്യ, ദി ഹിന്ദു, ദി ഇന്ത്യന്‍ എക്‌സ്പ്രസ്, ദി ടെലഗ്രാഫ്, ഡക്കാന്‍ ഹെറാള്‍ഡ്, ദി ന്യൂ ഇന്ത്യന്‍ എക്‌സ്പ്രസ് എന്നീ പത്രങ്ങളിലെ ലേഖനങ്ങളാണ് പരിശോധിച്ചത്.  രാഷ്ട്രീയക്കാരുടെ ലേഖനങ്ങള്‍ കൊടുക്കുന്ന കാര്യത്തില്‍ ഏറ്റവും 'മോശം'  നിലപാട് ദി ഹിന്ദുവിന്റെതാണ്. ഉപരാഷ്ട്രപതി വെങ്കയ്യ നായിഡുവിനു മാത്രമാണ് ആ പടി കയറാനായത്. ദി ടെലഗ്രാഫിലും പാര്‍ട്ടി നേതാക്കള്‍ എഴുതിയിട്ടില്ല.

കാല്‍നൂറ്റാണ്ടു മുന്‍പുവരെയും പത്രത്തിലെ ബുദ്ധിജീവികളായ എഡിറ്റര്‍മാരാണ് ദേശീയ- അന്തര്‍ദേശീയ വിഷയങ്ങളെക്കുറിച്ച്്്് പഠനാര്‍ഹമായ ലേഖനങ്ങള്‍ എഴുതാറുള്ളത്. ഇപ്പോള്‍ പല പത്രങ്ങളിലും അത്തരം ബുദ്ധിജീവകള്‍ തീരെ ഇല്ലാത്തതാവാം രാഷ്ട്രീയബുദ്ധിജീവികളെ ആശ്രയിക്കാന്‍ കാരണം. പത്രങ്ങള്‍ക്ക് പുറത്തുള്ള യഥാര്‍ത്ഥ ബുദ്ധിജീവികളെക്കൊണ്ട് എഴുതിക്കാന്‍ പ്രതിഫലം കൊടുക്കേണ്ടതുണ്ട്. പ്രത്യേകിച്ച് പ്രതിഫലമൊന്നും കൊടുക്കാതെ കിട്ടുന്നതാണ് രാഷ്ട്രീയക്കാരുടെ പ്രചാരണസാഹിത്യം. വായനക്കാരന് എന്തു പ്രയോജനം എന്ന് ആരും ചോദിക്കാറില്ല.


തകരുന്ന പത്രങ്ങള്‍, വേരുറക്കാതെ ഓണ്‍ലൈന്‍:
മാധ്യമഭാവി ഇപ്പോഴും അനിശ്ചിതം
നാളെയുടെ മാധ്യമം ഏത്്? ഇപ്പോഴും ഇത്തരം കിട്ടാത്ത ചോദ്യമായി അതു തുടരുന്നു. ഇന്നത്തെ മാധ്യമം ഏത് എന്നതിനെക്കുറിച്ചുപോലും ഉറച്ച ഉത്തരം കിട്ടുന്നില്ല. ഇന്റര്‍നെറ്റ് മാധ്യമങ്ങളില്‍ വാര്‍ത്ത തേടുന്നവരുടെ എണ്ണം അനുദിനം വര്‍ദ്ധിക്കേതന്നെ, ആ വിധം മാധ്യമങ്ങള്‍ക്കും വേരുറക്കുന്നില്ല. ഒരുപാട് ഓണ്‍ലൈന്‍ മാധ്യമങ്ങളും പരമ്പരാഗതമാധ്യമങ്ങള്‍ നേരിടുന്ന തരം പ്രതിസന്ധികളെ നേരിടുന്നു. പോരാത്തതിനു അവരുടെ വാര്‍ത്തകള്‍ക്കു വിശ്വാസ്യത നേടാന്‍ കഴിയുന്നുമില്ല, സ്ഥാപനങ്ങളില്‍ തൊഴില്‍സുരക്ഷിതത്വം നല്‍കാന്‍ കഴിയുന്നില്ല. ഭാവി അനിശ്ചിതം.

ന്യൂ ഓര്‍ലീന്‍സില്‍ ഒക്‌റ്റോബറില്‍ നടക്കുന്ന അമേരിക്കന്‍ ഓണ്‍ലൈന്‍ ന്യൂസ് അസോസിയേഷന്‍ വാര്‍ഷിക സമ്മേളനത്തിനു മുന്നോടിയായി പ്യൂ റിസര്‍ച്ച് സെന്റര്‍ നടത്തിയ സര്‍വെ ഈ അനിശ്ചിതത്ത്വങ്ങളിലേക്കാണ് വിരല്‍ ചൂണ്ടിയത്. പ്രധാന നിഗമനങ്ങള്‍ ചുവടെ ചേര്‍ക്കുന്നു.

കുടുതല്‍ വായന ഓണ്‍ലൈനില്‍
2018-ല്‍ മുതിര്‍ന്ന അമേരിക്കക്കാരില്‍ 34 ശതമാനം പേരും ഓണ്‍ലൈനില്‍ വിവരങ്ങള്‍ അറിയാനാണ് താല്പര്യപ്പെട്ടത്. 2016-ലെ ഇത്തരക്കാരുടെ ശതമാനം 28 ആയിരുന്നതാണ് ഇത്തവണ 34 ആയത്. ഇങ്ങനെ പറയുമ്പോഴും വാര്‍ത്തയുടെ ആദ്യ സ്രോതസ് ടെലിവിഷന്‍ ആയി തുടരുകയാണ് 44 ശതമാനം ആളുകള്‍ക്കും.

പ്രാദേശികവാര്‍ത്തകള്‍ക്കു  രണ്ടും 
പ്രാദേശികവാര്‍ത്തകള്‍ വായിക്കാന്‍ ഓണ്‍ലൈന്‍ മാധ്യമങ്ങളെയും ടെലിവിഷനെയും ഏതാണ്ട് ഒരേ പോലെ ആശ്രയിക്കുന്നവരാണ് ഭൂരിപക്ഷം മുതിര്‍ന്ന അമേരിക്കക്കാരും. 37 ശതമാനം വായനക്കാര്‍ ഓണ്‍ലൈന്‍ വഴിയും 41 ശതമാനം പേര്‍ ടെലിവിഷന്‍ ചാനലുകളിലൂടെയുമാണ് പ്രാദേശികവാര്‍ത്തകള്‍ അറിയുന്നത്. ടെലിവിഷനില്‍ പൊതുവാര്‍ത്തകള്‍ അറിയാം.  എന്നാല്‍, ഏതെങ്കിലും പ്രദേശത്തെ ഏതെങ്കിലും പ്രത്യേകവാര്‍ത്ത തെരച്ചില്‍ നടത്തി അറിയാന്‍ എല്ലാവര്‍ക്കും ഇന്റര്‍നെറ്റ് മാധ്യമങ്ങള്‍തന്നെ വേണം.

അനായാസ ഉപയോഗം
സമയം മെനക്കെടുത്താതെ അതിവേഗം, ക്ലേശരഹിതമായി വാര്‍ത്ത അറിയാന്‍ കഴിയണം എന്നതിനാണ് പത്തില്‍ എട്ടു അമേരിക്കക്കാരും(82ശതമാനം) പ്രാധാന്യം നല്‍കുന്നത്. വളച്ചുകെട്ടിയും സങ്കീര്‍ണത കൂട്ടിക്കലര്‍ത്തിയും വാര്‍ത്ത ദുരൂഹമാക്കുന്ന പ്രവണണയുണ്ട്.  നാട്ടില്‍ നടക്കാന്‍ പോകുന്ന കാര്യങ്ങളെക്കുറിച്ചുള്ള ആര്‍, എപ്പോള്‍, എവിടെ, എങ്ങനെ... തുടങ്ങിയ വിവരങ്ങള്‍ ഒറ്റ വായനയില്‍ അറിയുകയാണ് പ്രധാനം.

തൊഴില്‍ ലഭ്യത ഏറുന്നു, പക്ഷേ
2008-നും 2018-നും ഇടയില്‍ ഓണ്‍ലൈന്‍ മാധ്യമങ്ങളില്‍ പ്രവര്‍ത്തിക്കുന്നവരുടെ എണ്ണം 82 ശതമാനം വര്‍ദ്ധിച്ചതായി സര്‍വെ കണ്ടെത്തി. എന്നാല്‍, പരമ്പരാഗത മാധ്യമങ്ങളില്‍ നഷ്ടപ്പെട്ട തൊഴിലവസരങ്ങളുടെ എണ്ണവുമായി താരതമ്യപ്പെടുത്തുമ്പോള്‍ ഈ വര്‍ദ്ധന നിസ്സാരമാണ്. 33000 തൊഴിലുകള്‍ പത്രങ്ങളില്‍ നഷ്ടപ്പെട്ടപ്പോഴാണ് ഓണ്‍ലൈനില്‍ 7000-13000 തൊഴിലുകള്‍ ഉണ്ടായത്. പരമ്പരാഗതമാധ്യമങ്ങളില്‍ നാലിലൊന്നു തൊഴിലവസരങ്ങളാണ് 2008-18 കാലത്ത് ഇല്ലാതായത്. ലേഓഫ് പോലുള്ള തൊഴില്‍ മുടക്കങ്ങളുടെ കാര്യത്തില്‍ ഇന്റര്‍നെറ്റ് മാധ്യമങ്ങളില്‍ സ്ഥിതി ഒട്ടും ഭേദമല്ലതാനും. പത്രങ്ങളേക്കാള്‍ അനിശ്ചിതവും അപ്രവചനീയവുമാണ് ഓണ്‍ലൈന്‍ മാധ്യമങ്ങളുടെ വരുമാനനില. വായനക്കാരുടെ എണ്ണം ദിവസംതോറും മാറുന്നതുകൊണ്ടു വരുമാനവും അനിശ്ചിതമാകുന്നു. തൊഴില്‍ സുരക്ഷിതത്വം ഒട്ടുമില്ലെന്നു സാരം

ഫെയ്‌സ്ബുക്ക് മുന്നില്‍
ഫെയ്‌സ് ബുക്ക് ഒരു വാര്‍ത്താമാധ്യമമല്ലെങ്കിലും 43 ശതമാനം അമേരിക്കക്കാര്‍ക്ക്് വാര്‍ത്ത ആദ്യം ലഭിക്കുന്നത് ഫെയ്‌സ്ബുക്കില്‍ നിന്നാണ്. അതേസമയം സാമൂഹ്യ മാധ്യമങ്ങളില്‍ കിട്ടുന്ന വാര്‍ത്തയുടെ സത്യാവസ്ഥയെക്കുറിച്ച്  ഉറപ്പും ആര്‍ക്കുമില്ല. വസ്തുതാപരമല്ലാത്ത വാര്‍ത്തകളാണ് മിക്കപ്പോഴും സോഷ്യല്‍ മീഡിയ തരുന്നത്. ഒന്നും വിശ്വസിക്കാന്‍ വയ്യ. കൃത്രിമമായി സൃഷ്ടിക്കപ്പെടുന്ന വാര്‍ത്തകളാണ് സാമൂഹ്യമാധ്യമങ്ങളിലേറെയും എന്ന് സാമൂഹ്യമാധ്യമം വായിക്കുന്നവരില്‍ പകുതിയിലേറെപ്പേര്‍ തിരിച്ചറിഞ്ഞതായി സര്‍വെ വെളിവാക്കി.

നാലിലൊന്നു പത്രങ്ങളും ജോലിക്കാരെ കുറച്ചു
2018-ല്‍ അമേരിക്കയിലെ നാലിലൊന്നു പത്രങ്ങളിലും പത്രപ്രവര്‍ത്തകരുള്‍പ്പെടെയുള്ള ജീവനക്കാരെ പിരിച്ചുവിടേണ്ടി വന്നതായി പ്യൂ റിസര്‍ച്ച് സെന്ററിന്റെ സര്‍വെ വ്യക്തമാക്കി. ഞായര്‍  പ്രചാരം അരലക്ഷം വരെ കോപ്പിയുള്ള പത്രങ്ങള്‍ക്കാണ് ഏറെയും ക്ഷതമേറ്റത്. തൊഴില്‍ നഷ്ടപ്പെട്ട പത്രജീവനക്കാരുടെ എണ്ണം മുന്‍വര്‍ഷത്തേക്കാള്‍ കൂടുതലാണ്.


ഗൂഗ്‌ളിനെതിരെ പത്രങ്ങളുടെ പടയൊരുക്കം

ഗൂഗ്ള്‍ സേര്‍ച്ചില്‍ വാര്‍ത്തകള്‍ വരുന്നത് കോപ്പിറൈറ്റ് നിയമങ്ങളുടെ ലംഘനമാണോ? ഗൂഗ്‌ളും പത്രങ്ങളും തമ്മില്‍ ഈ വിഷയത്തില്‍  ശണ്ഠ തുടങ്ങിയിട്ട് കാലം കുറച്ചായി. ഇപ്പോഴിതാ ഫ്രാന്‍സിലെയും ജര്‍മനിയിലെയും പ്രസാധകര്‍ ഗൂഗ്‌ളിനെ തുരത്താന്‍ ഐക്യമുന്നണി രൂപവല്‍ക്കരിക്കുകയാണ്.

ലോകമെങ്ങും ഗൂഗ്‌ളില്‍ വാര്‍ത്ത കൊടുക്കുന്നതിന് പ്രത്യേക വ്യവസ്ഥയൊന്നുമില്ല. പല പ്രസാധകരും അതു നല്ല കാര്യമായാണ് കണക്കാക്കിയിരുന്നത്. അത്രയും കൂടുതല്‍ ആളുകള്‍ തങ്ങളുടെ പത്രവും വാര്‍ത്തയും വായിക്കുമല്ലോ എന്നവര്‍ ആശ്വസിച്ചിരുന്നു. എന്നാല്‍, ഒരു വാര്‍ത്ത പോലും സ്വന്തമായി പ്രസിദ്ധീകരിക്കാതെ, മറ്റുള്ളവര്‍ പ്രസിദ്ധീകരിച്ച വാര്‍ത്തകള്‍ കൊണ്ട് ഗൂഗ്ള്‍ പണം കൊയ്യുകയാണെന്ന തിരിച്ചറിഞ്ഞതോടെയാണ് സംഘര്‍ഷം ആരംഭിച്ചത്. കോപ്പിറൈറ്റ് നിയമങ്ങള്‍ വാര്‍ത്തകള്‍ക്കു ബാധകമാക്കണമെന്ന ആവശ്യം ഉയര്‍ന്നതും ഇതിനെത്തുടര്‍ന്നാണ്.

ഓണ്‍ലൈന്‍ പ്രസാധകര്‍ക്ക് ബാധകമാകുന്ന കോപ്പിറൈറ്റ് നിയമം യൂറോപ്യന്‍ യൂണിയന്‍ തയ്യാറാക്കുന്നതാണ് ഇപ്പോള്‍ ഈ ചര്‍ച്ച സജീവമാകാന്‍ കാരണം. പ്രതിഫലം കൊടുത്ത് സേര്‍ച്ച് വിവരം പ്രസിദ്ധപ്പെടുത്താന്‍ തയ്യാറല്ലെന്നു ഗൂഗ്ള്‍ ആദ്യമേ പ്രഖ്യാപിച്ചിട്ടുള്ളതാണ്. സേര്‍ച്ചില്‍ ചേര്‍ക്കാന്‍ തങ്ങള്‍ ആര്‍ക്കും പ്രതിഫലം നല്‍കുന്നില്ല. അതുകൊണ്ട് പത്രങ്ങള്‍ക്കു മാത്രം അങ്ങനെ പണം നല്‍കാനാവില്ല. സേര്‍ച്ച് ഫലങ്ങളല്ല, സേര്‍ച്ച് പേജിലെ പരസ്യങ്ങളാണ് തങ്ങള്‍ വില്‍ക്കുന്നത്-അവര്‍ ന്യായീകരിക്കുന്നു.

സംഘം ചേരലൊക്കെ നടക്കുമെങ്കിലും, ഗൂഗ്‌ളിനെ തോല്‍പ്പിക്കുക അത്ര എളുപ്പമല്ല. സൗജന്യമായി ഉള്ളടക്കം തന്നില്ലെങ്കില്‍ തങ്ങളുടെ സേര്‍ച്ച് ഫലത്തില്‍നിന്നു പത്രം ഒഴിവാക്കപ്പെടുമെന്നു ഗൂഗ്ള്‍ മുന്നറിയിപ്പ് നല്‍കുന്നുണ്ട്. വെബ് വാര്‍ത്തകളിലേക്ക് മിക്കപ്പോഴും വായനക്കാര്‍ എത്തുന്നത് സേര്‍ച്ച് പേജുകളിലൂടെയാണ്. എന്നാല്‍ ഗൂഗ്‌ളിനും ഇതു പൂര്‍ണരൂപത്തില്‍ നടപ്പാക്കാനാവില്ല. അവര്‍ക്കും പത്രവാര്‍ത്ത വേണം. ഇതില്ലെങ്കില്‍ സേര്‍ച്ച് സംവിധാനം ദുര്‍ബലമാകും. പരസ്യം കുറയും.

ഫ്രഞ്ച്, ജര്‍മന്‍ പ്രസാധകരാണ് ഇപ്പോള്‍ ഇക്കാര്യത്തില്‍ ഉറച്ച നിലപാട് എടുത്തിട്ടുള്ളതെങ്കിലും രണ്ട് രാജ്യങ്ങളിലെയും ഗവണ്മെന്റുകള്‍ ഇതുവരെ നിലപാട് ഉറപ്പിച്ചിട്ടില്ല. ഫ്രഞ്ച് സര്‍ക്കാര്‍ പൊതുവെ പത്രങ്ങള്‍ക്ക് അനുകൂലമാണ്. എന്നാല്‍ ഗൂഗ്ള്‍ നിലപാടില്‍ തെറ്റൊന്നുമില്ല എന്നാണ് ജര്‍മന്‍ സര്‍ക്കാറിന്റെ കാഴ്ചപ്പാട്. യൂറോപ്യന്‍ യൂണിയന്‍ ചര്‍ച്ചകളില്‍ അവര്‍ എന്തു നിലപാട് സ്വീകരിക്കുമെന്നു കണ്ടറിയണം.

ലോകവ്യാപകമായി പ്രത്യാഘാതമുണ്ടാക്കുന്ന തീരുമാണമാണ് ഇതില്‍ ഉരുത്തിരിയുക. ഫ്രാന്‍സിലാണ് പുതിയ ചട്ടം ആദ്യം നടപ്പാക്കേണ്ടത്. ഫ്രാന്‍സിന്റെ അനുഭവമനുസരിച്ചാവും മറ്റു രാജ്യങ്ങള്‍ അവരുടെ നയം രൂപവല്‍ക്കരിക്കുന്നത്. യൂറോപ്പിനു പുറത്തും ഈ വിഷയം ചര്‍ച്ച ചെയ്യപ്പെടുന്നുണ്ട്.

ചൈനയില്‍ മാധ്യമപ്രവര്‍ത്തകര്‍ക്ക് 'കൂറു പരീക്ഷ'

ചൈനയിലെ പൊതുമേഖലാ പത്രങ്ങളിലെ പതിനായിരത്തിലേറെ മാധ്യമപ്രവര്‍ത്തകര്‍ പ്രസിഡന്റ് ഷി ചിന്‍പിങ്ങിനോട് കൂറു പുലര്‍ത്തുന്നവരാണോ എന്നു പരിശോധിക്കപ്പെടും. കൂറു മാത്രമല്ല, പ്രസിഡന്റ് പിന്തുടരുന്ന നയങ്ങളോടും അദ്ദേഹത്തിന്റെ രാഷ്ട്രീയ ചിന്തയോടും മാക്‌സിസത്തിന്റെ ചൈനീസ് പ്രയോഗത്തോടും ഉള്ള സമീപനവും അറിവും പരിശോധിക്കപ്പെടുമെന്നു സൗത് ചൈന മോണിങ്‌പോസ്റ്റ്് റിപ്പോര്‍ട്ട് ചെയ്തു. .

 രാജ്യവ്യാപകമായി  രണ്ടു ഘട്ടമായാണ് പരീക്ഷ നടത്തുക. ആദ്യഘട്ടപരീക്ഷ ഒക്‌റ്റോബറില്‍ നടക്കും. കമ്യൂണിസ്റ്റ് പാര്‍ട്ടിയുടെ പ്രചാരണവകുപ്പാണ് ഇതിന്റെ ചുമതല  വഹിക്കുക. പരീക്ഷ  എഴുതുന്നതിന് പ്രത്യേക ആപ്പ് തയ്യാറാക്കിക്കഴിഞ്ഞു.

മാധ്യമപ്രവര്‍ത്തകര്‍ക്കള്ള പ്രസ് കാര്‍ഡുകള്‍ പരീക്ഷയില്‍ വിജയിച്ചവര്‍ക്കു മാത്രമേ  കിട്ടൂ. സൗത് ചൈന മോണിങ്ങ് പോസ്റ്റ്( scmp.com ) ഇതുസംബന്ധിച്ച് വിശദവിവരങ്ങള്‍ റിപ്പോര്‍ട്ട് ചെയ്തിട്ടുണ്ട്. നൂറു വര്‍ഷത്തിലേറെ പഴക്കമുള്ള ഹോങ്കോങ് പ്രസിദ്ധീകരണമാണ് ഇത്.
(Published in Media Magazine Oct 2019)

Tuesday, 5 November 2019

തിരിഞ്ഞുകടിച്ച പൊലീസ്

അപശബ്ദം 

എന്‍പിയാര്‍

തിരിഞ്ഞുകടിച്ച പൊലീസ്

പണ്ട് നക്‌സലുകള്‍ എന്നാണ് വിളിക്കാറുള്ളത്. അടുത്ത കാലത്താണ് പേരു ഒന്നു കൂടി പ്രാകൃതമാക്കിയത്. മാവോയിസ്റ്റുകള്‍. പണ്ടാണ് അവര്‍ ശരിക്കും മാവോയിസ്റ്റുകളായിരുന്നത്. ഇന്നിപ്പോള്‍ മാവോ സെ തൂങ്ങിന്റെ നാട്ടില്‍പ്പോലും മാവോയിസ്റ്റുകളില്ല. ഉള്ളത്് അസ്സല്‍ മുതലാളിത്ത തീവ്രവാദികളാണ്. അമേരിക്കക്കാര്‍ക്കു വരെ അസൂയ ഉണ്ടാക്കുന്ന ഇനം മാവോയിസ്റ്റുകള്‍. 

അതവിടെ നില്‍ക്കട്ടെ. കുറെക്കാലമായി, മാവോയിസ്റ്റ് ഭീഷണി എന്നു പരക്കെ കേള്‍ക്കുന്നുണ്ടെങ്കിലും കേരളത്തിലൊരു പൂച്ചക്കുട്ടിയെപ്പോലും അവര്‍ കൊന്നതായി വാര്‍ത്തയില്ല. കൊല്ലുന്ന പണി മൊത്തം സംസ്ഥാനം ഭരിക്കുന്നവരും കേന്ദ്രം ഭരിക്കുന്നവരുമാണല്ലോ ഏറ്റെടുത്തിട്ടുള്ളത്. കാട്ടില്‍ ഗതികിട്ടാ പട്ടിണിക്കാരായി നടക്കാറുണ്ടത്രെ കുറെ മാവോയിസ്റ്റുകള്‍. എന്തിനാണ് കാട്ടില്‍ നടക്കുന്നത് എന്നു മാത്രം മനസ്സിലാവുന്നില്ല. അവരെ നേരിടാന്‍, എടുത്താല്‍ പൊന്താത്ത ആയുധങ്ങളും വാഹനങ്ങളും കോടിക്കണക്കിനു രൂപയും കേന്ദ്രന്‍ സംസ്ഥാനത്തിനു കൊടുക്കുന്നുണ്ട്. അതുംവാങ്ങി ചുമ്മാ ഇരിക്കുന്നതെങ്ങനെ?  അതാണ്്, തങ്ങളുടെ ഒരു രോമത്തിനു പോലും കേടു പറ്റാതെ നിഷ്പ്രയാസം നാലു മനുഷ്യരെ അട്ടപ്പാടിയില്‍ തട്ടിയത്. ഇനി അതിനുള്ള പരമവീരചക്രമോ വെറും ചക്രമോ കേന്ദ്രപോലീസ് തസ്തികയോ ചിലര്‍ക്കൊക്കെ കിട്ടുമായിരിക്കും. കിട്ടട്ടെ.

മാവോയിസ്റ്റ് ഉന്മൂലനത്തിന്റെ ഭരണകൂട സ്്പിരിട്ട് സി.പി.എം സഹധര്‍മ പാര്‍ട്ടിയായ സി.പി.ഐക്ക് ഉണ്ടായില്ല. മഹാകഷ്ടം. പൊലീസ് വകുപ്പ് കൈകാര്യം ചെയ്യുന്ന മുഖ്യമന്ത്രി അനുഭവിക്കുന്നു പെടാപ്പാടിനെക്കുറിച്ച് അവര്‍ക്ക് ഒരു സഹതാപവും ഇല്ല. മാവോയിസ്റ്റാവുന്നതുതന്നെ വെടിവെച്ചു കൊല്ലാന്‍ മതിയായ പ്രകോപനമാണെന്ന് എന്തേ മനസ്സിലാക്കാത്തത്! കീഴടങ്ങാന്‍ വന്നവരെ വെടിവെച്ചിട്ടുവെന്നു മാത്രമല്ല, ഒരു അശു നേതാവിനെ കസ്റ്റഡിയില്‍ വെടിവെച്ചുകൊന്നു എന്നും സി.പി.ഐ.ക്കാര്‍ ആരോപിച്ചിട്ടുണ്ട്്്. കണ്ടാലും മിണ്ടാതിരിക്കുകയല്ലേ ഭരണമുന്നണി ഘടകത്തിന്റെ മുന്നണിധര്‍മം? സി.പി.ഐ.ക്കാര്‍ക്ക് ഇതൊന്നും മനസ്സിലാവില്ല. പഴയ രാജന്‍കേസ്സിന്റെ കുറ്റബോധം ഉള്ളില്‍കുത്തുന്നുണ്ട്. അടിയന്തരാവസ്ഥയില്‍ മുഖ്യമന്ത്രിസ്ഥാനത്ത് ഇരുന്നു സുഖിച്ച പാര്‍ട്ടിയല്ലേ.... അതുകൊണ്ട്്് ഇപ്പോള്‍ എല്ലാറ്റിനും ഒരു മുഴം മുന്നെ എറിയണം. എങ്കിലേ ഇടതിനേക്കാള്‍ വലിയ ഇടതാവാനാവൂ. 

നാലു സോകോള്‍ഡ് മാവോയിസ്റ്റുകളെ കൊന്നതുകൊണ്ടൊന്നും കേന്ദ്രത്തിലെയും കേരളത്തിലെയും ഇരട്ടച്ചങ്കന്മാര്‍ക്ക് തൃപ്തി വരില്ല എന്നാശങ്കിച്ചാവണം രാത്രി റോഡോരത്തു നിന്ന രണ്ടുപേരെ ജയിലിലിട്ടത്. റോഡോരത്തു നില്‍ക്കുന്നത് കുറ്റമാവുമോ എന്തോ. സഞ്ചി തപ്പിയപ്പോള്‍ മാവോയിസ്റ്റുകളുടെ നോട്ടീസ് കണ്ടത്രെ. മഹാപരാധംതന്നെ. ഒരു തരത്തില്‍ നോക്കിയാല്‍ മാന്യന്മാരാണ് ആ പൊലീസുകാര്‍. നഗരമാവോയിസ്റ്റുകളാണ് എന്നു പറഞ്ഞ് അപ്പടി വെടിവെച്ചു കൊല്ലാമായിരുന്നല്ലോ. അതു ചെയ്തില്ല. ആ അമ്മമാരുടെ ഭാഗ്യം. പിടിക്കപ്പെട്ടവര്‍ ആര്്്്്, എന്ത് എന്നു നോക്കിയതു മാരകവിഷമുള്ള യുഎപിഎ കുത്തിവെച്ച ശേഷമാണ്. ചെറുപ്പക്കാര്‍ മുഖ്യമന്ത്രിയുടെ പാര്‍ട്ടിയുടെ പ്രവര്‍ത്തകരാണ് എന്നറിയുമ്പോഴേക്കും വൈകിയിരുന്നു. ഇനി ഊരാന്‍ കുറച്ച് പാടുണ്ട്.





ഇരട്ടച്ചങ്കുള്ള സഖാവ് പൊലീസിനെ ഭരിക്കുമ്പോള്‍തന്നെ വേണം ഇങ്ങനെ സംഭവിക്കാന്‍. പാര്‍ട്ടി സംസ്ഥാനകമ്മിറ്റിക്കുതന്നെ മുഖം നഷ്ടപ്പെട്ടതുകൊണ്ടാണ് അവരെ വിട്ടയക്കണമെന്നു ആലോചിക്കുന്നതുതന്നെ. വല്ല സാധാരണക്കാരനും ആയിരുന്നെങ്കില്‍ ആരും ഒരക്ഷരം മിണ്ടില്ലായിരിന്നു. ഈ തോതില്‍ എന്തായിരിക്കും സംഘപരിവാര്‍ ഭരിക്കുന്ന സംസ്ഥാനങ്ങളിലെ സ്ഥിതി? എത്ര ചെറുപ്പക്കാരെ ഭീകരലേബ്ള്‍ നെറ്റിയിലൊട്ടിച്ച് എത്ര വര്‍ഷമായി ജയിലിട്ടിട്ടുണ്ടാവും. ഇടതുപക്ഷമോ സംഘപക്ഷമോ എന്ന വ്യത്യാസമെല്ലാം ഇല്ലാതാവും. ജമ്മു കാശ്മീരിലെ പൊലീസ് ഭരണം കേന്ദ്രം ഏറ്റെടുത്തത് അങ്ങനെ നിയമം മാറ്റിക്കൊണ്ടുതന്നെയാണ്. കേരളം പോലുള്ള അപ്രധാനസംസ്ഥാനങ്ങളില്‍ പറയാതെയും അതു ചെയ്യാവുന്നതേ ഉള്ളൂ. ചെയ്തു കഴിഞ്ഞോ എന്തോ...... 

പാട്ടത്തിന് പട്ടേല്‍
കോണ്‍ഗ്രസ് നേതാവായിരുന്ന സര്‍ദാര്‍ വല്ലഭഭായ് പട്ടേലിനെ ബി.ജെ.പി ക്കാര്‍ എന്തിന് തലയില്‍ പേറി നടക്കുന്നു എന്നു പലരും ചോദിക്കുന്നുണ്ട്. അങ്ങനെ പാടില്ലെന്ന് ഭരണഘടനയിലില്ല. ശ്രീരാമന്‍ മുതല്‍ സ്വാമി വിവേകാനന്ദന്‍ വരെ ആരും എതിരു പറയാത്ത മഹാബിംബങ്ങളെ സ്വന്തമാക്കി വെക്കുന്നതിന് നിയമതടസ്സമില്ലെന്നിരിക്കെ എന്തു കൊണ്ട് ഒരു പരേതനായ കോണ്‍ഗ്രസ് നേതാവിനെ പൊക്കിപ്പിടിച്ചു കൂടാ. എന്തിന് സ്വന്തം നേതൃദാരിദ്ര്യം വെളിപ്പെടുത്തുന്നത് എന്ന ചോദ്യമുണ്ട്. ദേശീയ സ്വാതന്ത്ര്യസമരം നടക്കുമ്പോള്‍ സംഘപരിവാറിനു കൊടിപിടിക്കാനും ജയിലില്‍ പോകാനുമൊന്നും സമയം കിട്ടിയില്ല. മസില്‍ ഉരുട്ടല്‍, ദണ്ഡ് പ്രയോഗം, കമ്പഡികളി തുടങ്ങിയ അടിയന്തരപ്രാധാന്യമുളള വിഷയങ്ങളിലായിരുന്നു ശ്രദ്ധ. അതുകൊണ്ടാണ് 1930-47 കാലത്തെ ഒരു നേതാവിന്റെയും ഫോട്ടോ ഫ്രെയിം ചെയ്തു ചുവരില്‍ തൂക്കാന്‍ കിട്ടാതെ പോയത്. അങ്ങനെ വരുമ്പോള്‍ അത്യാവശ്യം ചിലരെ ചരിത്രപുസ്തകത്തില്‍നിന്നു പാട്ടത്തിനെടുക്കാവുന്നതേ ഉള്ളൂ.

പട്ടേല്‍ ഗുജറാത്തുകാരനാണെന്നത് മുഖ്യഘടകമാണ്. ഇന്ത്യയെ ഒന്നാക്കിയ ആളെന്ന ക്രഡിറ്റുണ്ട്. ആര്‍.എസ്.എസ്സിനെ നിരോധിച്ച ആളെന്ന ഒരു ദുഷ്‌പേരുണ്ട്. അത് അവഗണിക്കാം. നെഹ്‌റുവിന്റെ പണിയാണെന്നു പറഞ്ഞുനില്‍ക്കാം. മോദിയും അമിത് ഷായും വരുന്ന സംസ്ഥാനമാണല്ലോ ഗുജറാത്ത്. ആ ഗുജറാത്തില്‍ പിന്നെ പരിഗണിക്കേണ്ട ഒരാള്‍ ഗാന്ധിജിയാണ്. ഗോഡ്‌സെ,സവാര്‍ക്കര്‍മാരെ ഇവര്‍ക്കൊപ്പം ചേര്‍ക്കാം. ചിലരെല്ലാം കുരച്ചുചാടുമെങ്കിലും ചരിത്രം മാറ്റിയെഴുതുന്ന പണി പൂര്‍ത്തിയാകുമ്പോഴേക്ക് എല്ലാം അപ്രസക്തമാകും. മഹാത്മാഗാന്ധി, സര്‍ദാര്‍ പട്ടേല്‍, നരേന്ദ്ര മോദി, അമിത് ഷാ എന്നിവര്‍ ഒരു വരിയില്‍ അണിനിരക്കും. കണ്ടോളിന്‍.

സുരേഷ് ഗോപിയുടെ കഷ്ടപ്പാട്
പാര്‍ട്ടി പ്രസിഡന്റുമാരായിരുന്ന പല വിദ്വാന്മാരും കണ്ണടച്ചു തുറക്കുമ്പോഴേക്ക് ഗവര്‍ണര്‍മാരായി സുഖവാസത്തിന് പോകുന്നത് കണ്ടില്ലേ? വാസ്തവത്തില്‍ ഇങ്ങനെ സുഖവാസം ലഭിക്കേണ്ട ഒരാളല്ലേ നമ്മുടെ സുരേഷ് ഗോപിജി. എന്തെല്ലാം വീരകൃത്യങ്ങളാണ് അദ്ദേഹം വെള്ളിത്തിരയില്‍ ചെയ്തിട്ടുള്ളത്. എത്രയെത്ര അടിപൊളി തട്ടുപൊളിപ്പന്‍ പ്രസംഗങ്ങളാണ് ഡയലോഗായി അടിച്ചുവിട്ടിട്ടുള്ളത്.  ആ ദേഹത്തിനു ബി.ജെ.പിയില്‍ ചേര്‍ന്ന ശേഷം ഇരിക്കപ്പൊറുതി കിട്ടിയിട്ടില്ല.

രാജ്യസഭാംഗത്വം കൊടുത്തു, ശരിതന്നെ. പക്ഷേ, എന്തുകൊണ്ട് ഒരു കേന്ദ്രമന്ത്രി കൊടുത്തില്ല? അതുപോട്ടെ, വലിയ ശല്യമൊന്നുമില്ലാത്ത പണിയാണ് രാജ്യസഭയിലേത്. ഒരു സൈഡില്‍ മിണ്ടാതിരിക്കാം. അങ്ങനെ ഇരിക്കുമ്പോഴാണ് തൃശ്ശൂരില്‍ മത്സരിക്കാന്‍ ആവശ്യപ്പെട്ടത്. പറ്റില്ല എന്നു പറയാന്‍ പറ്റുമോ? പറ്റില്ല. എന്തു വിചാരിക്കും മോദിജിയും ഷാജിയുമൊക്കെ. മത്സരിച്ചു. ജയിക്കരുതേ എന്നു തനിക്കുവേണ്ടിത്തന്നെ പലരും പ്രാര്‍ത്ഥിച്ചുകാണണം. ഇരിക്കപ്പൊറുതി കിട്ടുമോ ലോക്‌സഭാംഗമായാല്‍? വീട്ടിലെ കോളില്‍ ബെല്ലില്‍ വഴിപോകുന്നവരൊക്കെ കയറി വിരലമര്‍ത്തില്ലേ? ഭാഗ്യം, ജയിച്ചില്ല.

അങ്ങനെ മനസ്സമാധാനത്തോടെ കഴിഞ്ഞുകൂടാന്‍ തുടങ്ങുമ്പോഴതാ വീണ്ടും വിളി വരുന്നു. ശ്രീധരന്‍പിള്ളയിരുന്ന കസേര ഒഴിവാണത്രെ. ഒരു കാര്യം വ്യക്തം. സുരേഷ് ഗോപിയോട് കടുത്ത ശത്രുതയുള്ള ആരോ ഡല്‍ഹിയില്‍ പാര്‍ട്ടി നേതൃത്വത്തില്‍ ഇരുന്നു ചരടുവലിക്കുന്നുണ്ട്. കേരളത്തില്‍ എന്തു പണിക്കും കോപ്പുള്ള അര ഡസന്‍ നേതാക്കളുള്ളപ്പോള്‍ പാര്‍ട്ടി പഞ്ചായത്ത് കമ്മിറ്റി പ്രസിഡന്റ് പോലുമായിട്ടില്ലാത്ത ആ ചങ്ങാതിയെ സംസ്ഥാന പ്രസിഡന്റാക്കാമെന്ന് ബുദ്ധിയുദിച്ച ആള്‍ക്ക്  അടിയന്തര ചികിത്സ നല്‍കേണ്ടതുതന്നെയാണ്. എന്തിനും വേണ്ടേ പരിധി?
 മുനയമ്പ്
നിര്‍മിതബുദ്ധി സേവനങ്ങള്‍ പൊലീസിലും നടപ്പാക്കും: മുഖ്യമന്ത്രി
നിര്‍മിത ബുദ്ധിശൂന്യതയാണ് വാളയാര്‍ മുതല്‍ അട്ടപ്പാടിവരെയും പിന്നെ കോഴിക്കോട്ടും നടപ്പാക്കിയത്. അതുമതി. 

Wednesday, 30 October 2019

'പ്രസന്റ് സര്‍, വി ടി ഭട്ടതിരിപ്പാട് ഇവിടെയുണ്ട് '

https://www.facebook.com/photo.php?fbid=2624055844317287&set=a.301525849903643&type=3&theater&notif_t=feedback_reaction_generic_tagged&notif_id=1572352966569458


സൈലന്‍സ് പ്രസിദ്ധീകരിച്ച ' പ്രസന്റ് സര്‍, വി ടി ഭട്ടതിരിപ്പാട് ഇവിടെയുണ്ട് ' സാറ ജോസഫ് എന്‍.പി രാജേന്ദ്രന് നല്‍കി പ്രകാശനം ചെയ്തു. സിവിക് ചന്ദ്രന്‍ എഡിറ്റ് ചെയ്തതാണ് കൃതി. സിവിക് ചന്ദ്രന്‍, കന്നട എഴുത്തുകാരനായ പ്രസന്ന എന്നിവര്‍ സമീപം. കോഴിക്കോട് മൂലാക്കം വേദിയിലാണ് ചടങ്ങ് നടന്നത്.

.

മുഖപ്രസംഗപേജുകള്‍ രാഷ്ട്രീയക്കാര്‍ കയ്യടക്കുമ്പോള്‍




മുഖപ്രസംഗപേജുകള്‍ രാഷ്ട്രീയക്കാര്‍ കയ്യടക്കുമ്പോള്‍

മിക്ക ഇംഗ്ലീഷ് പത്രങ്ങളുടെയും എഡിറ്റോറിയല്‍ പേജുകളില്‍ ലേഖനമെഴുതാനുളള കരാര്‍ രാഷ്ട്രീയക്കാര്‍ക്ക് കൊടുത്തിട്ടുണ്ടോ? ഓഗസ്റ്റ് മാസത്തില്‍ ദേശീയദിനപത്രങ്ങള്‍ പ്രസിദ്ധപ്പെടുത്തിയ ലേഖനങ്ങളെക്കുറിച്ച്് ഇന്ത്യന്‍ ജേണലിസംറെവ്യു (https://indianjournalismreview.com/)നടത്തിയ നിരീക്ഷണമാണ് ഈ ചോദ്യമുയര്‍ത്തുന്നത്.

കേന്ദ്രസര്‍ക്കാര്‍ കശ്മീരില്‍ ചരിത്രപ്രധാനമായ ഇടപെടല്‍ നടത്തിയ മാസം എന്ന നിലയില്‍ കൂടിയാവാം രാഷ്ട്രീയക്കാര്‍-ബഹുഭൂരിപക്ഷവും ബി.ജെ.പി നേതാക്കള്‍-പത്രങ്ങളുടെ ലേഖനവിഭാഗം കയ്യടക്കിയത്. ആഗസ്റ്റിലെ ഏഴു പ്രമുഖ ഇംഗ്ലീഷ് പത്രങ്ങളില്‍ 42 ലേഖനങ്ങള്‍ എഴുതിയത് രാഷ്ട്രീയ നേതാക്കളായിരുന്നു. നേതാക്കളല്ലാത്ത പാര്‍ട്ടി ബുദ്ധിജീവികള്‍ എഴുതിയതു കൂടി ചേര്‍ത്താല്‍ എണ്ണം 63 ആകും. ഇതില്‍ ഒന്നാം സ്ഥാനം ദി ഇന്ത്യന്‍ എക്‌സ്പ്രസ്സിനായിരുന്നു. 39 ലേഖനങ്ങള്‍ എഴുതിയത് നേതാക്കള്‍, ഇതില്‍ 32ഉം ബി.ജെ.പി നേതാക്കള്‍. സംഘപരിവാര്‍ സഹയാത്രികനായിരുന്ന അധിപന്‍ രാമ്‌നാഥ് ഗോയങ്കയുടെ കാലം മുതല്‍ ദി ഇന്ത്യന്‍ എക്്‌സപ്രസ്സിന് ഈ പക്ഷപാതം ഉണ്ടായിരുന്നതാണ്. 63 ലേഖനങ്ങളില്‍ പത്തു ലേഖനങ്ങള്‍ കോണ്‍ഗ്രസ് പക്ഷ നിലപാടുള്ളവ ആയിരുന്നു.

പുതിയ ആശയങ്ങളും പുതിയ ചിന്തകളും ഗൗരവമുള്ള വിമര്‍ശനങ്ങളും നിരീക്ഷണങ്ങളും നിറഞ്ഞു നില്‍ക്കുന്ന പേജുകളായിരുന്നു ഏതു പത്രത്തിലെയും എഡിറ്റോറിയല്‍ പേജുകള്‍ ഒരു കാലത്ത്. പത്രം ഗൗരവമുള്ള കാര്യങ്ങള്‍ക്കുള്ളതല്ലെന്നും വായനക്കാരില്‍ ഭൂരിപക്ഷത്തിനു ഇഷ്ടപ്പെടുന്ന വിഭവങ്ങളാണ് വേണ്ടതെന്നുമുള്ള പുതിയ കാല കോര്‍പ്പറേറ്റ്  ആശയം ശക്തി പ്രാപിച്ച തൊണ്ണൂറുകളോടെയാണ് പത്രലേഖനങ്ങളുടെ സ്വഭാവങ്ങളില്‍ മാറ്റംവന്നത്.

ഇപ്പോഴത്തെ ബി.ജെ.പി എഴുത്തുകാരില്‍ ഏറ്റവും പ്രമുഖന്‍ ജനറല്‍ സിക്രട്ടറി രാം മാധവ് ആണ്. മിക്ക പത്രം ഓഫീസുകളിലും കാണപ്പെടാറുള്ള ഇദ്ദേഹം ഒരു മാസം നാലു ലേഖനങ്ങള്‍ എഴുതിയിട്ടുണ്ട്. നിയമമന്ത്രി രാംശങ്കര്‍ പ്രസാദ് മൂന്നു ലേഖനങ്ങള്‍ എഴുതി. ഇംഗ്ലീഷില്‍ ഒരു വാചകമെങ്കിലും എഴുതുമെന്ന് ആരും കുറ്റപ്പെടുത്തിയിട്ടില്ലാത്ത ആഭ്യന്തരമന്ത്രി അമിത് ഷാ 22 ദിവസത്തിനുള്ളില്‍ രണ്ടു ലേഖനങ്ങളെഴുതിയെന്നാണു ഐ.ജെ.ആര്‍ റിപ്പോര്‍ട്ടില്‍ പരിഹസിക്കുന്നത്. കോണ്‍ഗ്രസ് നേതാവ് കപില്‍ സിബലും രണ്ടു ലേഖനം എഴുതിയിട്ടുണ്ട്.


'അഭൂതപൂര്‍വമായ' ജന്മദിനവൂം മാധ്യമ ആഘോഷവും

പ്രധാനമന്ത്രി നരേന്ദ്രമോദിയുടെ 69ാം പിറന്നാള്‍ സപ്തംബര്‍ 17-നായിരുന്നു. പിറന്നാളുകള്‍ അഭൂതപൂര്‍വമല്ല. വര്‍ഷംതോറും സംഭവിക്കുന്നതാണ്. അറുപതും എഴുപതുമൊക്കെ പ്രത്യേകതയുള്ള വയസ്സായാണ് കണക്കാക്കാറുള്ളത്. പ്രധാനമന്ത്രിയ്ക്കു അറുപത്തഞ്ചു തികഞ്ഞത് കാര്യമായൊന്നും കൊണ്ടാടിയിരുന്നില്ല. എന്തുകൊണ്ടെന്നറിയില്ല 69ാം പിറന്നാള്‍ വലിയ സംഭവമായിരുന്നു. മാധ്യമങ്ങളിലാണ് അതു കാര്യമായി ആഘോഷിക്കപ്പെട്ടത്. രാജ്യത്തെ എല്ലാ സംസ്ഥാനങ്ങളിലെയും പ്രധാന മാധ്യമങ്ങളില്‍, കേന്ദ്രമന്ത്രിസഭയിലെ രണ്ടാമന്‍ എന്നു കരുതപ്പെടുന്ന അമിത് ഷായുടെ പ്രത്യേകലേഖനം ഉണ്ടായിരുന്നു. ഒരു ജന്മദിനത്തില്‍ പ്രധാനമന്ത്രിയെ പുകഴ്ത്തി രാജ്യത്തെ ഏറ്റവുമധികം പത്രങ്ങളില്‍ മുഖ്യലേഖനം പ്രസിദ്ധീകരിക്കുന്ന ആദ്യവ്യക്തി അമിത് ഷാ ആയിരിക്കാം.

അമിത് ഷായ്ക്ക്ു പുറമെ വാര്‍ത്താവിതരണ പ്രക്ഷേപണവകുപ്പ് മന്ത്രി പ്രകാശ് ജാവഡേക്കറും പ്രകീര്‍ത്തന ലേഖനങ്ങള്‍ എഴുതാന്‍ നിയോഗിക്കപ്പെട്ടിരുന്നു. മലയാളത്തില്‍ മനോരമ പത്രത്തില്‍ അമിത് ഷായുടെയും മാതൃഭൂമിയില്‍ പ്രകാശ് ജാവഡേക്കറുടെയും ലേഖനങ്ങളാണ് ഉണ്ടായിരുന്നത്. ചെറുകിട പത്രങ്ങളില്‍ ലേഖനമൊന്നും കണ്ടില്ല. ടൈംസ് ഓഫ് ഇന്ത്യ മാത്രം കേന്ദ്രമന്ത്രിമാരുടെ ലേഖനത്തിനു പകരും പ്രത്യേകം നിര്‍ദ്ദേശിച്ച്  സദ്ഗുരു ജഗ്ഗി വാസുദേവ് ആണ് പ്രധാനമന്ത്രിയെക്കുറിച്ച് എഴുതിയത്.

മുമ്പ് ഒരു പ്രധാനമന്ത്രിയുടെയും ജന്മദിനം ഈ രീതിയില്‍ ആഘോഷിക്കപ്പെട്ടതായി ആര്‍ക്കും അറിയില്ല. പൊതുതിരഞ്ഞെടുപ്പിനു മുന്‍പുള്ള മൂന്നു വര്‍ഷക്കാലത്ത് കേന്ദ്രസര്‍ക്കാറിന്റെ പദ്ധതികള്‍ക്കു പ്രചാരം നല്‍കാന്‍ 3800 കോടി രൂപയുടെ പരസ്യം മാധ്യമങ്ങള്‍ക്ക് നല്‍കിയതായി ഇപ്പോള്‍ ലേഖനമെഴുതിയ മന്ത്രി പ്രകാശ് ജാവഡേക്കര്‍ പാര്‍ലമെന്റില്‍ അറിയിച്ചിരുന്നു.
എന്തായാലും അടുത്ത വര്‍ഷത്തെ എഴുപതാം ജന്മദിനം അഭൂതപൂര്‍വമായിത്തന്നെ ആഘോഷിക്കപ്പെടുമെന്ന കാര്യത്തില്‍ സംശയം വേണ്ട.


 ദി ടൈംസ് ഓഫ് ഇന്ത്യ, ദി ഹിന്ദു, ദി ഇന്ത്യന്‍ എക്‌സ്പ്രസ്, ദി ടെലഗ്രാഫ്, ഡക്കാന്‍ ഹെറാള്‍ഡ്, ദി ന്യൂ ഇന്ത്യന്‍ എക്‌സ്പ്രസ് എന്നീ പത്രങ്ങളിലെ ലേഖനങ്ങളാണ് പരിശോധിച്ചത്.  രാഷ്ട്രീയക്കാരുടെ ലേഖനങ്ങള്‍ കൊടുക്കുന്ന കാര്യത്തില്‍ ഏറ്റവും 'മോശം'  നിലപാട് ദി ഹിന്ദുവിന്റെതാണ്. ഉപരാഷ്ട്രപതി വെങ്കയ്യ നായിഡുവിനു മാത്രമാണ് ആ പടി കയറാനായത്. ദി ടെലഗ്രാഫിലും പാര്‍ട്ടി നേതാക്കള്‍ എഴുതിയിട്ടില്ല.

കാല്‍നൂറ്റാണ്ടു മുന്‍പുവരെയും പത്രത്തിലെ ബുദ്ധിജീവികളായ എഡിറ്റര്‍മാരാണ് ദേശീയ- അന്തര്‍ദേശീയ വിഷയങ്ങളെക്കുറിച്ച്്്് പഠനാര്‍ഹമായ ലേഖനങ്ങള്‍ എഴുതാറുള്ളത്. ഇപ്പോള്‍ പല പത്രങ്ങളിലും അത്തരം ബുദ്ധിജീവകള്‍ തീരെ ഇല്ലാത്തതാവാം രാഷ്ട്രീയബുദ്ധിജീവികളെ ആശ്രയിക്കാന്‍ കാരണം. പത്രങ്ങള്‍ക്ക് പുറത്തുള്ള യഥാര്‍ത്ഥ ബുദ്ധിജീവികളെക്കൊണ്ട് എഴുതിക്കാന്‍ പ്രതിഫലം കൊടുക്കേണ്ടതുണ്ട്. പ്രത്യേകിച്ച് പ്രതിഫലമൊന്നും കൊടുക്കാതെ കിട്ടുന്നതാണ് രാഷ്ട്രീയക്കാരുടെ പ്രചാരണസാഹിത്യം. വായനക്കാരന് എന്തു പ്രയോജനം എന്ന് ആരും ചോദിക്കാറില്ല.

തകരുന്ന പത്രങ്ങള്‍, വേരുറക്കാതെ ഓണ്‍ലൈന്‍:
മാധ്യമഭാവി ഇപ്പോഴും അനിശ്ചിതം
നാളെയുടെ മാധ്യമം ഏത്്? ഇപ്പോഴും ഇത്തരം കിട്ടാത്ത ചോദ്യമായി അതു തുടരുന്നു. ഇന്നത്തെ മാധ്യമം ഏത് എന്നതിനെക്കുറിച്ചുപോലും ഉറച്ച ഉത്തരം കിട്ടുന്നില്ല. ഇന്റര്‍നെറ്റ് മാധ്യമങ്ങളില്‍ വാര്‍ത്ത തേടുന്നവരുടെ എണ്ണം അനുദിനം വര്‍ദ്ധിക്കേതന്നെ, ആ വിധം മാധ്യമങ്ങള്‍ക്കും വേരുറക്കുന്നില്ല. ഒരുപാട് ഓണ്‍ലൈന്‍ മാധ്യമങ്ങളും പരമ്പരാഗതമാധ്യമങ്ങള്‍ നേരിടുന്ന തരം പ്രതിസന്ധികളെ നേരിടുന്നു. പോരാത്തതിനു അവരുടെ വാര്‍ത്തകള്‍ക്കു വിശ്വാസ്യത നേടാന്‍ കഴിയുന്നുമില്ല, സ്ഥാപനങ്ങളില്‍ തൊഴില്‍സുരക്ഷിതത്വം നല്‍കാന്‍ കഴിയുന്നില്ല. ഭാവി അനിശ്ചിതം.

ന്യൂ ഓര്‍ലീന്‍സില്‍ ഒക്‌റ്റോബറില്‍ നടക്കുന്ന അമേരിക്കന്‍ ഓണ്‍ലൈന്‍ ന്യൂസ് അസോസിയേഷന്‍ വാര്‍ഷിക സമ്മേളനത്തിനു മുന്നോടിയായി പ്യൂ റിസര്‍ച്ച് സെന്റര്‍ നടത്തിയ സര്‍വെ ഈ അനിശ്ചിതത്ത്വങ്ങളിലേക്കാണ് വിരല്‍ ചൂണ്ടിയത്. പ്രധാന നിഗമനങ്ങള്‍ ചുവടെ ചേര്‍ക്കുന്നു.

കുടുതല്‍ വായന ഓണ്‍ലൈനില്‍
2018-ല്‍ മുതിര്‍ന്ന അമേരിക്കക്കാരില്‍ 34 ശതമാനം പേരും ഓണ്‍ലൈനില്‍ വിവരങ്ങള്‍ അറിയാനാണ് താല്പര്യപ്പെട്ടത്. 2016-ലെ ഇത്തരക്കാരുടെ ശതമാനം 28 ആയിരുന്നതാണ് ഇത്തവണ 34 ആയത്. ഇങ്ങനെ പറയുമ്പോഴും വാര്‍ത്തയുടെ ആദ്യ സ്രോതസ് ടെലിവിഷന്‍ ആയി തുടരുകയാണ് 44 ശതമാനം ആളുകള്‍ക്കും.

പ്രാദേശികവാര്‍ത്തകള്‍ക്കു  രണ്ടും
പ്രാദേശികവാര്‍ത്തകള്‍ വായിക്കാന്‍ ഓണ്‍ലൈന്‍ മാധ്യമങ്ങളെയും ടെലിവിഷനെയും ഏതാണ്ട് ഒരേ പോലെ ആശ്രയിക്കുന്നവരാണ് ഭൂരിപക്ഷം മുതിര്‍ന്ന അമേരിക്കക്കാരും. 37 ശതമാനം വായനക്കാര്‍ ഓണ്‍ലൈന്‍ വഴിയും 41 ശതമാനം പേര്‍ ടെലിവിഷന്‍ ചാനലുകളിലൂടെയുമാണ് പ്രാദേശികവാര്‍ത്തകള്‍ അറിയുന്നത്. ടെലിവിഷനില്‍ പൊതുവാര്‍ത്തകള്‍ അറിയാം.  എന്നാല്‍, ഏതെങ്കിലും പ്രദേശത്തെ ഏതെങ്കിലും പ്രത്യേകവാര്‍ത്ത തെരച്ചില്‍ നടത്തി അറിയാന്‍ എല്ലാവര്‍ക്കും ഇന്റര്‍നെറ്റ് മാധ്യമങ്ങള്‍തന്നെ വേണം.

അനായാസ ഉപയോഗം 
സമയം മെനക്കെടുത്താതെ അതിവേഗം, ക്ലേശരഹിതമായി വാര്‍ത്ത അറിയാന്‍ കഴിയണം എന്നതിനാണ് പത്തില്‍ എട്ടു അമേരിക്കക്കാരും(82ശതമാനം) പ്രാധാന്യം നല്‍കുന്നത്. വളച്ചുകെട്ടിയും സങ്കീര്‍ണത കൂട്ടിക്കലര്‍ത്തിയും വാര്‍ത്ത ദുരൂഹമാക്കുന്ന പ്രവണണയുണ്ട്.  നാട്ടില്‍ നടക്കാന്‍ പോകുന്ന കാര്യങ്ങളെക്കുറിച്ചുള്ള ആര്‍, എപ്പോള്‍, എവിടെ, എങ്ങനെ... തുടങ്ങിയ വിവരങ്ങള്‍ ഒറ്റ വായനയില്‍ അറിയുകയാണ് പ്രധാനം.

തൊഴില്‍ ലഭ്യത ഏറുന്നു, പക്ഷേ
2008-നും 2018-നും ഇടയില്‍ ഓണ്‍ലൈന്‍ മാധ്യമങ്ങളില്‍ പ്രവര്‍ത്തിക്കുന്നവരുടെ എണ്ണം 82 ശതമാനം വര്‍ദ്ധിച്ചതായി സര്‍വെ കണ്ടെത്തി. എന്നാല്‍, പരമ്പരാഗത മാധ്യമങ്ങളില്‍ നഷ്ടപ്പെട്ട തൊഴിലവസരങ്ങളുടെ എണ്ണവുമായി താരതമ്യപ്പെടുത്തുമ്പോള്‍ ഈ വര്‍ദ്ധന നിസ്സാരമാണ്. 33000 തൊഴിലുകള്‍ പത്രങ്ങളില്‍ നഷ്ടപ്പെട്ടപ്പോഴാണ് ഓണ്‍ലൈനില്‍ 7000-13000 തൊഴിലുകള്‍ ഉണ്ടായത്. പരമ്പരാഗതമാധ്യമങ്ങളില്‍ നാലിലൊന്നു തൊഴിലവസരങ്ങളാണ് 2008-18 കാലത്ത് ഇല്ലാതായത്. ലേഓഫ് പോലുള്ള തൊഴില്‍ മുടക്കങ്ങളുടെ കാര്യത്തില്‍ ഇന്റര്‍നെറ്റ് മാധ്യമങ്ങളില്‍ സ്ഥിതി ഒട്ടും ഭേദമല്ലതാനും. പത്രങ്ങളേക്കാള്‍ അനിശ്ചിതവും അപ്രവചനീയവുമാണ് ഓണ്‍ലൈന്‍ മാധ്യമങ്ങളുടെ വരുമാനനില. വായനക്കാരുടെ എണ്ണം ദിവസംതോറും മാറുന്നതുകൊണ്ടു വരുമാനവും അനിശ്ചിതമാകുന്നു. തൊഴില്‍ സുരക്ഷിതത്വം ഒട്ടുമില്ലെന്നു സാരം

 For publication in Media magazine's മീഡിയബൈറ്റ്‌സ് column Nov 2019

Tuesday, 29 October 2019

കുമ്മനം ശ്രീധരന്‍പിള്ള!






കുമ്മനം ശ്രീധരന്‍പിള്ള!

പി.എസ് ശ്രീധരന്‍പിള്ളയും കുമ്മനം രാജശേഖരനായി എന്ന് ചുരുക്കത്തില്‍ പറയാം. ഉപതിരഞ്ഞെടുപ്പുകളുടെ ഫലം വന്ന ഉടന്‍ വരമ്പത്ത് കൂലി കൊടുത്തു. അകത്തുള്ളവര്‍ക്കായാലും പുറത്തുള്ളവര്‍ക്കായാലും വരമ്പത്ത് കൂലി കൊടുക്കുന്ന പാര്‍ട്ടിയാണ് ബി.ജെ.പി. ചീത്തപ്പേരൊന്നുമില്ലാതെ അടങ്ങിയൊതുങ്ങി പ്രവര്‍ത്തിച്ചു പോന്നിരുന്ന കുമ്മനത്തെ പിടിച്ച് സംസ്്ഥാന ബി.ജെ.പി അദ്ധ്യക്ഷനാക്കിയത് എന്തിന് എന്ന് കുമ്മനത്തിനും തിരിഞ്ഞിട്ടില്ല, ശേഷം ബി.ജെ.പി ക്കാര്‍ക്കും തിരിഞ്ഞിട്ടില്ല. ബി.ജെ.പിയിലും സി.പി.എമ്മിലും ഇക്കാര്യത്തില്‍ എതിരു പറയാന്‍ പറ്റില്ല. മേലോട്ടു അടിച്ചു കയറ്റിയാലും ശരി, താഴോട്ട് ചവിട്ടിയിട്ടാലും ശരി വിഡ്ഢിച്ചിരി ചിരിച്ച്്്് പൊടി തട്ടി എഴുന്നേറ്റു പോകാനേ പാടുള്ളൂ. കുമ്മനം അങ്ങനെ മേലോട്ടുള്ള അടിയും വാങ്ങിയിട്ടുണ്ട്, താഴേക്കുള്ള തൊഴിയും വാങ്ങിയിട്ടുണ്ട്. രണ്ടായാലും നമുക്കൊന്നുതന്നെ എന്നു ഭാവിക്കുകയാണ് ഭംഗി. ശ്രീധരന്‍പിള്ള മേലോട്ടുള്ള അടി കിട്ടിയ ഹരത്തിലാണ് ഇപ്പോ്ള്‍.


പലരും വിചാരിക്കുന്നതു പോലെ കണ്ണില്‍ച്ചോരയില്ലാത്ത പാര്‍ട്ടിയല്ല ബി.ജെ.പി. ഗവര്‍ണര്‍ സ്ഥാനമാണ് ശിക്ഷയനുഭവിക്കുന്നവര്‍ പേറേണ്ടത്. ശമ്പളവും മുടിഞ്ഞ ആനുകൂല്യങ്ങളും കിട്ടും. കോണ്‍ഗ്രസ്സുകാരുടെ ഭരണകാലത്ത്, ഗവര്‍ണര്‍ സ്ഥാനത്തിന്റെ സ്ഥിതി എത്ര ദയനീയമായിരുന്നു എന്നൊന്ന് ഓര്‍ത്തുനോക്കൂ. പ്രായാധിക്യം കാരണം വിരമിക്കുന്ന  കുറെ നേതാക്കന്മാരെയാണ് പ്രത്യേക ആംബുലന്‍സില്‍ അങ്ങോട്ടു കയറ്റിയയച്ചിരുന്നത്. വൃദ്ധസദനമായിരുന്ന ഗവര്‍ണര്‍ ഭവനുകളില്‍ സുഖചികിത്സയും മറ്റു സൗകര്യങ്ങളും ഏര്‍പ്പാട് ചെയ്തിരുന്നു. എല്ലാവരുടെ അങ്ങനെ ആയിരുന്നു എന്നല്ല....ഭൂരിപക്ഷവും അങ്ങനെ ആയിരുന്നു എന്നാണ് കവി ഉദ്ദേശിച്ചത്. കെ.ശങ്കരനാരായണനൊക്കെ രണ്ടാമത് പറഞ്ഞ ഗണത്തില്‍ പെട്ടവരാണ്. ഇനിയും ഒരു റൗണ്ട് മഹാരാഷ്ട്ര ഗവര്‍ണര്‍ ആകണമെങ്കിലും റെഡി.


ആ അവസ്ഥ മോദിയുഗത്തില്‍ മാറിയിരിക്കുന്നു. കുമ്മനത്തെയും ശ്രീധരന്‍പിള്ളയെയും പോലുള്ള ഇരുമ്പന്‍ സ്വയംസേവകരെയാണ് അയക്കുന്നത്. ശിഷ്ടകാലം മുഴുവന്‍ അവിടെപ്പോയി സുഖിച്ചു കളയാമെന്ന വ്യാമോഹമൊന്നും ബി.ജെ.പിയില്‍  ആര്‍ക്കും ഇല്ല. കുമ്മനത്തിന് അതൊട്ടുമുണ്ടായിരുന്നില്ല. ഓരോരുത്തരുടെയും സുഖം ഓരോന്നാണ്. കുമ്മനത്തിന് മിസോറംവാസം കഠിനശിക്ഷയായിരുന്നു. ത്രിപുരയില്‍ അധികാരം പിടിച്ചതുപോലെ കുമ്മനം കേരളത്തില്‍ അധികാരം പിടിക്കണമെന്നാവും അമിത് ഷാ ആഗ്രഹിച്ചിരിക്കുക. അതൊന്നും നടന്നില്ല. അതിനാണ് ശിക്ഷ. ആ നിലയ്ക്കാണെങ്കില്‍ ലോക്‌സഭാ തിരഞ്ഞെടുപ്പിലെ ബി.ജെ.പി.യുടെ സമ്പൂര്‍ണപരാജയം അറിഞ്ഞ ഉടനെ പി.എസ് ശ്രീധരന്‍പിള്ളയെ ഗവര്‍ണര്‍ ആക്കേണ്ടതായിരുന്നു. കൂടുതല്‍ നല്ല പെര്‍ഫോമന്‍സ് സംസ്ഥാന നിയമസഭയിലേക്കുള്ള ഉപതിരഞ്ഞെടുപ്പിലാവും എന്നൊരു പ്രതീക്ഷ ബി.ജെ.പി ഹൈക്കമാന്‍ഡിന് ഉണ്ടായിരുന്നോ എന്തോ..ഉണ്ടാകാനിടയുണ്ട്. കേരളമെന്ത് എന്ന് അമിത് ഷാ പ്രഭുതികള്‍ക്ക് ഒരു പിടിയുമില്ല. ഈ തോതില്‍ പോയാല്‍ തുടര്‍ച്ചയായി നാലഞ്ച് സംസ്ഥാന പ്രസിഡന്റു സ്ഥാനക്കാര്‍ക്ക് ഗവര്‍ണര്‍ സ്ഥാനത്തിരിക്കാന്‍ യോഗമുണ്ടാകും. അതുകൊണ്ടാണോ സംസ്ഥാന പ്രസിഡന്റ് സ്ഥാനത്തേക്ക് തിക്കും തിരക്കും കൂടുന്നത് എന്നും അറിഞ്ഞുകൂടാ.


സംസ്ഥാന പ്രസിഡന്റുമാര്‍ വിചാരിച്ചാല്‍ സംസ്ഥാനഭരണം പിടിച്ചെടുത്ത്് പോക്കറ്റിലിട്ടുതരാന്‍ കഴിയുമെന്ന വിശ്വാസം എങ്ങനെയാണ് ആ പാര്‍ട്ടിയെ മാറാരോഗമായി പിടികൂടിയതെന്ന് ആര്‍ക്കറിയാം. പാര്‍ട്ടി തോറ്റാല്‍ പി.സി.സി പ്രസിഡന്റിനെ ഗവര്‍ണരാക്കുന്ന കീഴ് വഴക്കം കോണ്‍ഗ്രസ്സിലുണ്ടായിരുന്നില്ല. അവിടെ പക്ഷേ, ജയിക്കണമെന്നു വലിയ നിര്‍ബന്ധവും ഉണ്ടായിരുന്നില്ലല്ലോ. ചിലര്‍ സ്വമേധയാ രാജിവെക്കുന്ന സമ്പ്രദായം കോണ്‍ഗ്രസ് പാര്‍ട്ടിയിലുണ്ട്. പാര്‍ട്ടി പറയാനൊന്നും മാന്യനേതാക്കന്മാര്‍ ആരും കാത്തുനില്‍ക്കാറില്ല. രാജ്യത്തെമ്പാടും പാര്‍ട്ടി തോറ്റ് നാനാവശേഷമായപ്പോള്‍ എ.ഐ.സി.സി പ്രസിഡന്റ് ആരോടും ചോദിക്കാതെ രാജിവെച്ച് തടി 'കയിച്ചിലാക്കിയ' പാര്‍ട്ടിയാണ് കോണ്‍ഗ്രസ്. പിന്നെ, പഴയ പ്രസിഡന്റായി പുതിയ പ്രസിഡന്റ്. ഇപ്പോള്‍ രാജിവെച്ച പ്രസിഡന്റ് നേടിക്കൊടുത്തതിനേക്കാല്‍ കുറഞ്ഞ സീറ്റ് നേടിക്കൊടുത്ത പ്രസിഡന്റാണ് മുട്ടുശാന്തിയായി വന്നതെങ്കിലും അണികളുടെ ആവേശം മൂര്‍ദ്ധന്യത്തില്‍ എത്തിയിട്ടുണ്ടത്രെ.


തോറ്റ ബി.ജെ.പി പ്രസിഡന്റുമാരെ തുടര്‍ച്ചയായി സഹിക്കാന്‍ മിസോറാം സംസ്ഥാനം ഇതിനു മാത്രം എന്തു പാപമാണ് ചെയ്തത് എന്നു ചോദിക്കുന്നവരുണ്ട്. കുമ്മനത്തിന് കൊടുത്തതിനേക്കാള്‍ കൂടുതല്‍ സുഖവാസശിക്ഷ ശ്രീധരന്‍പിള്ളയ്ക്ക്ു വിധിച്ചിട്ടുണ്ടോ എന്നറിയില്ല. കുമ്മനത്തേക്കാള്‍ തിളങ്ങാനുള്ള ഉരുപ്പടികള്‍ വക്കീലിന്റെ കൈവശമുണ്ട്.  അതു കൊണ്ട് കുറച്ചേറെ അവിടെ നില്‍ക്കേണ്ടി വന്നേക്കാം. ആകെയൊരു അപകടസാധ്യത ഉള്ളത് അദ്ദേഹം വല്ലാതെ പുസ്തകമെഴുതിക്കളയും എന്നുള്ളതാണ്. അതു മിസോറാംകാര്‍ സഹിക്കേണ്ടതില്ല, കേരളീയരാണ് സഹിക്കേണ്ടത്. അനുഭവിക്കട്ടെ....


ഉപാദ്ധ്യക്ഷക്  അബ്ദുള്ളക്കുട്ടി

സി.പി.എം, കോണ്‍ഗ്രസ് തുടങ്ങിയ പാര്‍ട്ടികളിലെ സുഖവാസത്തിനു ശേഷം എത്തിയ എ.പി.അബ്ദുള്ളക്കുട്ടി എന്ന മുന്‍ എം.പിയെ ബി.ജെ.പി അതിന്റെ സംസ്ഥാന ഉപാദ്ധ്യക്ഷ സ്ഥാനത്ത് പ്രതിഷ്ഠിച്ച വാര്‍ത്ത ചിലരെയൊക്കെ ഞെട്ടിച്ചതായി കാണുന്നുണ്ട്. ഞെട്ടേണ്ട കാര്യമില്ല. കഴിഞ്ഞ ലോക്‌സഭ, നിയമസഭ തിരഞ്ഞെടുപ്പുകളില്‍ ആരെയൊക്കെ സ്ഥാനാര്‍ത്ഥികളാക്കി എന്നു നോക്കിയാല്‍ ആരും ഞെട്ടില്ല. അബ്ദുള്ളക്കുട്ടി ഗവര്‍ണര്‍ ആകാനും അദ്ദേഹം സന്നദ്ധനായിരുന്നു. ആള്‍ മഹാത്യാഗിയാണല്ലോ. തത്കാലം ഉപാദ്ധ്യക്ഷയ് മഹോദയ് ആയാല്‍ മതി എന്നാണ് മുകളിലുള്ളവര്‍ കല്‍പ്പിച്ചത്.  

ഉപതിരഞ്ഞെടുപ്പിന്റെ വോട്ടെടുപ്പ് കഴിഞ്ഞതിന്റെയും ഫലം അറിയുന്നതിന്റെയും ഇടയിലെ ഗ്യാപ്പാണ് ആ മഹാസംഭവം പ്രഖ്യാപിക്കാന്‍ നേതാക്കള്‍ തിരഞ്ഞെടുത്തത്. ഇതിനു പ്രത്യേക പ്രാധാന്യമുള്ളതായി കരുതുന്നവരുണ്ട്്്. വോട്ടെടുപ്പിനു മുമ്പ് ഈ വിവരം നാട്ടുകാര്‍ അറിഞ്ഞാല്‍ ബി.ജെ.പിക്കു കിട്ടുന്ന വോട്ടുകൂടി ഇല്ലാതാകുമോ എന്ന ഭയമാണ് ഒരു കാരണമായി പറയപ്പെടുന്നത്. തിരഞ്ഞെടുപ്പ് കഴിയാന്‍ കാത്തുനിന്നാലോ? പ്രസിഡന്റ് തന്നെ ഇല്ലാതാവുന്ന ഘട്ടത്തില്‍ എങ്ങനെ പുതിയ വൈസ് പ്രസിഡന്റിനെ നിയമിക്കും?  എന്തായാലും നല്ല മുഹൂര്‍ത്തത്തില്‍ സംഭവം നടന്നു.


തുടര്‍ന്ന് സാമൂഹ്യമാധ്യമത്തില്‍ ബി.ജെ.പി പ്രവര്‍ത്തകരുടെ വിലാപ-പ്രതിഷേധ പ്രകടനങ്ങള്‍ സാമാന്യം വ്യാപകമായി നടന്നു. പതിറ്റാണ്ടുകളായി രാവും പകലും പാര്‍ട്ടി്ക്കു വേണ്ടി പാഞ്ഞുനടക്കുകയും ഇഷ്്ടംപോലെ അടിയും കുത്തും ഏറ്റുവാങ്ങുകയും ചെയ്തുവരുന്നവരെ അവഗണിച്ചാണ്, വിശ്വസിക്കാന്‍ കൊള്ളാത്ത ഈ കക്ഷിയെ വൈസ് പ്രസിഡന്റായി നിയമിച്ചിരിക്കുന്നത്. എത്ര കാലം പാര്‍ട്ടിയിലുണ്ടാകുമെന്ന് വല്ല ഉറപ്പുമുണ്ടോ..ഇങ്ങനെ പോയി സങ്കടപരിവാറുകാരുടെ പരിദേവനകള്‍.


ഗവര്‍ണര്‍ നിയമനം പോലൊരു ഹൈക്കമാന്‍ഡ് അഭ്യാസമാണ് ഈ നിയമനവും എന്ന്് അവര്‍ക്കറിയാം. സ്ഥിതിവിവരക്കണക്ക് അനുസരിച്ച്്, കേരളത്തില്‍ ബി.ജെ.പിക്കു നാലു സീറ്റുകിട്ടാന്‍തന്നെ പ്രയാസമാണ്. മറ്റു സംസ്ഥാനങ്ങളില്‍ ഹിന്ദു വോട്ടിന്റെ ഏതാണ്ട് മുപ്പതു ശതമാനം കിട്ടിയാല്‍ ഭൂരിപക്ഷം സീറ്റ് കൈയ്യിലാക്കാം. ഇവിടെ അതു നടക്കില്ല. കാരണം, ഹിന്ദുവോട്ടുതന്നെ പാതിയില്‍ കുറച്ചേറെയേ ഉള്ളൂ. അതുകൊണ്ട് ക്രിസ്ത്യന്‍, മുസ്ലിം വോട്ട് വേണം. പരീക്ഷിച്ചിടത്തോളം പ്രയോജനമൊന്നും കാണാനില്ല. അമിത് ഷാജിമാര്‍ക്ക് അറിയാത്ത മറ്റൊരു കണക്കാണ് ഇത്. കാലേ അരക്കാല്‍ മുസ്ലിം വോട്ടേ ബി.ജെ.പി പെട്ടിയില്‍ വീഴാറുള്ളൂ. ചിലരെ പാര്‍ട്ടിയിലെടുത്താല്‍ അതും കിട്ടാതാവുമോ എന്തോ. കാത്തിരുന്നു കാണാം.  

Tuesday, 22 October 2019

ശരിദൂരം ശരികേടുദൂരം

അപശബ്ദം
എന്‍പിയാര്‍


ശരിദൂരം ശരികേടുദൂരം

ജി.സുകുമാരന്‍ നായരുടെ കൈവശം വോട്ട് എത്രയുണ്ടെന്നു ആര്‍ക്കുമറിയില്ല. ഇമ്മിണി ഉണ്ടെന്നാണ് എല്ലാവരുടെയും വിശ്വാസം. വിശ്വാസത്തിനു തെളിവു ചോദിക്കരുത്. എന്‍.എസ്.എസ്്, എസ്.എന്‍.ഡി.പി വോട്ടിന്റെ സാന്നിദ്ധ്യം കണ്ടെത്താനുളള ഉപകരണങ്ങള്‍ ശാസ്ത്രജ്ഞര്‍ ഇതുവരെ കണ്ടുപിടിച്ചിട്ടില്ല. ഇവര്‍ രണ്ടു കൂട്ടരും പണ്ടെന്നോ പാര്‍ട്ടികള്‍ ഉണ്ടാക്കിയെന്നും കെട്ടിവച്ചത് തിരിച്ചുകിട്ടാന്‍ മാത്രം വോട്ടില്ലെന്ന് സ്വയം തിരിച്ചറിഞ്ഞ് ധീരമായി പിന്‍വാങ്ങിയെന്നും ചരിത്രത്തിലുണ്ട്. അതെന്തായാലും ശരി, ഇത്തവണയും പോളിങ്ങിനു മുന്‍പ് വാര്‍ത്തകളില്‍ സുകുമാരന്‍ നായരാണ് നിറഞ്ഞുനിന്നത്. വെള്ളാപ്പള്ളിയേക്കാള്‍ തിളങ്ങി.

എല്‍.ഡി.എഫിനും യു.ഡി.എഫിനും ഇടയില്‍ സ്‌കെയില്‍ വച്ചളന്ന് കൃത്യ അകലത്തില്‍ പോസ്റ്റ് നാട്ടിയായിരുന്നു കുറെക്കാലമായി പാര്‍പ്പ്. എങ്കിലും, പെരുന്നയില്‍ വന്ന് യഥാവിധി കാണുന്നവര്‍ക്ക് കൈയ്യിലുള്ളത് കൊടുക്കാറുണ്ട്. ഇരുപക്ഷക്കാരും പോകും. ആര്‍ക്ക് കൊടുത്തു, എത്ര കൊടുത്തു എന്നു സുകുമാരന്‍നായര്‍ക്കു പോലും പറയാന്‍ പറ്റില്ല. അങ്ങനെ സമദൂരം സുകുമാരന്‍നായര്‍ക്കു മാത്രം ഗുണമേകി  തുടരുമ്പോഴാണ് ശബരിമലയില്‍ അരുതാത്തതു സംഭവിച്ചത്.

സ്ത്രീപ്രവേശനത്തിനെതിരെ ആദ്യം ഇറങ്ങിയ എന്‍.എസ്.എസ്സാണ് എന്നു രേഖകൡ കാണുന്നുണ്ട്. പെട്ടന്നു പ്ലേറ്റ് മാറ്റി സംഘപരിവാറും ചാടി വീണ് പരമാവധി കോപ്രായം കാട്ടിയത് നായര്‍ക്ക് ഒട്ടും പിടിച്ചിട്ടില്ല. കേന്ദ്രം ഭരിക്കുന്ന പാര്‍ട്ടി അതാണോ ചെയ്യേണ്ടത്? കേരളം പരമാവധി കുട്ടിച്ചോറാക്കാനാണ് അവര്‍ നോക്കിയത്. അമിത് ഷാജി അറുത്ത കൈക്കു ഉപ്പുതേക്കില്ല. ശബരിമല പ്രശ്‌നത്തോടെ സുകുമാരന്‍ നായര്‍ എന്തായാലും ഇങ്ങോട്ടുതിരിയും എന്നാണ് ദല്‍ഹി രാജാക്കന്മാര്‍ ധരിച്ചത്. സുകുമാരന്‍ നായരെ അവര്‍ക്ക് മനസ്സിലായിട്ടില്ല. എല്ലാവരെയും ഡല്‍ഹിക്കു വിളിക്കുന്ന പതിവേ ഉള്ളൂ അമിത് ഷാജിക്ക്. ഡല്‍ഹിക്കാരെ ഇങ്ങോട്ടു വിളിക്കാറേ ഉള്ളൂ സുകുമാരന്‍ നായര്‍. കോണ്‍ഗ്രസ്സുകാര്‍തന്നെ ഭേദം. മണ്ണും ചാരി നിന്നല്ലാതെ വേറെ ശരികേടൊന്നും ചെയ്തില്ലല്ലോ.

ജി.സുകുമാരന്‍ നായര്‍ പണ്ടേ യു.ഡി.എഫ് ആണ് എന്നാണ് കോടിയേരി ബാലകൃഷ്ണന്‍ പറയുന്നത്. ചില മുന്തിരങ്ങ പുളിക്കും. രമേശ് ചെന്നിത്തല എന്‍.എസ്.എസ്സിന്റെ അദൃശ്യ അസി.സിക്രട്ടറിയാണ് എന്നൊരു കരവര്‍ത്തമാനവും നിലവിലുണ്ട്. ആയതിനാല്‍, ഉപതിരഞ്ഞെടുപ്പുകളില്‍ വോട്ട് യു.ഡി.എഫിനാണ് കൊടുത്തത്. യു.ഡി.എഫ് ജയിച്ചാല്‍ അതു സുകുമാരന്‍ നായരുടെ ശക്തി, തോറ്റാല്‍ ചെന്നിത്തലയുടെ ശക്തിക്കുറവ്. വരുന്നേടത്തു വച്ചു കാണാം.

സി.പി.എം നൂറു നോട്ടൗട്ട്
നൂറിന്റെ നിറവില്‍ എന്നാണ് പത്രഭാഷ. സി.പി.എം ആ അവസ്ഥയിലാണ്. രണ്ടു ജന്മവാര്‍ഷികം ആഘോഷിക്കാന്‍ ഭാഗ്യമുള്ള പാര്‍ട്ടിയാണ് ഇത്. മനുഷ്യരെപ്പോലെയല്ല, പാര്‍ട്ടികള്‍ക്ക്് പലവട്ടം ജനിക്കാനാവും. സോഷ്യലിസ്റ്റ് പാര്‍ട്ടികള്‍ ഡസന്‍വട്ടം ജനിച്ചിട്ടുണ്ട്. വിശദാംശങ്ങള്‍ എം.പി വീരേന്ദ്രകുമാര്‍ കൈവശം കാണും.

1964 ഒക്‌റ്റോ.-നവംബര്‍ സമ്മേളനത്തിലാണ് സി.പി.എം ജനിച്ചതെന്ന് പാര്‍ട്ടി ജാതകത്തിലുണ്ട്. അമ്പതാം വയസ്സ് 2014-ഒക്‌റ്റോബറില്‍ ആഘോഷിച്ചതിന്റെ വിവരങ്ങള്‍ പാര്‍ട്ടി വെബ്‌സൈറ്റില്‍ കാണാം. ഇപ്പോഴിതാ പാര്‍ട്ടി ജനിച്ചതിന്റെ നൂറാം വാര്‍ഷികം ആഘോഷിക്കുന്നു!  പാര്‍ട്ടി മുഖപത്രം രണ്ടു ഫുള്‍പേജുകളില്‍ അതിന്റെ ഓര്‍മ പുതുക്കുന്നുണ്ട്. 2014-ല്‍ അമ്പതു വയസ്സായ പാര്‍ട്ടിയ്ക്ക് എങ്ങനെ 2019-ല്‍ നൂറുവയസ്സാവും എന്നാരും ചോദിക്കരുത്.


സി.പി.ഐ എന്ന ഒറിജിനല്‍ പാര്‍ട്ടിയില്‍ നിന്നു പിളര്‍ന്നു പിരിഞ്ഞാണ് സി.പി.എം ഉണ്ടായതെന്ന കാര്യം ആ ഇരട്ടപ്പേജ് ലേഖനങ്ങളിലൊരിടത്തും ഭൂതകണ്ണാടി വച്ച് നോക്കിയവര്‍ക്കും കാണാനായില്ല. 2014-ല്‍ അമ്പതാം വാര്‍ഷികത്തിന് പീപ്പ്ള്‍സ് ഡമോക്രസിയില്‍ എഴുതിയ ലേഖനത്തില്‍ പ്രകാശ് കാരാട്ട് പണ്ട് പാര്‍ട്ടി വിട്ടതിന്റെ കഥയൊക്കെ വിവരിച്ചിട്ടുണ്ട്. യച്ചൂരി അതൊന്നു മിണ്ടുന്നില്ല.

എന്തേ സി.പി.ഐ ജന്മശതാബ്ദി  ആഘോഷിക്കുന്നില്ല? ഒരു ചുക്കും അറിയാത്ത ചിലര്‍ ചോദിക്കുന്നുണ്ട്. പാര്‍ട്ടി എന്നു ജനിച്ചു എന്ന കാര്യത്തില്‍പ്പോലും ഭിന്നിപ്പുള്ള വേറെ പാര്‍ട്ടി ലോകത്തില്ല 1920-ല്‍ താഷ്‌കെന്റില്‍ ഗ്രൂപ്പ് യോഗം നടത്തിയ തിയ്യതിയാണ് സി.പി.എം കണക്കാക്കുന്നത്. 1925 ഡിസംബര്‍ 26 ന് കാണ്‍പൂരിലാണ് ജനിച്ചതെന്ന് സി.പി.ഐയും കണക്കാക്കുന്നു. സി.പി.ഐക്ക് നൂറു തികയാന്‍ ഇനിയും വര്‍ഷം അഞ്ചു കഴിയണമെന്നര്‍ത്ഥം. ജനനം മുതലുള്ള ഭിന്നതകള്‍ തീരാതെങ്ങനെയാണു ഈ പാര്‍ട്ടികള്‍ തമ്മില്‍ ലയിച്ചൊന്നാകുക?  എന്തായാലും ഇരുനൂറാം വാര്‍ഷികത്തിനു മുന്‍പെങ്കിലും ഈ ഭിന്നതകളെല്ലാം പരിഹരിക്കുമായിരിക്കും. ധൃതിയില്ലല്ലോ.

നില വിടുന്ന ഡോവല്‍
അജിത് കുമാര്‍ ഡോവലിനെ കശ്മീരുകാര്‍ മാത്രമല്ല, നമ്മളും പേടിക്കണം എന്ന നില വന്നിട്ടുണ്ട്. അമിത് ഷാജി ഇന്ത്യാചരിത്രം തിരുത്തുന്ന തിരക്കിലാണ്. ഡോവലാണ് ശരി ആഭ്യന്തരമന്ത്രി. പാകിസ്താനില്‍ നടത്തിയ സര്‍ജിക്കല്‍ സ്്‌ട്രൈക്ക് മാത്രമല്ല, കശ്മീരിലെ രണ്ടു മാസം കഴിഞ്ഞിട്ടും തീരാത്ത സര്‍ജിക്കല്‍ സ്്‌ട്രൈക്കും അജിത് ഡോവലിന്റെ ഐഡിയ ആണത്രെ.
 ജഡ്ജിമാര്‍ എങ്ങനെ കേസ് കൈകാര്യം ചെയ്യണം, പത്രങ്ങള്‍ എങ്ങനെ റിപ്പോര്‍ട്ട് ചെയ്യണം തുടങ്ങിയ കാര്യങ്ങളിലാണ്  ഡോവല്‍ ഇപ്പോള്‍ ശ്രദ്ധ കേന്ദ്രീകരിക്കുന്നത്. ചില ഉപദേശങ്ങള്‍ അദ്ദേഹം രണ്ടു കൂട്ടര്‍ക്കും നല്‍കുന്നുണ്ട്. തലസ്ഥാനത്ത് വലിയൊരു സുരക്ഷാസമ്മേളനത്തില്‍ പ്രസംഗിച്ചപ്പോള്‍ ഡോവലിന്റെ ജുഡീഷ്യല്‍, ഫോര്‍ത്ത് എസ്റ്റേറ്റ്്് ചിന്തകള്‍ ചിറകു വിടര്‍ത്തി്.

മാധ്യമങ്ങളില്‍ വാര്‍ത്ത വരുന്നതു കൊണ്ടാണ് ഭീകരര്‍ ഭീകരപ്രവര്‍ത്തനം നടത്തുന്നതെന്നും മാധ്യമങ്ങള്‍ ബ്ലാക്കൗട് ചെയ്താല്‍ പിന്നെ അവര്‍ ആ പണി ചെയ്യില്ല എന്നുമാണ് ഡോവലിന്റെ വിദഗ്ദ്ധാഭിപ്രായം. അതുകൊണ്ട്, മേലില്‍ മാധ്യമങ്ങള്‍ സ്വയംസെന്‍സര്‍ഷിപ്പ് നടപ്പാക്കണമെന്നൊന്നും അദ്ദേഹം പറഞ്ഞിട്ടില്ല കേട്ടോ. അദ്ദേഹത്തിന്റെ ഈ ഉപദേശമാകാം ജമ്മു കശ്മീരിലെ മീഡിയ സര്‍ജിക്കല്‍ സ്‌ട്രൈക്കിന് കാരണമെന്ന് നമ്മളെപ്പോലുള്ള വിവരദോഷികള്‍ ധരിച്ചാല്‍ കുറ്റപ്പെടുത്തരുത്.

ജുഡീഷ്യറിയുടെ കാര്യമാണ് ഇതിലേറെ കഷ്ടം. ഒരുത്തന്‍ ഭീകരനാണ്, ബോംബ് വച്ച് പത്തുപേരെ കൊന്നു എന്നു പൊലീസ് പറഞ്ഞാലൊന്നും ജഡ്ജിമാര്‍ വിശ്വസിക്കില്ല. എവിടെ സാക്ഷി, എവിടെ തെളിവ് എന്നെല്ലാം ചോദിക്കും. ഭീകരര്‍ക്കെതിരെ തെളിവ് നല്‍കാനുണ്ടോ ആരെങ്കിലും വരുന്നു! ആരും വരില്ല. ഭീകരര്‍ക്കെതിരായ കേസ്സും സിംപ്ള്‍ ക്രിമിനലുകള്‍ക്കെതിലായ കേസ്സും ജുഡീഷ്യറി വേറിട്ടുകാണണം. തെങ്ങു കയറാനും കവുങ്ങ് കയറാനും ഒരേ സൂത്രം പോര.

എന്തു ചെയ്യാം. ഈ ഭരണഘടനയും നിയമവുമൊക്കെ എഴുതിപ്പിടിച്ചതു ഭീകരന്മാരെ കണ്ടിട്ടുപോലുമില്ലാത്തവരാണ്. വിചാരണ കൂടാതെ ശിക്ഷിക്കരുത്, നിയമം അനുസരിച്ചേ എന്തും ചെയ്യാവൂ, പൊലീസ് അല്ല ജുഡീഷ്യറിയാണ് വിചാരണ നടത്തേണ്ടത് തുടങ്ങിയ പാശ്ചാത്യ ആശയങ്ങള്‍ നെഹ്‌റുവും അംബേദ്കറും മറ്റുംചേര്‍ന്ന് എഴുതിച്ചേര്‍ത്തതാണ്. ഒന്നു നോക്കിയാല്‍ ഈ ജനാധിപത്യം തന്നെ ഒരു മണ്ടന്‍ പാശ്ചാത്യ ആശയമാണ്. ഇതിനെല്ലാമുള്ള ഭാരതീയപരിഹാരം ഇന്ത്യാചരിത്രത്തില്‍ കണ്ടെത്താന്‍ ആളെ വിട്ടിട്ടുണ്ട്.  ഡോവല്‍ജി അതിന്റെ റിപ്പോര്‍ട്ടുമായി ഉടനെ വരുന്നതായിരിക്കും.

മുനയമ്പ്
മുന്‍പ്‌ യു.ഡി.എഫുകാരനായിരുന്നതിന്റെ ചില ദൂഷ്യങ്ങള്‍ തന്നിലവേഷിക്കുന്നുണ്ടാവാം എന്നു മന്ത്രി കെ.ടി. ജലീല്‍.
* ബൂര്‍ഷ്വാ ദൂഷ്യങ്ങള്‍ക്ക് എക്‌സ്‌പൈറി ഡേറ്റ് ഇല്ല. ആജീവനാന്തം ഉണ്ടാകും.

Tuesday, 15 October 2019

വിവരാവകാശ ശല്യക്കാര്‍



വിവരാവകാശ ശല്യക്കാര്‍



മാതൃകപരമാവണം മുഖ്യമന്ത്രിയുടെ ഓഫീസ് പ്രവര്‍ത്തനം എന്നു വിചാരിക്കുന്ന ചില നിഷ്‌കളങ്കരുണ്ട്. എന്നു വച്ചാല്‍ ആ ഓഫീസ് പ്രവര്‍ത്തനത്തിന്റെ മാതൃക കേമമാണെങ്കില്‍ സംസ്ഥാനത്തെ മുഴുവന്‍ സര്‍ക്കാര്‍ ഓഫീസും അതുപോലെ ജാഗ്രത്തായി പ്രവര്‍ത്തിക്കുമല്ലോ. അത്രയേ ഉള്ളൂ. വേറെ ദുരുദ്ദേശ്യമൊന്നുമില്ല.

വിവരാവകാശം തലയില്‍ കയറിയ ചില ആളുകള്‍ തങ്ങള്‍ക്ക് ചോദിക്കാവുന്നതില്‍ വച്ചേറ്റവും മണ്ടത്തരം നിറഞ്ഞ ചോദ്യങ്ങല്‍ കണ്ടുപിടിച്ച് അടുത്തു കാണുന്ന സര്‍ക്കാര്‍ ഓഫീസിലേക്കു പാഞ്ഞുചെല്ലുന്ന സമ്പ്രദായം നാട്ടില്‍ പരക്കെ ഉള്ളതായ ചിലര്‍ പറയുന്നുണ്ട്. ഇതു നിയമസഭയിലെ ചില അംഗങ്ങളില്‍നിന്നു പഠിച്ചതാണെന്നൊരു സംസാരവും ഉണ്ട്. ഒരു നിയമസഭാംഗം സഭാസമ്മേളനത്തില്‍ ഇത്ര ചോദ്യം ചോദിക്കണം എന്നൊന്നും വ്യവസ്ഥയില്ലെങ്കിലും ഇടക്കിടെ വല്ലതും ചോദിക്കുന്നതാണ് കീഴ്വഴക്കം. വിവരാവകാശചോദ്യങ്ങളേക്കാള്‍ കിടിലന്‍ ചോദ്യങ്ങള്‍ നിയമസഭയിലും ചോദിക്കാറുണ്ട്. ഇതാ ഒരു സാമ്പിള്‍-കേരളത്തിലെ റോഡുകളില്‍ ഓരോ ദിവസവും എത്ര പേര്‍ കാല്‍നടയായി സഞ്ചരിക്കാറുണ്ട്? ഇങ്ങനെ ഒരു ചോദ്യം കിട്ടിയാല്‍ സെക്രട്ടേറിയറ്റ്് ഭരണക്കാര്‍ വെട്ടിലാവും എന്നൊന്നും ഭയപ്പെടേണ്ട. അത്തരം ചോദ്യങ്ങള്‍ക്ക്  ഉത്തരം പറയുക എളുപ്പമാണ്. വിവരം ശേഖരിച്ചു വരുന്നു എന്ന മറുപടി കിട്ടിയാല്‍ ആ നിയമസഭയുടെ കാലാവധി വരെ പിന്നെ പേടിക്കേണ്ട. വിവരം ശേഖരിക്കാന്‍ കാലാവധിയൊന്നും പറഞ്ഞിട്ടില്ലല്ലോ.

പക്ഷേ, വിവരാവകാശ ചോദ്യത്തിന് നിയമസഭാ ചോദ്യത്തേക്കാള്‍ കടുപ്പം കൂടുതലുണ്ട്. നേരാംവണ്ണം മറുപടി പറഞ്ഞില്ലെങ്കില്‍ ഉദ്യോഗസ്ഥന്റെ പിടലിക്ക് നല്ല പിഴ ഉള്‍പ്പെടെ പല ശിക്ഷകളും വന്നു വീഴും. ശിക്ഷ കിട്ടിയവരുടെ എണ്ണം എത്ര എന്നറിയില്ല. വേണമെങ്കില്‍ വിവരാവകാശപ്രകാരം ഒരു കടലാസ് കൊടുക്കാവുന്നതേ ഉള്ളൂ. നിയമസഭയിലെ ഉത്തരം മോശമായി എന്നു പറഞ്ഞ്് ഇക്കാലംവരെ ഒരാളെപ്പോലും ശിക്ഷിച്ചിട്ടില്ല എന്നാണ് അറിവ്. ഇതിനും ചോദ്യം കൊടുക്കാം. ലോകത്തിലേക്ക് വച്ചേറ്റവും മികച്ച വിവരാവകാശ നിയമമാണത്രെ നമ്മുടേത്. അത്ര നന്നാവേണ്ട എന്ന അഭിപ്രായമാണ് മോദിജിയുടെ സര്‍ക്കാറിനുള്ളത്. രണ്ടാംവട്ട വരവില്‍ ആദ്യം ചെയ്ത ഒരു കാര്യം ആ നിയമത്തിന് നല്ലൊരു അടി കൊടുക്കുകയായിരുന്നു. ജീവന്‍ പോയിട്ടില്ല. അതു ഘട്ടം ഘട്ടമായി ശരിയാക്കിക്കൊള്ളും.

കേരളത്തിലായാലും കേരളത്തിലായാലും ഭരണം ഭരണം തന്നെയാണല്ലോ. ഇടതുപക്ഷക്കാര്‍ക്ക്-പ്രത്യേകിച്ച് കമ്യൂണിസ്റ്റുകാര്‍ക്ക്-വിവരാവകാശ നിയമത്തെക്കുറിച്ച് വലിയ സൈദ്ധാന്ത്കി നിലപാടുകളൊന്നുമില്ല. കമ്യൂണിസ്റ്റ് രാജ്യങ്ങളിലെവിടെയെങ്കിലും വിവരാവകാശ നിയമമുണ്ടായതായി  അറിവില്ല. ഇത്തരം നിയമങ്ങളെല്ലാം ബൂര്‍ഷ്വാ ചപ്പടാച്ചികളാ കരുതിയിരിക്കാനേ തരമുള്ളൂ. പക്ഷേ, പാര്‍ട്ടി പ്രതിപക്ഷത്താണ് ഇരിക്കുന്നതെങ്കില്‍ നിയമം കൊള്ളാം എന്നൊരു അഭിപ്രായം സഖാക്കള്‍ക്കുണ്ട്. ഭരണത്തിലാണെങ്കില്‍ സംഗതി ശല്യാണ്, വല്ലാതെയങ്ങ് പ്രോത്സാഹിപ്പിക്കേണ്ട കാര്യമൊന്നുമില്ല, അല്ലേ സഖാവേ? നേരത്തെ പറഞ്ഞ തരം വിവരാവകാശ ശല്യക്കാര്‍ സംസ്ഥാന സര്‍ക്കാറിന്റെ സല്‍ഭരണത്തെ അപകീര്‍ത്തിപ്പെടുത്താന്‍ നോട്ടമിടുന്നതായി വിവരം കിട്ടിയതിന്റെ അടിസ്ഥാനത്തില്‍ അത്തരക്കാര്‍ക്ക് ഉരുളക്കുപ്പേരി ടൈപ്പ് മറുപടികള്‍ കൊടുത്തു തുടങ്ങിയിട്ടുണ്ട്. മുഖ്യമന്ത്രിയുടെ ഓഫീസിനെ മാതൃകയാക്കി മറ്റ് ഓഫീസുകളില്‍ ഇതു അനുകരിക്കാവുന്നതാണ്. അതിന്റെ സാമ്പിളുകള്‍ ഒരു ഭൂലോക ബൂര്‍ഷ്വ പത്രത്തില്‍ പ്രസിദ്ധീകരിച്ചിട്ടുണ്ട്.(പത്രത്തിന്റെ പേരു പറയില്ല എന്നതാണ് കീഴ്വഴക്കം. എന്തായാലും ഈ പത്രത്തിലല്ല) 

മൂന്നു ഉരുളന്‍ ചോദ്യങ്ങള്‍ക്കുള്ള ഉപ്പേരി മറുപടികള്‍ ചുവടെ:
ചോ: യൂറോപ്യന്‍ രാജ്യങ്ങളില്‍ മുഖ്യമന്ത്രി സന്ദര്‍ശനം നടത്തിയപ്പോള്‍ എത്ര ധാരണപത്രം ഒപ്പിട്ടു?
ഉ: ഇവിടെ അറിയില്ല. ചീഫ് സിക്രട്ടറിയുടെ ഓഫീസില്‍ ചോദിക്കൂ

ചോ: നാം മുന്നോട്ട് എന്ന പരിപാടിയുടെ ചെലവെത്ര?
ഉ: പി.ആര്‍.ഡി ഓഫീസില്‍ ചോദിക്കൂ

ചോ: വെള്ളപ്പൊക്കത്തില്‍ അകപ്പെട്ട എത്ര പേര്‍ക്ക് പതിനായിരം രൂപ നല്‍കി, എത്ര പേര്‍ക്ക് ചികിത്സസഹായം നല്‍കി?
ഉ: റവന്യൂ വകുപ്പില്‍ ചോദിക്കൂ

ഈ ജാതി ഇഷ്ടംപോലെയുണ്ട് പത്രത്തിലെ ചോദ്യോത്തര പംക്തിയില്‍.

വിവരാവകാശ ചോദ്യത്തിനു ഒരു ഓഫീസില്‍ ഉത്തരം ലഭ്യമല്ലെങ്കില്‍ അത് ലഭ്യമാകുന്ന ഓഫീസിലേക്ക് ചോദ്യം കൈമാറുകയും വിവരം ചോദ്യകര്‍ത്താവിനെ അറിയിക്കുകയും ചെയ്യണമെന്നു നിയമത്തില്‍ വ്യവസ്ഥയുണ്ടത്രെ. ഏത്് ഓഫീസിലാണ് ചോദിക്കേണ്ടത് എന്ന് അറിയിച്ചിട്ടുണ്ടല്ലോ. പോയി വേറെ പണി നോക്ക് എന്നൊന്നും പറഞ്ഞിട്ടില്ലല്ലോ. ആ നിലയ്ക്ക് മു.ഓഫീസ് നല്‍കിയ ഉത്തരത്തിലെ കല്പന അനുസരിച്ചാല്‍ എന്താണ് ചേതം?

ബാലിശം, വെറുംശല്യം, അപ്രസക്തം എന്നീ യോഗ്യതകളുള്ള ചോദ്യങ്ങള്‍ക്ക് മറുപടി നല്‍കേണ്ടതില്ല എന്നൊരു വകുപ്പ് ചേര്‍ക്കാന്‍ മുമ്പ് കേന്ദ്രത്തില്‍ ശ്രമം നടന്നിരുന്നു. അതൊന്നും നടന്നില്ല. ഇപ്പോള്‍ അതിനു പറ്റിയ കാലാവസഥ രൂപപ്പെട്ടിട്ടുണ്ട്. യു.പി.എ കാലമല്ല, എന്തു ചെയ്യാനും മടിയില്ലാത്ത മോദിജി, ഷാജി ഭരണമാണ്. ആവശ്യമായ ഭേദഗതി വന്നാല്‍ ഒരു വിധപ്പെട്ട ചോദ്യങ്ങളെയെല്ലാം ഒന്നുകില്‍ ബാലിശം, അല്ലെങ്കില്‍ അപ്രസക്തം, അതുമല്ലെങ്കില്‍ വെറുംശല്യം പട്ടികയില്‍ പെടുത്തി അപ്പംതന്നെ കില്‍ ചെയ്യാവുന്നതേ ഉള്ളൂ. ചോദ്യം വെറും ശല്യമാണോ ബാലിശമാണോ എന്നൊക്കെ തീരുമാനിക്കേണ്ടത് ചോദ്യം ചോദിക്കുന്നവനല്ല, ഉത്തരം പറയുന്നവനാണ് എന്നൊരു ഉപവകുപ്പ് കൂടി വേണം കേട്ടാ. അതുണ്ടെങ്കില്‍ ചോദ്യത്തെ മാത്രമല്ല, നിയമത്തെത്തന്നെ കില്‍ ചെയ്യാം, കുഴിച്ചിടുകയും ചെയ്യാം.

കടപ്പുറത്തെ  മിടുക്ക്  
പ്രധാനമന്ത്രി രാവിലെ നടത്തം നടത്തിയേക്കാന്‍ സാധ്യതയുള്ള കടലോരമായിട്ടും, സുരക്ഷാസേനാംഗങ്ങള്‍ ഓരോ ഇഞ്ചും അരിച്ചു പെറുക്കുന്ന പ്രദേശമായിട്ടും പ്രധാനമന്ത്രിക്കു പെറുക്കാന്‍ ആവശ്യമായത്ര നല്ല വൃത്തിയുള്ള കുപ്പികളും പ്ലാസ്റ്റിക് ഷീറ്റുകളും മറ്റും ഉണ്ടായിരുന്നത് വളരെ ബുദ്ധിപൂര്‍വം ആയി എന്ന കാര്യത്തില്‍ സംശയം വേണ്ട. അതുവഴി സുരക്ഷാസൈനികര്‍ അഡ്വാന്‍സ് പോയിരുന്നുവെങ്കില്‍ ബുദ്ധിശൂന്യന്മാര്‍ അതെല്ലാം പെറുക്കിക്കളയുമായിരുന്നു. അതും ഒഴിവാക്കിയല്ലോ. ഭാഗ്യം.

പാശ്ചാത്യരാജ്യങ്ങളിലൊക്കെ ഇങ്ങനെ ഒരേര്‍പ്പാട് ഉണ്ടത്രെ. രാവിലെ നടക്കാന്‍ പോകുമ്പോള്‍ ഒരു സഞ്ചി കൈയില്‍ കരുതുക. എന്നിട്ട് വഴിയില്‍ കാണുന്നതെല്ലാം പെറുക്കിയെടുക്കുക. അവിടെ പെറുക്കാന്‍ വല്ലതും കിട്ടിയാല്‍ ഭാഗ്യമായി എന്നേ കരുതാന്‍ പറ്റൂ. ഇതു ചെയ്യുന്നതിനു ഒപ്പം ഫോട്ടോഗ്രാഫര്‍മാരെ കൂട്ടാറുണ്ടോ, ഫോട്ടോ ട്വിറ്ററില്‍ ഇടാറുണ്ടോ എന്നൊന്നും വ്യക്തമല്ല. നമ്മുടെ കേരളത്തിലും രാവിലെ നടപ്പിന് സഞ്ചി കരുതുന്ന മിടുക്കന്മാര്‍ ഉണ്ട്്. പക്ഷേ, വീട്ടിലെ വെയ്സ്റ്റ് ആണ് കൈയില്‍ കരുതാറുള്ളത്-വഴിയില്‍ കളയാന്‍. പ്രധാനമന്ത്രിയുടെ സന്ദേശം ഉള്‍ക്കൊണ്ട് നാളെ മുതല്‍ മോദി രസികര്‍ മന്റ്രത്തില്‍ പെട്ടവര്‍ ചെന്നൈയിലെങ്കിലും പെറുക്ക് തുടരുമെന്നാണ് കരുതേണ്ടത്. കേരളത്തില്‍ അതിനു സാധ്യതയില്ല. ഇവിടെ നടക്കാന്‍ പോകുന്ന ഓരോ കിലോമീറ്ററെങ്കിലും വേസ്റ്റ് ശേഖരിക്കണമെങ്കില്‍ സഞ്ചിയൊന്നും പോര, പെട്ടി ഓട്ടോ എങ്കിലും വേണ്ടിവരും. 

വ്യക്തിപ്രഭാവ നിര്‍മിതിയാണ്, ജാഡയാണ്, അഭിനയമാണ്, ആളെപ്പറ്റിക്കലാണ് എന്നെല്ലാം കുറ്റം പറയുന്ന അസൂയാലുക്കള്‍ നാട്ടില്‍ ധാരാളമുണ്ട്.് അവരെയൊന്നും വിലവെക്കാതെ മോദിജി മുന്നോട്ടു പോകട്ടെ. അടുത്ത യാത്രയിലെ ഐറ്റം ഇപ്പോള്‍തന്നെ പ്ലാന്‍ ചെയ്യണം. ഈ സാമ്പത്തികമാന്ദ്യത്തിനും മറ്റനവധി  മോശം വാര്‍ത്തകള്‍ക്കുമിടയില്‍ ഇങ്ങനെ ചിലതെങ്കിലും ഉണ്ടാകട്ടെ ജനത്തിന് ഒന്നു സന്തോഷിക്കാന്‍....

മുനയമ്പ്
ഉപതിരഞ്ഞെടുപ്പില്‍ എസ്.എന്‍.ഡി.പി. യോഗം ഒരു മുന്നണിയെയും പിന്തുണയ്ക്കില്ലെന്നു ജനറല്‍ സെക്രട്ടറി വെള്ളാപ്പള്ളി നടേശന്‍......
* പിതാജി ആത്മീയ കാര്യങ്ങള്‍ നോക്കിയാല്‍ മതി. പിന്തുണ, കൈത്തുണ തുടങ്ങിയ കച്ചോടങ്ങളെല്ലാം പുത്രന്‍ നടത്തിക്കൊള്ളും

Suprabhatham Daily dt 15 Oct 2019

Thursday, 10 October 2019

പ്രിയ മോദിജിക്ക് രാജ്യദ്രോഹപൂര്‍വം



വിമര്‍ശനം ആര്‍ക്കെതിരെ നടത്തുന്നതും രാജ്യദ്രോഹമാകുന്നില്ല എന്നു സുപ്രിം കോടതി പറഞ്ഞിട്ടുണ്ട്്. ഇതു പറഞ്ഞതിനു ശേഷവും അയ്യോ രാജ്യദ്രോഹം എന്നു അലറിവിളിച്ച്, പലര്‍ക്കുമെതിരെ കേസ്സെടുപ്പിക്കുന്നുണ്ടെന്ന് സുപ്രിം കോടതിയോട് പറഞ്ഞത് പ്രമുഖ രാജ്യദ്രോഹി അഭിഭാഷകന്‍ പ്രശാന്ത് ഭൂഷണാണ്. കോടതിവിധിയൊന്നും കോണ്‍സ്റ്റബ്ള്‍മാര്‍ക്ക് മനസ്സിലാകില്ല, അവര്‍ക്ക് ഐ.പി.സിയേ അറിയൂ, അതുകൊണ്ട് അവര്‍ക്ക് മനസ്സിലാകുന്ന ഭാഷയില്‍ നിയമം പുതുക്കാന്‍ കോടതി നിര്‍ദ്ദേശിക്കണമെന്നാണ് ഈ വക്കീല്‍ കോടതിയോട്് ആവശ്യപ്പെട്ടിരുന്നത്. പൊലീസുകാരല്ല, മജിസ്‌റ്റ്രേറ് ആണ് കേസ്സിന്റെ വകുപ്പും വിധിയുമെല്ലാം നോക്കേണ്ടത്, അവര്‍ക്ക് വിധിയൊക്കെ അറിയാം എന്നാണു ഭൂഷണ് സുപ്രിം കോടതി ജസ്റ്റിസ് നല്‍കിയ മറുപടി. ബിഹാറിലെ കോടതിയില്‍നിന്നുള്ള വാര്‍ത്ത കേട്ടപ്പോള്‍ ഒരു കാര്യം മനസ്സിലായി. പൊലീസുകാരേക്കാള്‍ മോശമാണ് ചില മജിസ്‌ട്രേറ്റുമാരുടെ ബുദ്ധിസ്ഥിതി.   കണ്ടില്ലേ പ്രധാനമന്ത്രിക്കു കത്തെഴുതിയ 49 പേര്‍ക്ക് കിട്ടിയ പണി.

 എന്തു പൊതുതാല്പര്യ ഹര്‍ജിയാണ് ഇന്നു ഫയല്‍ ചെയ്യേണ്ടത് എന്നു കണ്ടെത്താന്‍ മാത്രമായി രാവിലെ പത്രം വായിക്കുന്നവര്‍ നമ്മുടെ നാട്ടില്‍ കുറവാണ്. ബിഹാര്‍ മഹാരാജ്യത്ത് സ്ഥിതി അത്ര സുഖകരമല്ല. അവിടെ സുധീര്‍ കുമാര്‍ ഓഝ എന്നൊരു വക്കീലാണ് ഇപ്പോള്‍ ചര്‍ച്ചാവിഷയമായ രാജ്യദ്രോഹക്കേസ്സിന്റെ ഉപജ്ഞാതാവ്. ഈ വക്കീല്‍ സുപ്രിം കോടതി വിധി വായിച്ചിട്ടില്ല. വായിച്ചിരുന്നെങ്കില്‍ പ്രധാനമന്ത്രിക്ക് കത്തെഴുതി എന്നു പറഞ്ഞ് വക്കീല്‍ കേസ് ഫയല്‍ ചെയ്യുമായിരുന്നില്ല, കേസ്സെടുക്കാന്‍ ഉത്തരവിട്ട സ്ഥലം മയിസ്രേട്ടും വായിച്ചിട്ടില്ല സുപ്രിംകോടതി വിധി. ഈ കേസ്സില്ലാ വക്കീലിനെ മുന്നില്‍ നിറുത്തി കളിക്കുന്നവര്‍ ആരെന്നറിയാന്‍ ദിവ്യജ്ഞാനമൊന്നും വേണ്ട താനും.

സ്വന്തം മിടുക്കു കണ്ട് ആളുകള്‍ ഏല്പിക്കുന്ന കേസ്സുവാദിച്ചു ജീവിക്കുന്ന ആളല്ല ഈ സുധീര്‍ കുമാര്‍ ഓഝ. സാദാ വക്കീലല്ല എന്നു ചുരുക്കം. കേസ്സെല്ലാം പുള്ളിക്കാരന്‍ സ്വയം കണ്ടെത്തി ഫയല്‍ ചെയ്യും. പൊതുതാല്പര്യ ഹരജിയിലാണ് സദാ കണ്ണ്. സ്റ്റാമ്പൊട്ടിക്കണമെന്നില്ല, വെള്ളക്കടലാസ്സില്‍ എഴുതിക്കൊടുത്താലും മതിയല്ലോ.  അമ്പതാം വയസ്സിനിടയില്‍ ഈ ടൈപ്പ് 745 കേസ്സുകളാണത്രെ പുള്ളിക്കാരന്‍ ഫയല്‍ ചെയ്തിട്ടുള്ളത്. ഈ മാതിരി കേസ്സ് നടത്താന്‍ പ്രത്യേകിച്ച് ചെലവൊന്നുമില്ല കേട്ടോ. ഏതാണ്ട് എല്ലാ കേസ്സുകളും തള്ളപ്പെടാറാണ് പതിവ്. അല്ലെങ്കില്‍, തള്ളുന്ന ഘട്ടം എത്തുംമുമ്പ് സംഗതി ഒത്തുതീര്‍പ്പാക്കുന്നുണ്ടാവാം. നാടു നന്നാക്കലാണ് ഒറ്റ ഉദ്ദേശ്യമെന്നാണ് ആ വിനീതന്റെ അവകാശവാദം. രാജ്യസ്‌നേഹത്തിന്റെ ആധിക്യം മൂലം ചെയ്തു പോകുന്നതാണ്. കുറച്ച് പബ്‌ളിസിറ്റിയും കുറച്ചല്ലാതെ  കോടതിച്ചെലവും കിട്ടിയാല്‍ സംഗതി ഒത്തുതീര്‍ക്കാവുന്നതല്ലേ ഉള്ളൂ.

ഇതു വരെ അദ്ദേഹം ഫയല്‍ ചെയ്ത കേസ്സുകളില്‍ വച്ചേറ്റവും കിടിലന്‍ കേസ്സ് പ്രധാനമന്ത്രിക്കു കത്തെഴുതിയ 49 മാന്യന്മാര്‍ക്കെതിരായ കേസ്സാണെന്ന് അദ്ദേഹത്തിനു ഇക്കഴിഞ്ഞ ദിവസമേ മനസ്സിലായുള്ളൂ. രാജ്യത്തെ മുഴുവന്‍ പത്രങ്ങളിലും ഈ കേസ്സ് എട്ടുകോളം  വാര്‍ത്തയാണ്. എത്ര വക്കീലന്മാര്‍ കോട്ടിട്ട് തെക്കുവടക്കു നടക്കുന്നു, വേറെ ആര്‍ക്കെങ്കിലും ഈ ബുദ്ധി തോന്നിയോ. ഈ അഛാ ആദ്മി പത്രക്കാരോട് പറഞ്ഞത് എന്തെന്നോ? 'പ്രധാനമന്ത്രിക്കു ആരു കത്തെഴുതുന്നതിനും ഞാന്‍ എതിരല്ല. പക്ഷേ, അതു മാധ്യമങ്ങളില്‍ പ്രസിദ്ധപ്പെടുത്തി അവര്‍ ബോധപൂര്‍വം രാജ്യത്തിന്റെയും പ്രധാനമന്ത്രിയുടെയും പ്രതിച്ഛായ കേടുവരുത്തുന്നു. അതാണ് പ്രശ്‌നം'. സംഗതി മനസ്സിലായല്ലോ. അതാണ് പ്രശനം. രഹസ്യമായി വേണം കത്തെഴുതാന്‍. പരസ്യപ്പെടുത്തി പ്രധാനമന്ത്രിക്കു മാനഹാനി ഉണ്ടാക്കരുത്, രാജ്യത്തിനു അഭിമാനക്ഷതം ഉണ്ടാക്കരുത്. ഇതുരണ്ടും ഉണ്ടായിരിക്കുന്നു. ഓഝയ്ക്കു സഹിക്കുന്നില്ല.

ചില അസ്സല്‍ രാജ്യസ്‌നേഹികളും ഈ കേസ്സില്‍ പ്രതിക്കൂട്ടിലാവാന്‍ സാധ്യതയുണ്ട് എന്നാണ് ഇതെഴുതുന്ന നിയമ അജ്ഞന് തോന്നുന്നത്.  ഒന്ന്. കുപ്രസിദ്ധരായ 49 രാജ്യദ്രോഹികള്‍ ചേര്‍ന്നു രാജ്യദ്രോഹപൂര്‍വം കത്തയച്ചത് പത്രം ഓഫീസിലേക്കല്ല പ്രധാനമന്ത്രിക്കാണ്. ഇത്രയും രാജ്യദ്രോഹപരമായ ഒരു കത്തു കിട്ടിയിട്ട് മാസം മൂന്നായിട്ടും ഈ ഗുരുതരമായ കുറ്റം പൊലീസ്സില്‍ റിപ്പോര്‍ട്ട് ചെയ്യാന്‍ പ്രധാനമന്ത്രിയോ  രാജാവിനേക്കാള്‍ രാജഭക്തിയുള്ള പി.എം.ഒ ഉദ്യോഗസ്ഥരോ തയ്യാറായില്ല. പ്രധാനമന്ത്രിയേക്കാള്‍ പ്രധാനിയായ മന്ത്രി  അമിത് ഷാജിക്കെങ്കിലും ഈ ബുദ്ധി തോന്നേണ്ടതായിരുന്നില്ലേ?  ബി.ജെ.പി കേന്ദ്രനേതാക്കളെരാള്‍ പോലും കേസ്സെടുക്കാന്‍ ആവശ്യപ്പെട്ടില്ല. ഇനിയിപ്പോള്‍ ഈ കേസ്സിനെക്കുറിച്ച് ഉത്തരം പറയാന്‍ പ്രധാനമന്ത്രിയെക്കൂടി കോടതിയിലേക്കു വിളിക്കണമെന്ന ആവശ്യവും ഉയര്‍ന്നേക്കാം. വേറൊന്ന്...  രാജ്യദ്രോഹികള്‍ പരസ്യപ്പെടുത്തിയ കത്തുമൂലം പ്രധാനമന്ത്രിയുടെ യശസ്സിനു കേടുപാട് സംഭവിച്ചു എന്നതാണല്ലോ പ്രശ്‌നം. . യശസ്സിനു സംഭവിച്ച ഡാമേജിന്റെ തോതു പ്രധാനമന്ത്രി തന്നെ പറഞ്ഞാലല്ലേ അറിയാന്‍ പറ്റൂ. വന്നുനില്‍ക്കട്ടെ അദ്ദേഹവും സാക്ഷിക്കൂട്ടില്‍. ആകെമൊത്തം നോക്കുമ്പോള്‍ കേസ്സില്‍ വാദിഭാഗമാണോ പ്രതിക്കൂട്ടിലെത്തുക എന്നൊരു ആശങ്ക ഇല്ലാതില്ല.

രാജ്യദ്രോഹക്കേസ് ഒരു പക്ഷേ, അധികം താമസിയാതെ ഹൈക്കോടതിയോ സുപ്രിം കോടതിയോ എടുത്ത് ചവറ്റുകൊട്ടയിലിട്ടേക്കാം. അങ്ങനെ ചെയ്താലും അര്‍ബണ്‍ റൂറല്‍ രാജ്യദ്രോഹികള്‍ക്കുള്ള ഒരു സന്ദേശം ഇതിലുണ്ട്. അടങ്ങിയൊതുങ്ങി ജീവിച്ചില്ലെങ്കില്‍ എപ്പോള്‍ വേണമെങ്കിലും രാജ്യദ്രോഹത്തിനു ജയിലാകാം. ജാമ്യമില്ലാത്ത കുറ്റമാണ് രാജ്യദ്രോഹം.  ആര്‍ക്കെല്ലാം എതിരെ  ഈ ടൈപ്പ് കേസ്സുകള്‍ വരും എന്നു പറയാണ്‍ ജോത്സര്‍ക്കേ പറ്റ. ഇതൊരു സാമ്പില്‍ ഡോസ്സാണ്. പ്രധാനമന്ത്രിക്ക് അയച്ച കത്തുതന്നെ ലക്ഷക്കണക്കിനാളുകള്‍ ഒപ്പിട്ട് പരസ്യപ്പെടുത്തുന്നുണ്ട്. തുല്യചെയ്തിക്കു തുല്യകേസ് എന്ന ന്യായപ്രകാരം ഇവരെയും രാജ്യദ്രോഹക്കേസ്സില്‍ പ്രതികളാക്കാം. ഇതൊന്നുമില്ലാതെതന്നെ, രാഹുല്‍ ഗാന്ധിയടക്കം ഡസന്‍കണക്കിന് രാജ്യദ്രോഹികളെ കേസ്സില്‍ കുടുക്കിക്കഴിഞ്ഞു.

നിലവിലുള്ള പൗരത്വപ്രശ്‌നത്തിലെ ഒരു പ്രധാനവ്യവസ്ഥ രാജ്യദ്രോഹപ്രശ്‌നത്തനും ബാധകമാക്കാവുന്നതാണ്. അസ്സമില്‍ ജീവിക്കുന്ന ഓരോ ആളും സ്വയം തെളിയിക്കണം താന്‍ ഇന്ത്യക്കാരനാണ് എന്ന്. അസ്സമില്‍ മാത്രമല്ല, ഘട്ടം ഘട്ടമായി ഇത് രാജ്യമാസകലം നടപ്പാക്കാനും അമിത് ഷാജി ആലോചിക്കുന്നുണ്ട്. മിസ്റ്റര്‍ എക്‌സ്, ഓര്‍ വൈ ഇന്ത്യന്‍ പൗരനാണ്എ ന്നു തെളിയിക്കേണ്ട ഉത്തരവാദിത്തം മിസ്റ്റര്‍ എക്‌സ്, ഓര്‍ വൈക്കു തന്നെയാണ്. അല്ലാതെ സര്‍ക്കാറിന്റെ പണിയല്ല അത്്. രാജ്യദ്രോഹിയല്ല എന്നു ഒരോ ആളും സ്വയം തെളിയിക്കണം എന്നൊരു വ്യവസ്ഥ ഉണ്ടാക്കുന്നത് നന്നാവും. കാണാലോ ഓരോരുത്തനും കിടന്നു ചക്രശ്വാസം വലിക്കുന്നത്. രാജ്യദ്രോഹിയല്ലെന്നു സ്വയം തെളിയിക്കാത്തവര്‍ക്കൊക്കെ ജീവപര്യന്തം തടവു കൊടുക്കാം. പാശ്ചാത്യ സാമ്രാജ്യത്വവാദികളുടെ വഴിയെ നാം പോയിക്കൂട. അമേരിക്കയിലും ബ്രിട്ടനിലുമൊന്നും ഇപ്പോള്‍ എഴുത്തിനും പ്രസംഗത്തിനുമൊന്നും രാജ്യദ്രോഹം എന്നൊരു വകുപ്പുതന്നെ ഇല്ലത്രെ. അതൊന്നും നമുക്കു പറ്റില്ല. നമ്മളല്ലാത്ത എല്ലാവരെയും രാജ്യദ്രോഹികളാക്കിയിട്ടു വേണം നമുക്കു കഴിഞ്ഞുകൂടാന്‍....

മുനയമ്പ്
പൂതനപ്രയോഗം  പ്രത്യേകം വ്യക്തിയെ ഉദ്ദേശിച്ചല്ലെന്നു മന്ത്രി ജി.സുധാകരന്‍
* സ്ത്രീ സമൂഹത്തെ പൊതുവില്‍ ഉദ്ദേശിച്ചാവണം.



Wednesday, 9 October 2019

മോഹന്‍ ഭാഗവതിന്റെ ഗാന്ധിലേഖനവും മാതൃഭൂമിയും


മോഹന്‍ ഭാഗവതിന്റെ ഗാന്ധിലേഖനവും മാതൃഭൂമിയും

മഹാത്മാ ഗാന്ധിയുടെ 150 ാം ജന്മദിനനാളില്‍ മാതൃഭൂമി ദിനപത്രം രണ്ടു പേജുള്ള(8,9 പേജുകളില്‍ സെന്റല്‍ സ്‌പ്രെഡ്) പ്രത്യേകപതിപ്പും മറ്റു ചില പേജുകളില്‍ ചില ഓര്‍മറിപ്പോര്‍ട്ടുകളും പ്രസിദ്ധപ്പെടുത്തിയിരുന്നു. ഇതിലൊന്നും പെടാത്ത ഒരു ലേഖനം വാര്‍ത്താപേജില്‍ ഉണ്ടായിരുന്നു. ആര്‍.എസ്.എസ് തലവന്റെ ആ ലേഖനം വായനക്കാരുടെയും വിമര്‍ശകരുടെയും ശ്രദ്ധ പിടിച്ചുപറ്റിയതില്‍ അത്ഭുതമില്ല. ലേഖനം കൊടുത്ത പേജും രീതിയും കാണുമ്പോള്‍ അര്‍ദ്ധമനസ്സോടെ കൊടുത്തതുപോലെയേ തോന്നൂ. ഒളിപ്പിച്ചു കടത്തിയതുപോലെ എന്നുംപറയാം. മോഹന്‍ ഭാഗവത് മാതൃഭൂമിയുടെ എഡിറ്റ് പേജില്‍ എഴുതി എന്നു ചില ബുദ്ധിജീവികള്‍ വിശേഷിപ്പിച്ചത് ശ്രദ്ധക്കുറവോ അറിവില്ലായ്മയോ ആകാം. അതവിടെ നില്‍ക്കട്ടെ.

മഹാത്മാ ഗാന്ധിയെ പ്രകീര്‍ത്തിച്ചു കൊണ്ട്് ആര്‍.എസ്.എസ് തലവന്‍ ഒരു ലേഖനമയച്ചാല്‍ മാതൃഭൂമി പത്രം എന്തു ചെയ്യണമായിരുന്നു എന്ന ചോദ്യത്തിന് എളുപ്പം ഉത്തരം പറയാന്‍ നാലു പതിറ്റാണ്ടോളമായി മാതൃഭൂമിയുമായും പത്രപ്രവര്‍ത്തനവുമായി പൊതുവായും ഉറ്റബന്ധം പുലര്‍ത്തുന്ന ഈ ലേഖകനു കഴിയില്ല. മാതൃഭൂമി ഉറച്ച ആര്‍.എസ്.എസ്-ഹിന്ദുത്വ വിരുദ്ധ പ്രഖ്യാപിതനയം ഉള്ള പത്രമായിരുന്നുവെങ്കില്‍ ആ ലേഖനം ഉപേക്ഷിക്കാന്‍ എഡിറ്റര്‍ക്ക്  അനായാസം തീരുമാനിക്കാം. പൊതുവെ മതേതരത്വം, മതസൗഹാര്‍ദ്ദം, ജനാധിപത്യം എന്നെല്ലാം പറയുമെങ്കിലും വര്‍ഗീയവാദികളെ തീര്‍ത്തും അകറ്റിനിര്‍ത്തുക, അവരുടെ ലേഖനം കൊടുക്കാതിരിക്കുക, വാര്‍ത്ത കവര്‍ ചെയ്യാതിരിക്കുക തുടങ്ങിയ രീതികള്‍ രാഷ്്ട്രീയേതര പത്രങ്ങള്‍ക്കില്ല. മലയാളത്തില്‍ ഒട്ടുമില്ല. എല്ലാ പാര്‍ട്ടികളെയും പോലെ മാത്രമേ ഹിന്ദുത്വ പാര്‍ട്ടിയെയും സംഘടനകളെയും മാതൃഭൂമി ഉള്‍പ്പെടെയുള്ള മാനേജ്‌മെന്റുകള്‍ കാണുന്നുള്ളൂ.

സ്വാതന്ത്ര്യസമരകാലവും തുടര്‍ന്നു നെഹ്‌റു കാലവും ഇന്ദിരാഗാന്ധിയുടെ അടിയന്തരാവസ്ഥയും കഴിഞ്ഞാണ് മാതൃഭൂമിക്കു പുതിയ മാനേജ്‌മെന്റ് നയങ്ങളും പത്രാധിപനയങ്ങളും ഉണ്ടാകുന്നത്. ഉള്ളടക്കം സംബന്ധിച്ച എല്ലാ ചുമതലയും പത്രാധിപര്‍ക്കാണ്. നിയമം അനുശാസിക്കുന്നതും അങ്ങനെയാണ്. മാറുന്ന പത്രാധിപന്മാരില്‍ ചിലര്‍ ഈ അധികാരം നൂറു ശതമാനം ഉപയോഗിച്ചിട്ടുണ്ട്, ചിലര്‍ അര ശതമാനം പോലും ഉപയോഗിക്കാതിരുന്നിട്ടുമുണ്ട്. അങ്ങനെ ഉടമസ്ഥന്മാരോടൊന്നും ചോദിക്കാതെ തീരുമാനമെടുക്കാന്‍ അധികാരമുള്ള ഒരു എഡിറ്റര്‍ ഇന്നു മാതൃഭൂമിക്കില്ല. അങ്ങനെ ഒരു നയവുമില്ല. പൂര്‍ണ എഡിറ്റര്‍തന്നെ ഇല്ല എന്നാണ് പറയേണ്ടത്. എക്‌സി. എഡിറ്റര്‍ക്ക്, പരമിതമായ ചുമതലകളേ ഉള്ളൂ എന്നാണ് അറിയാന്‍ കഴിയുന്നത്. പൂര്‍ണതോതിലുള്ള, കരുത്തനായ എഡിറ്റര്‍ ഉണ്ടാകരുത് എന്നാണ് എല്ലാ മാനേജ്‌മെന്റുകളുടെയും ആഗ്രഹം. ഡയറക്റ്റര്‍മാര്‍ക്കും മാര്‍ക്കറ്റിങ് മാനേജര്‍മാര്‍ക്കും ഇന്‍ഹ്യൂമന്‍ റിസോഴ്‌സ് മാനേജര്‍മാര്‍ക്കും വിലസാന്‍ അങ്ങനെയൊരു എഡിറ്റര്‍ ഉണ്ടാവാനേ പാടില്ല.

മോഹന്‍ ഭാഗവതിനും സ്വാതന്ത്ര്യമുണ്ട്
ആര്‍.എസ്.എസ് തലവന് മഹാത്മാഗാന്ധിയെക്കുറിച്ച് നല്ല വാക്കുകള്‍ പറയാന്‍ അവകാശമില്ലേ? ഉണ്ടെങ്കില്‍ അതു അപ്പടി ബ്ലാക്കൗട് ചെയ്യുകയാണോ ഒരു സ്വതന്ത്രപത്രം ചെയ്യേണ്ടത്? ഉറച്ച കക്ഷിരാഷ്ട്രീയനിലപാടുകളുള്ള ഒരോ ആളും ഇക്കാര്യത്തിലും ഓരോ നിലപാട് സ്വീകരിക്കും. കക്ഷിരാഷ്ട്രീയബന്ധമോ, അനുഭാവം പോലുമോ ഇല്ലാത്ത പ്രൊഫഷനല്‍ പത്രപവര്‍ത്തകന് വായനക്കാരുടെ പക്ഷത്തുനിന്നു കൊണ്ടേ ചിന്തിക്കാന്‍ പറ്റൂ. മോഹന്‍ ഭാഗവതിനു ഗാന്ധിജിയെക്കുറിച്ച് പറയാന്‍ സ്വാതന്ത്ര്യമുണ്ട്. അതു പ്രസിദ്ധീകരിക്കാന്‍ മാതൃഭൂമിക്കും സ്വാതന്ത്ര്യമുണ്ട്. ഭാഗവത് എന്തു പറയുന്നു എന്നറിയാന്‍ ഓരോ വായനക്കാരനും അവകാശമുണ്ട്. അവരുടെ നയമാറ്റങ്ങളെക്കുറിച്ചറിയാന്‍ താല്പര്യവുമുണ്ട്. അതിനെക്കുറിച്ച് തലങ്ങും വിലങ്ങും ചര്‍ച്ച ചെയ്യാനും മോഹന്‍ ഭാഗവത്തിന്റെ നിലപാട് പച്ചക്കള്ളവും വഞ്ചനയും ഗാന്ധിജിയെ വെടിവെച്ചുകൊന്നവരെന്ന കറുത്ത മുഖം വെളുപ്പിക്കാനുള്ള തന്ത്രവുമാണെന്ന് ആഞ്ഞടിക്കാനും ഈ ലേഖനം ഉപയോഗിക്കാവുന്നതേ ഉള്ളൂ. അതിനുള്ള വേദിയൊരുക്കലാണ് ജനാധിപത്യത്തിലെ സ്വതന്ത്ര പത്രങ്ങള്‍ നിര്‍വഹിക്കേണ്ട ഉത്തരവാദിത്തം. അല്ലാതെ വിവാദലേഖനം ഒളിച്ചുവയ്ക്കുകയല്ല തന്നെ.

മോഹന്‍ ഭാഗവത് ആ ലേഖനം മാതൃഭൂമിക്കു വേണ്ടി മാത്രമായി അയച്ചുകൊടുത്തതല്ല എന്ന് എല്ലാവര്‍ക്കും അറിയുമായിരിക്കും. എല്ലാ ഭാഷകളിലും ഒന്നോ രണ്ടോ പത്രത്തിനാവണം ലേഖനം കൊടുത്തിരിക്കുക. ഇംഗ്ലീഷ് പത്രങ്ങളുടെ കൂട്ടത്തില്‍ ഹിന്ദുസ്ഥാന്‍ ടൈംസില്‍ മാത്രമാണ്, ഒറ്റ നോട്ടത്തില്‍, ആ ലേഖനം കണ്ടത്്. സംഘപരിവാര്‍ അനുയായികളെയല്ല, പൊതു സമൂഹത്തെയാണ് സംഘപരിവാറിലെ പ്രചാരണസംഘം ലക്ഷ്യമിടുന്നത് എന്നു വ്യക്തം. അല്ലായിരുന്നുവെങ്കില്‍ ആ ലേഖനം ജന്മഭൂമിയിലോ കേസരിയിലോ ഒന്നാം പേജ് ലേഖനമായി വന്നേനെ. മഹാത്മാഗാന്ധിയെ ബഹുമാനിക്കുന്ന ജനവിഭാഗം, സംഘപരിവാര്‍ സംഘടനകളുടെ അനുഭാവിക്കൂട്ടത്തിനു പുറത്താണുള്ളത്. അവര്‍ വായിക്കാനാണ് ലേഖനം മാതൃഭൂമിയിലേക്കു അയച്ചത്. ഇതൊക്കെ വലിയ ആസൂത്രണത്തിന്റെ ഭാഗമാണ്.

ഈയിടെ പ്രധാനമന്ത്രി നരേന്ദ്രമോദിയുടെ 69 ാം ജന്മദിനത്തില്‍ രാജ്യത്തെ എല്ലാ സംസ്ഥാനങ്ങളിലും ഒന്നും രണ്ടും പത്രങ്ങളില്‍ കേന്ദ്രമന്ത്രി അമിത് ഷായുടെ മോദി പ്രകീര്‍ത്തന ലേഖനം പ്രസിദ്ധീകരിച്ചിരുന്നു. ചില പത്രങ്ങളില്‍ മന്ത്രി പ്രകാശ് ജാവേദ്കറാണ് ഈ പ്രകീര്‍ത്തനം എഴുതിയത്. മുന്‍പൊരു ജന്മദിനത്തിലും ഇല്ലാത്ത ഈ പുതുമ അടുത്ത വര്‍ഷത്തെ എഴുപതാം ജന്മദിനാഘോഷത്തിന്റെ ട്രെയ്‌ലര്‍ മാത്രമാവും. ആസൂത്രണത്തിന്റെ തലം സൂചിപ്പിച്ചുവെന്നു മാത്രം. മോഹന്‍ ഭാഗവതിന്റെ ലേഖനം യഥാര്‍ത്ഥത്തില്‍ ആര്‍.എസ്.എസ് ഉള്‍പ്പെടെയുള്ള സംഘടനകള്‍ സ്വീകരിച്ചുപോന്ന ഗാന്ധിവിരുദ്ധ നിലപാടുകള്‍ തുറന്നു കാട്ടാനുള്ള ഒരു അവസരമാണ്. ആ തുറന്നുകാട്ടല്‍ രാജ്യത്തു നടക്കുന്നുണ്ട്. മാതൃഭൂമിതന്നെ അത് ഒരു പരിധിയോളം  ഉപയോഗപ്പെടുത്തിയിട്ടുമുണ്ട്- ഒരു വീണ്ടുവിചാരം ആണെന്നു തോന്നിപ്പിക്കുന്നുണ്ടെങ്കിലും.

എല്ലാവരെയും പ്രീണിപ്പിക്കുക
മാതൃഭൂമിയും മാതൃഭൂമി പോലെയുള്ള പാര്‍ട്ടിരഹിത പത്രങ്ങളും എത്തിപ്പെട്ടിട്ടുള്ള ധര്‍മസങ്കടാവസ്ഥ വിമര്‍ശകര്‍ കാണാതെ പോകരുത്. എല്ലാ പാര്‍ട്ടികളോടും തീര്‍ത്തും സ്വതന്ത്രവും വസ്തുനിഷ്ഠവും ശരിതെറ്റുകള്‍ മാത്രം ആധാരമാക്കിയുമുള്ള നിലപാട് സ്വീകരിക്കും എന്നതാണ് ഈ പത്രങ്ങള്‍ പറയുന്നത്. അഭിപ്രായങ്ങള്‍ മുഖപ്രസംഗത്തിലും ലേഖനങ്ങളിലും ഒതുക്കും, വാര്‍ത്തകള്‍ സത്യസന്ധമായിരിക്കും. ഓരോ വിഭാഗത്തിനും അവര്‍ക്ക് സമൂഹത്തിലുള്ള പിന്‍ബലം നല്‍കുന്ന അര്‍ഹതയ്‌ക്കൊത്ത പ്രാതിനിധ്യം വാര്‍ത്തകളുടെ കവറേജില്‍ ലഭിക്കും. ഈ തത്ത്വം പ്രയോഗിക്കുമ്പോള്‍ മോഹന്‍ ഭാഗവതിനെപ്പോലൊരാളുടെ ലേഖനം പ്രസിദ്ധീകരിക്കാതെ തിരിച്ചയക്കാന്‍ കഴിയില്ല. ബി.ജെ.പി അനുകൂലികളാരും മാതൃഭൂമി വായിക്കേണ്ട എന്നൊരു നയം മാതൃഭൂമിക്കില്ല, ഉണ്ടാകാന്‍ പാടുള്ളതുമല്ല. സോഷ്യല്‍ മീഡിയയിലും മറ്റ് ഹിന്ദുത്വവിരുദ്ധ നിലപാടുകളുള്ള ഓണ്‍ലൈന്‍-അച്ചടി പ്രസിദ്ധീകരണങ്ങളിലും എഴുതുന്നവര്‍ ആഗ്രഹിക്കുന്നത് അവര്‍ പുലര്‍ത്തുന്ന അതേ തോതിലുള്ള ഹിന്ദുത്വവിരുദ്ധവികാരം മാതൃഭൂമി പോലുള്ള പത്രങ്ങളും പുലര്‍ത്തണം എന്നാണ്. അത് സാധ്യമാവില്ല. കാരണം, പാര്‍ട്ടികളെയും മതങ്ങളെയും വര്‍ഗങ്ങളെയും വര്‍ഗീയവാദികളെയും സംഘടനകളെയും എല്ലാം തുല്യതോതില്‍ പ്രീണിപ്പിച്ച്, പത്രപ്രചാരം ഉയര്‍ത്തുക എന്നതാണ് പത്രങ്ങളുടെ അടിസ്ഥാനനയം. തത്ത്വങ്ങള്‍ ഉയര്‍ത്തിപ്പിടിച്ച് വായനക്കാരെയോ പരസ്യക്കാരെയോ അകറ്റാന്‍ അവരെക്കൊണ്ടാവില്ല. വിപണിയിലാണ് അവരുടെ തത്ത്വങ്ങളുള്ളത്. അതാണ് അവരുടെ നിലനില്‍പ്പ്.

പക്ഷേ, മാതൃഭൂമി  ഉള്‍പ്പെടെയുള്ള പല മാനേജ്‌മെന്റുകളും കാണാതെ പോകുന്ന ഒരു കാര്യമുണ്ട്. ഹിന്ദുത്വസംഘടനകളെയോ ആ വികാരം കൊണ്ടുനടക്കുന്നവരെയോ അനുകൂലവാര്‍ത്തയും ലേഖനവും കൊടുത്ത് ഒപ്പം നിര്‍ത്താനാവില്ല. തത്കാലം സര്‍ക്കുലേഷന്‍ ഉള്ളതുകൊണ്ട് മോഹന്‍ ഭാഗവതിന്റെ ലേഖനം മാതൃഭൂമിക്കും അയച്ചുതന്നേക്കും. പക്ഷേ, സ്വതന്ത്രനിലപാടുകളുള്ള ഒരു പത്രം കേരളത്തില്‍ ഉണ്ടാകണം എന്ന ആഗ്രഹം അവര്‍ക്കില്ല. എന്നു മാത്രമല്ല എത്രയും വേഗം ആ പത്രത്തെ കൊന്നു കുഴിച്ചുമൂടണമെന്ന് അവര്‍ ആഗ്രഹിക്കുന്നുമുണ്ട്്. ഇതു പകല്‍വെളിച്ചം പോലെ വ്യക്തമാണ്്. മാതൃഭൂമി നടത്തിപ്പുകാര്‍ക്ക് ഇതു ഇപ്പോഴും ബോധ്യപ്പെടാത്തതാണോ അതല്ല, അറിഞ്ഞിട്ടും നിസ്സഹായത കൊണ്ട് ഒന്നുമറിയില്ലെന്നു ഭാവിക്കുന്നതാണോ എന്നറിയില്ല.


മീശ നോവല്‍ വിവാദം
എന്താണ് മീശ നോവല്‍ പ്രശ്‌നത്തില്‍ സംഭവിച്ചത്? ഹിന്ദുവിശ്വാസി സമൂഹത്തില്‍ അര ശതമാനം ആളുകള്‍ പോലും കണ്ടിട്ടില്ല ആഴ്ചപ്പതിപ്പിലെ ആ നോവലിലെ വിവാദവാചകം.  മാതൃഭൂമി ഹിന്ദുസ്ത്രീകളെക്കുറിച്ച് മാതൃഭൂമി ഇങ്ങനെ ആഭാസം എഴുതി, ആ പത്രം വാങ്ങരുത് എന്നു  നാടെമ്പാടുമുള്ള ഹിന്ദുവീടുകളില്‍,വനിതകളെ നിയോഗിച്ച് പ്രചാരം നടത്തിയാണ് മാതൃഭൂമി പത്രത്തിന്റെ കോപ്പി ലക്ഷക്കണക്കിന് കുറപ്പിച്ചത്. തൊട്ടുമുന്‍പ് നബിനിന്ദ ആരോപിച്ചും ഇതുപോലെ പത്രബഹിഷ്‌കരണം നടന്നിട്ടുണ്ട്. അതിന്റെ തോതു വേറെ. കാല്‍നൂറ്റാണ്ട് മുന്‍പ് മതസംഘടനകളെ ഭയപ്പെടാതെ എഴുതിയ ഒരു കാര്യവും ഇന്നു പത്രത്തിലെഴുതാന്‍ പറ്റില്ല. ഇപ്പോഴത്തെ അവസ്ഥയില്‍ ഒരു മതസംഘടനയോടും ലവലേശമെങ്കിലും തന്റേടത്തോടെയുള്ള നിലപാട് സ്വീകരിക്കാന്‍ സാധിക്കുന്നില്ല. സൂര്യനസ്തമിക്കാത്ത ബ്രിട്ടീഷ് സാമ്രാജ്യത്തെ ഭയന്നിട്ടില്ലാത്ത പത്രം ഇന്നു പത്താള്‍ മാത്രമുള്ള ഈര്‍ക്കില്‍ സംഘടനക്കാരന്‍ ഫോണ്‍ വിളിച്ചാലും ഭയക്കും.

 ഇതിനിടയിലും നിരന്തരമായ മാതൃഭൂമി വിരുദ്ധപ്രചാരണം ഹിന്ദുത്വസംഘടനക്കാര്‍ നടത്തുന്നുണ്ട്. ഏറ്റവും ഒടുവില്‍ മൂന്നോ നാലോ ഹിന്ദുത്വ അനുകൂലികള്‍, മാതൃഭൂമി വാരാന്തപ്പതിപ്പിലെ ഒരു ലേഖനത്തെക്കുറിച്ച് അമര്‍ഷത്തോടെ എന്നോടു പറഞ്ഞത് ഓര്‍ക്കുന്നു. ആലങ്കോട് ലീലാകൃഷ്ണന്‍ ഈയിടെ എഴുതിയതാണ് ലേഖനം. പാക്കനാര്‍ ക്രിസ്ത്യാനിയാണ് എന്നെഴുതി ലീലാകൃഷ്ണന്‍ എഴുതി എന്നതാണ് അവരുടെ അമര്‍ഷത്തിനു കാരണം.  ഞാന്‍ ആ ലേഖനം വായിച്ചുനോക്കി. ലീലാകൃഷ്ണന്‍ അങ്ങനെ എഴുതിയിട്ടില്ല. േേകസരി ബാലകൃഷ്ണപിള്ള ചരിത്രത്തിന്റെ  അടിവേരുകള്‍ എന്ന ഗ്രന്ഥത്തില്‍ നടത്തിയ പരാമര്‍ശമാണ് വിഷയം. മനയെക്കുറിച്ചുള്ള ചരിത്രപരമായ എന്തോ പരാമര്‍ശമാണ്. ലീലാകൃഷ്ണന്‍ അതു ക്വോട്ട് ചെയ്തു എന്നു മാത്രം. ഹിന്ദുമതവുമായി ബന്ധമൊന്നുമുള്ളതല്ല ആ ലേഖനം. ഇതുപോലും മാതൃഭൂമിയെ തകര്‍ക്കാനുള്ള പ്രചാരണായുധമായി ഉപയോഗിക്കുന്നു. ഇതിന്റെയെല്ലാം ആത്യന്തികമായ ഫലമെന്താണ്? ഒരേ സമയം ഹിന്ദുത്വവാദികളും മതേതരവാദികളും മാതൃഭൂമിക്കെതിരെ ആള്‍ക്കൂട്ട ആക്രമണത്തിനു ഒരുമ്പെടുന്നു. മാതൃഭൂമി അത്രത്തോളമൊന്നും അര്‍ഹിക്കുന്നില്ല. മാതൃഭൂമി നശിക്കേണ്ടത് മതേതരവാദികളുടെ ആവശ്യമല്ല, വര്‍ഗീയവാദികളുടെ മാത്രം ആവശ്യമാണ്്, സംശയമില്ല. മതനിരപേക്ഷപ്രസ്ഥാനങ്ങള്‍ക്കും ന്യൂനപക്ഷതാല്പര്യങ്ങള്‍ക്കും അതാണ് വേണ്ടത് എന്നു നെഞ്ചത്ത് കൈവച്ച് ആര്‍ക്കെങ്കിലും പറയാന്‍ കഴിയുമോ?

 വര്‍ഗ്ഗീയവാദികളുടെ കടന്നാക്രമങ്ങളെ നേരിടേണ്ടി വരുമ്പോള്‍ മാധ്യമങ്ങള്‍ക്കൊന്നും ഒരു ഘട്ടത്തിലും മതനിരപേക്ഷ സംഘടനകളുടെയോ ബുദ്ധിജീവികളുടെയോ ഇടതുപക്ഷത്തിന്റെയോ സഹായമോ വാക്കാലുള്ള പിന്തുണ പോലുമോ ലഭിക്കാറില്ല എന്നതാണ് യാഥാര്‍ത്ഥ്യം. മതനിരപേക്ഷത പറയുന്ന മാധ്യമമാകട്ടെ, പാര്‍ട്ടിയാകട്ടെ കാര്യസാധ്യത്തിന് മതാനുയായികള്‍ക്കു മുന്നില്‍ കുമ്പിട്ടുനില്‍ക്കാറുമുണ്ട്. ഒരു കൂട്ടര്‍ക്ക് ആവശ്യം സര്‍ക്കുലേഷനാണ്, മറ്റേ കൂട്ടര്‍ക്ക് ആവശ്യം വോട്ടാണ്. രണ്ടിന്റെയും തന്ത്രങ്ങള്‍ ഒന്നുതന്നെ. ഉറച്ച മതനിരപേക്ഷ നിലപാട്  എടുക്കാന്‍ കരുത്തുള്ള പത്രമോ പാര്‍ട്ടിയോ ഉണ്ടോ കേരളത്തില്‍? ഇന്ത്യയുടെ കാര്യം വിട്.


കഥ/കവിത കൊടുക്കില്ല
മോഹന്‍ ഭാഗവതിന്റെ ലേഖനം പ്രസിദ്ധീകരിച്ചതുകൊണ്ട് ഇനി തന്റെ കഥ/ കവിത/ലേഖനം മാതൃഭൂമിയില്‍ പ്രസിദ്ധീകരണത്തിന് അയക്കില്ല എന്ന പ്രഖ്യാപിച്ചിട്ടുള്ള ആദര്‍ശവാദികളോട് ആത്മാര്‍ത്ഥമായും സഹതാപമുണ്ട്. എനിക്ക് ഇഷ്ടമില്ലാത്തവരുടെ ലേഖനം പ്രസിദ്ധപ്പെടുത്തുന്ന മാധ്യമത്തില്‍ എന്റെ ലേഖനം കൊടുക്കില്ല എന്ന നിലപാട് ജനാധിപത്യപരമാണോ?   ഫാസിസ്റ്റുകളുടെ ലേഖനം പ്രസിദ്ധപ്പെടുത്താനുള്ള അവകാശവും പത്രസ്വാതന്ത്ര്യത്തിന്റെ ഭാഗം തന്നെയാണ്. പത്രത്തിലുടെ നിങ്ങളുടെ രചന വായനക്കാരില്‍ എത്തും എന്നതുകൊണ്ടാണ് നിങ്ങള്‍ അവര്‍ക്ക് അതയച്ചുകൊടുക്കുന്നത്. ഇല്ലെങ്കില്‍ നിങ്ങള്‍ക്കു നഷ്ടപ്പെടുന്നത്  നല്ല വായനക്കാരെയാണ്. ഒരു തരത്തിലും സ്വീകാര്യമല്ലാത്ത പ്രസിദ്ധീകരണങ്ങളില്‍ നമ്മളാരും സൃഷ്ടികള്‍ പ്രസിദ്ധീകരിക്കില്ല. മാതൃഭൂമി ഇപ്പോഴും അത്തരമൊരു പ്രസിദ്ധീകരണമായിട്ടില്ല.




Sunday, 6 October 2019

വ്യാജവാര്‍ത്തകളുടെ കൊടുങ്കാറ്റിലും സത്യം കണ്ടെത്താം


വ്യാജവാര്‍ത്തകളുടെ 
കൊടുങ്കാറ്റിലും 
സത്യം കണ്ടെത്താം 

എന്‍.പി രാജേന്ദ്രന്‍

ജവഹര്‍ലാല്‍ നെഹ്‌റുവിന്റെ ഒരു ഫോട്ടോ കുറച്ചായി ഒരു വിഭാഗം ഇന്റര്‍നെറ്റ് മാധ്യമങ്ങള്‍ വ്യാപകമായി പ്രചരിക്കുന്നുണ്ട്. അടിക്കുറിപ്പ് പ്രകാരം അത്് 1962-ല്‍  എടുത്ത ഫോട്ടോ ആണ്. സന്ദര്‍ഭവിവരണം ഇങ്ങനെ- വിദ്യാനന്ദ് വിദേഹ് എന്ന സ്വാമി ഒരു പൊതുയോഗത്തില്‍ പ്രധാനമന്ത്രിയുടെ മുഖത്തടിച്ചപ്പോഴുണ്ടായ ബഹളമാണ് ചിത്രത്തിലേത്.  ആര്യന്മാര്‍ ഇന്ത്യയിലേക്ക് കുടിയേറിയവരാണ് എന്ന് നെഹ്‌റു പ്രസംഗിച്ചതില്‍ ക്ഷോഭിച്ചാണ്, ആ യോഗത്തിലെ അദ്ധ്യക്ഷന്‍ കൂടിയായ സ്വാമി തല്‍ക്ഷണം നെഹ്‌റുവിനെ അടിച്ചത്. നമ്മുടെയെല്ലാം പൂര്‍വികരായ, ഇന്ത്യയുടെ യഥാര്‍ത്ഥ അവകാശികളായ ആര്യന്മാരെക്കുറിച്ച് ഇത്രയും വലിയ പച്ചക്കള്ളം പറഞ്ഞാല്‍ നെഹ്‌റുവിനെ അടിക്കാതെ പറ്റുമോ.....

എത്ര ലക്ഷം ആളുകളിലേക്ക് ഈ ഫോട്ടോവാര്‍ത്ത എത്തിയിട്ടുണ്ടെന്ന് പറയാനാവില്ല. കുറെപ്പേര്‍ക്ക് ഇതേ ഫോട്ടോ, 1962-ല്‍ ചൈന യുദ്ധത്തില്‍ ഇന്ത്യ തോറ്റപ്പോള്‍ കുപിതരായ ജനങ്ങള്‍ നെഹ്‌റുവിനെ മര്‍ദ്ദിച്ചപ്പോഴെന്ന കുറിപ്പോടെയും പ്രചരിപ്പിക്കുന്നുണ്ട്. വ്യാജഫോട്ടോവിന്റെയും വ്യാജവാര്‍ത്തയുടെയും ഈ കാലത്ത് ഒന്നിനെയും വിശ്വസിച്ചുകൂടാ എന്നു അനേകം അനുഭവങ്ങള്‍ പഠിപ്പിക്കുന്നുണ്ട്. ഇപ്പോള്‍ ചൂണ്ടിക്കാട്ടിയ നെഹ്‌റു ഫോട്ടോയെക്കുറിച്ച്, അതിലെ സത്യാസത്യത്തെക്കുറിച്ച് നിരവധി  സത്യാന്വേഷണ ഓണ്‍ലൈന്‍ മാധ്യമങ്ങള്‍ പരിശോധിക്കുകയുണ്ടായി. അതെ, ഓണ്‍ലൈന്‍ രംഗത്ത് വ്യാജവാര്‍ത്തകളുടെ കൊടുങ്കാറ്റടിക്കുമ്പോള്‍ നിരവധി വ്യക്തികളും സംഘടനകളും വ്യാജവാര്‍ത്തകളുടെ തനിനിറം പുറത്തെത്തിക്കാന്‍ നിരന്തരം പരിശ്രമിക്കുന്നുണ്ട്. നാം സാമൂഹ്യമാധ്യമങ്ങളില്‍ വായിക്കുന്ന വാര്‍ത്തകളില്‍ നല്ലൊരു ഭാഗം വ്യാജവാര്‍ത്തകളാണെന്നു ഭൂരിപക്ഷമാളുകള്‍ക്കും അറിയില്ല. സത്യത്തെയും വ്യാജത്തെയും വേര്‍തിരിക്കാന്‍ രാപകല്‍ പരിശ്രമിക്കുന്ന വ്യക്തികളും  സംഘടനകളും ഇന്റര്‍നെറ്റ് സൈറ്റുകളും സംഘടനകളും ഉണ്ട് എന്ന കാര്യവും നല്ലൊരു ഭാഗം ഇന്റര്‍നെറ്റ് ഉപയോക്താക്കള്‍ക്ക് അറിഞ്ഞു കൂടാ.

്പുതിയ ഓണ്‍ലൈന്‍ പ്രയോഗമനുസരിച്ച് 'വൈറല്‍' ആയ നെഹ്‌റു ഫോട്ടോയെക്കുറിച്ച് ബൂംലൈവ്‌ഡോട്ഇന്‍(boomlive.in) എന്ന വെബ്‌സൈറ്റ് നടത്തിയ അന്വേഷണത്തില്‍ ആ ഫോട്ടോയുടെ യഥാര്‍ത്ഥ സന്ദര്‍ഭം കണ്ടെത്താനായി. പട്‌നയില്‍ നടന്ന ഒരു കോണ്‍ഗ്രസ് പ്ലീനറി സമ്മേളനത്തില്‍ വലിയ വിഭാഗം പാര്‍ട്ടിക്കാര്‍ ബഹളമുണ്ടാക്കിയപ്പോള്‍ ക്ഷുഭിതനായി ആള്‍ക്കൂട്ടത്തിലേക്ക് ചാടിയിറങ്ങാന്‍ ശ്രമിച്ച നെഹ്‌റുവിനെ വേദിയിലെ മറ്റു നേതാക്കളും സുരക്ഷാ ഉദ്യോഗസ്ഥരും തടയുന്ന ഫോട്ടോ ആയിരുന്നു അത്. അസോസിയേറ്റ് പ്രസ് വാര്‍ത്താ ഏജന്‍സിയുടെ ആര്‍ക്കൈവില്‍ സൂക്ഷിച്ചിട്ടുണ്ട്. ബൂണ്‍ലൈവ് മാധ്യമം 1966 ജനവരി ആറാം തിയ്യതിയിലെ് ദി ഇന്ത്യന്‍ എക്‌സ്പ്രസ്സില്‍ പത്രത്തില്‍ ഇതുമായി ബന്ധപ്പെട്ട വാര്‍ത്ത കണ്ടെത്തുകയും പ്രസിദ്ധപ്പെടുത്തുകയും ചെയ്തു. 

ഒരു സമീപകാല അനുഭവം എടുത്തുപറഞ്ഞെന്നേ ഉള്ളൂ. ബൂംലൈവ് ഈ രംഗത്തെ ഒറ്റപ്പെട്ട സ്ഥാപനമല്ല. അടുത്തകാലത്തായി നിരവധി സ്ഥാപനങ്ങള്‍ സത്യാന്വേഷണ രംഗത്ത് സജീവമാണ്. മാധ്യമപ്രവര്‍ത്തകര്‍തന്നെ മുന്‍കൈ എടുത്ത് സ്ഥാപിച്ച ആദ്യത്തെ സത്യാന്വേഷണ സ്ഥാപനമാണ് ബൂണ്‍ലൈവ് എന്ന് അവരുടെ വെബ്‌സൈറ്റില്‍ അവകാശപ്പെടുന്നുണ്ട്. മാസ/ വര്‍ഷ വരിസംഖ്യ നല്‍കുന്നവര്‍ക്ക് വാട്‌സ്ആപ്പ് മുന്നറിയിപ്പുകളും സത്യാന്വേഷണ റിപ്പോര്‍ട്ടുകളും അവര്‍ അയച്ചുകൊടുക്കും.

ഈ പ്രവര്‍ത്തനം കാര്യക്ഷമമായി നടത്തുന്ന മറ്റൊരു സ്വതന്ത്ര സ്ഥാപനമാണ് ആള്‍ട്‌ന്യൂസ്‌ഡോട്ഇന്‍(altnews.inaltnews.in). 1,32,000 അനുയായികളുള്ള ഈ സത്യാന്വേഷണസ്ഥാപനം കക്ഷി രാഷ്ട്രീയ ഭേദമില്ലാതെ, സത്യത്തെക്കുറിച്ച് സംശയം തോന്നുന്ന ഏതു വാര്‍ത്തയെക്കുറിച്ചും അന്വേഷണം നടത്തി റിപ്പോര്‍ട്ടുകള്‍ പ്രസിദ്ധീകരിച്ചുവരുന്നു. എന്തു തരം അന്വേഷണമാണ് നടത്തിയതെങ്ങും എങ്ങനെയാണ് വിവരങ്ങള്‍ ശേഖരിച്ചതെന്നും വിശദമായി റിപ്പോര്‍ട്ട് ചെയ്യും. സുതാര്യതയ്ക്ക് ഇതാവശ്യമാണ് എന്നവര്‍ പറയുന്നു. ഗുജറാത്തില്‍ പൗരാവകാശരംഗത്തു പ്രവര്‍ത്തിക്കുന്ന നിര്‍ഝരി സിന്‍ഹയും അഹ്മദാബാദില്‍ പ്രവര്‍ത്തിക്കുന്ന ശാസ്ത്രജ്ഞന്‍ മുര്‍ലിധര്‍ ദിയോമുരാരിയുമാണ് ആ സ്ഥാപനത്തിന്റെ ഡയറക്റ്റര്‍മാര്‍. പൗരാവകാശപ്രവര്‍ത്തകനായ പ്രതിക് സിന്‍ഹയുടെ നേതൃത്വത്തിലാണ് എഡിറ്റോറിയല്‍, വിവരാന്വേഷണ പ്രവര്‍ത്തനങ്ങള്‍ നടക്കുന്നത്.

സംഘപരിവാര്‍ അതിന്റെ മുഖ്യശത്രുവായി കണക്കാക്കുന്നത് ആദ്യ പ്രധാനമന്ത്രി ജവഹര്‍ലാല്‍ നെഹ്‌റുവിനെയാണ്. സമത്വം, യുക്തിബോധം, മതനിരപേക്ഷത, മതസഹിഷ്ണത തുടങ്ങിയ നെഹ്‌റുവിയന്‍ ആശയങ്ങളോട് സംഘപരിവാര്‍ അസഹിഷ്ണത പുലര്‍ത്തുന്നതില്‍ അത്ഭുതമില്ല. നെഹ്‌റുവിനെ പരമാവധി ഇടിച്ചുതാഴ്ത്തുന്നതിനുള്ള വ്യാജകഥകളുടെ നിര്‍മാണശാലയായി സംഘപരിവാര്‍ ബുദ്ധിജീവി ആസ്ഥാനം മാറിയിട്ടുണ്ട്. നെഹ്‌റു രണ്ടു യുവതികളെ കെട്ടിപ്പിടിക്കുന്നതാണ്്(ഒരാള്‍ സഹോദി വിജയലക്ഷ്മി പണ്ഡിറ്റും മറ്റൊരാള്‍ മരുമകള്‍ നയന്‍താര സെഹ്ഗളുമാണ്)വളരെ മോശമായ അടിക്കുറിപ്പോടെയാണ് ഈ ഫോട്ടോ പ്രചരിപ്പിക്കപ്പെട്ടത്. യുദ്ധക്കുറ്റവാളിയായ സുഭാഷ് ചന്ദ്രബോസിനെ പിടികൂടണമെന്ന് ആവശ്യപ്പെട്ട് നെഹ്‌റു ബ്രിട്ടീഷ് പ്രധാനമന്ത്രിക്കയച്ചതായി കാണിക്കുന്ന കത്ത്, ഞാന്‍ വിദ്യാഭ്യാസം കൊണ്ട് ഇംഗ്ലീഷുകാരനും സംസ്‌കാരം കൊണ്ട് മുസ്ലിമും അബദ്ധവശാല്‍ ഹിന്ദുവും ആണെന്നു നെഹ്‌റു പറഞ്ഞതായ ഉദ്ദരണി തുടങ്ങി ഏഴ്് ഞെട്ടിക്കുന്ന പച്ചക്കള്ളങ്ങള്‍ ആള്‍ട്‌ന്യൂസ് പൊളിച്ചടുക്കിയിട്ടുണ്ട്.(https://www.altnews.in/never-ending-propaganda-to-malign-jawaharlal-nehru-an-alt-news-compilationhttps://www.altnews.in/never-ending-propaganda-to-malign-jawaharlal-nehru-an-alt-news-compilation/) ഈ വ്യാജവാര്‍ത്തകള്‍ കാണുന്ന ആര്‍ക്കും ഒറ്റ നോട്ടത്തില്‍തന്നെ അതിന്റെ നിജസ്ഥിതിയെക്കുറിച്ച് സംശയം തോന്നും. പക്ഷേ,  അത്രയെങ്കിലും സാമാന്യബുദ്ധിയുള്ളവരെയല്ലല്ലോ ചില പ്രസ്ഥാനങ്ങള്‍ ലക്ഷ്യമിടാറുള്ളത്.

ഒരു മുസ്ലിം പള്ളിയുടെ മുന്നില്‍ ബുര്‍ഖ ധരിച്ചുനില്‍ക്കുന്ന പുരുഷനെ കത്തിയുമായി പിടികൂടിയെന്നും അത് ആര്‍.എസ്.എസ് കാരനായിരുന്നു എന്നും പറയുന്ന വ്യാജവാര്‍ത്ത സംഘവിരുദ്ധര്‍ പ്രചരിപ്പിച്ചിരുന്നു. ആള്‍ട്‌ന്യൂസ് ആണ് അതിലെ കള്ളത്തരം കണ്ടെത്തിയത്. ആര്‍.എസ്.എസ് -ഹിന്ദുത്വവിരുദ്ധ വ്യാജവാര്‍ത്തകളും ഉണ്ടാകാറുണ്ട് എന്നു വ്യക്തം. പക്ഷേ, അവ എണ്ണത്തില്‍ കുറവാണ്.


ഇന്ത്യയില്‍ നടന്നുകൊണ്ടിരിക്കുന്ന വ്യാജവാര്‍ത്ത പ്രചാരണത്തിന്റെ ഉള്ളുകള്ളികള്‍ വെളിവാക്കുന്ന പുസ്തകം ആള്‍ട്‌ന്യൂസ് എഡിറ്റര്‍ പ്രതിക് സിന്‍ഹയും മറ്റു രണ്ടു പേരും ചേര്‍ന്ന് എഡിറ്റ് ചെയ്ത് പുറത്തിറക്കിയിട്ട് മാസങ്ങളേ ആയിട്ടുള്ളൂ. ഇന്ത്യ മിസ്ഇന്‍ഫോംഡ്്്:  ദി ട്രൂ സ്റ്റോറി എന്നാണ് പുസ്തകത്തിന്റെ ശീര്‍ഷകം

മോദി ആരാധകരുടെ വലിയ സംഘങ്ങളിലൂടെയാണ്  ദേശീയതലത്തിലുള്ള വ്യാജപ്രചാരണങ്ങളേറെയും നടക്കുന്നത്. പലതിന്റെയും നിര്‍മാതാക്കളും ഇവര്‍തന്നെ. 30 ലക്ഷം അംഗങ്ങളുള്ള 'വി സപ്പോര്‍ട്ട് നരേന്ദ്രമോദി' എന്ന ഫെയ്‌സ്ബുക് ഗ്രൂപ്പ് ആണ് ഇക്കാര്യത്തില്‍ മുന്നില്‍ നില്‍ക്കുന്നത് എന്ന് സ്‌ക്രോള്‍.ഇന്‍ പ്രസിദ്ധീകരിച്ച റിപ്പോര്‍ട് (https://scroll.in/article/919736/a-pro-modi-facebook-group-with-2-9-million-members-has-become-a-hotbed-of-fake-neswttps://scroll.in/article/919736/a-pro-modi-facebook-group-with-2-9-million-members-has-become-a-hotbed-of-fake-nesw)  ചൂണ്ടിക്കാട്ടുന്നു. 2016-ല്‍ പത്തു ലക്ഷം അംഗങ്ങളുണ്ടായിരുന്ന കാലത്തുതന്നെ ലോകത്തിലെ ഏറ്റവും വലിയ ഫെയ്‌സ്ബുക് ഗ്രൂപ്പ് ഇതാണെന്ന അവകാശവാദം ഉണ്ടായിരുന്നു.

ഈ മുഖ്യഗ്രൂപ്പില്‍ അംഗങ്ങളാണ് വേറെ 600 ഫെയ്‌സ്ബുക്ക് ഗ്രൂപ്പുകള്‍. ഏത് മുഖ്യധാര വാര്‍ത്താമാധ്യമത്തേക്കാള്‍ വേഗതയില്‍ എന്തു കഥയും കോടിക്കണക്കിന് ആളുകളിലേക്ക് എത്തിക്കാന്‍ ഈ ഗ്രൂപ്പുകള്‍ക്ക് കഴിയും. ഒരു മാധ്യമത്തിലും കണ്ടിട്ടും കേട്ടിട്ടുമില്ലാത്ത വ്യാജവാര്‍ത്തകള്‍ കുടുംബഗ്രൂപ്പുകളില്‍ വരെ എത്തിക്കാന്‍ സംഘപരിവാറിന് ഇപ്പോള്‍ വിപുലമായ സംവിധാനമുണ്ട്. വാട്‌സ്ആപ്പ് പോലുള്ള ഗ്രൂപ്പുകളുടെ വലിയ ഗുണം അല്ലെങ്കില്‍ ദോഷം വ്യാജം തിരിച്ചറിയാന്‍ ആഗ്രഹമുള്ളവരെയൊന്നും ആ ഗ്രൂപ്പില്‍ അംഗമാക്കുകയേ ഇല്ല എന്നതാണല്ലോ. കള്ളമാണെന്നു അറിഞ്ഞാലും ഒരാള്‍ക്ക് എന്തു ചെയ്യാന്‍ പറ്റും?

വ്യാജവാര്‍ത്താ പ്രതിരോധപ്രവര്‍ത്തനങ്ങളില്‍ അപൂര്‍വം മുഖ്യധാര ആനുകാലികങ്ങളും സജീവമായി പങ്കാളികളാകുന്നുണ്ട്. ഇന്ത്യാടുഡെയിലെ ഫാക്റ്റ് ചെക്ക് ( https://www.indiatoday.in/fact-check  സെക്ഷന്റെ പ്രവര്‍ത്തനത്തിലൂടെ നൂറുകണക്കിന് കള്ളക്കഥകളുടെ തൊലിയൂരിപ്പോയിട്ടുണ്ട്. ദ്ി ക്വിന്റ് എന്ന ഓണ്‍ലൈന്‍ മാധ്യമത്തില്‍ ഒരു സെക്ഷന്‍ -https://www.thequint.com/news/webqoof- വ്യാജവാര്‍ത്താന്വേഷണത്തിന് നീക്കിവച്ചിട്ടുള്ളതാണ്. വേറെയും ഓണ്‍ലൈന്‍ മാധ്യമങ്ങളില്‍ ഇത്തരം വിഭാഗങ്ങളുണ്ട്.

ഇത്രയും കാലം ഫോട്ടോഷോപ്പ് ആയിരുന്നു മിക്ക വ്യാജനിര്‍മിതികള്‍ക്കും വിശ്വാസ്യത നല്‍കിയിരുന്ന സാങ്കേതികവിദ്യ. ഫോട്ടോ കള്ളം പറയില്ല എന്നൊരു തത്ത്വം ഉണ്ടായിരുന്നു, മൂന്നു പതിറ്റാണ്ടുകള്‍ക്കു മുമ്പ്. ഇന്ന് ഫോട്ടോ കള്ളമേ പറയൂ എന്ന സ്ഥിതി ഉണ്ടായിക്കഴിഞ്ഞു. ഏതു ഫോട്ടോയും ഏതു രീതിയില്‍ മാറ്റാനും ഫോട്ടോഷോപ്പ് സാങ്കേതികവിദ്യക്കു കഴിയും. വ്യാജവാര്‍ത്താനിര്‍മാണം ഒരു പരിധി കൂടി മുന്നോട്ടു കടക്കുകയാണ്. ഫെയ്ക്കിനേക്കാള്‍ കഠിനമാണ് ഡീപ്പ് ഫെയ്ക് എന്നു വിളിക്കപ്പെടുന്ന വ്യാജ വീഡിയോ നിര്‍മാണം. അത്യാധുനികമായ ആര്‍ട്ടിഫിഷ്യല്‍ ഇന്റലിജന്‍സ് സങ്കേതങ്ങള്‍വരെ ഇതിനായി ഉപയോഗിക്കുന്നു. ഒറിജിനല്‍ വീഡിയോ അപ്പാടെ മാറ്റി പുതിയ കഥാപാത്രങ്ങളെ സൃഷ്ടിക്കുന്ന വീഡിയോകള്‍  ആരെക്കുറിച്ചും ഉണ്ടാക്കാം. സാമൂഹ്യമാധ്യമ ആചാര്യന്‍ സക്കര്‍ബര്‍ഗ്ഗിന്റെ വ്യാജശബ്ദവും വ്യാജമുഖവുമായി കൃത്രിമമായി ഉണ്ടാക്കിയത് കണ്ട് സക്കര്‍ബര്‍ഗ് തന്നെ ഞെട്ടിയിട്ടുണ്ട്. ദൈവംതമ്പുരാനു പോലും ഇത്തരം വീഡിയോകള്‍ തിരിച്ചറിയാനാവില്ല!

എല്ലാ കള്ളക്കഥകളുടെയും നിര്‍മാതാക്കള്‍ സംഘപരിവാറാണ് എന്ന് ധരിക്കാനാവില്ല. പക്ഷെ, ബഹുഭൂരിപക്ഷത്തിന്റെയും ഉത്ഭവകേന്ദ്രം ഈ പ്രത്യയശാസ്ത്രം പിന്തുടരുന്നരാണ് എന്നത് സത്യമാണ്. എന്നാല്‍, മതപരവും വാണിജ്യപരവും ആയ ലക്ഷ്യങ്ങളോടെ കള്ളക്കഥകളും വ്യാജശാസ്ത്രങ്ങളും വ്യാജരോഗശുശ്രൂഷയുമെല്ലാം ജനങ്ങളിലെത്തുന്നുണ്ട്. നമ്മുടെ ഉള്ളിലുള്ള വിശ്വാസങ്ങള്‍ക്കും അഭിപ്രായങ്ങള്‍ക്കും ഒത്തുനില്‍ക്കുന്നതാണ് ഒരു വാര്‍ത്ത/വീഡിയോ എങ്കില്‍ അതു വിശ്വസിക്കുകയും കണ്ണില്‍കണ്ടവര്‍ക്കെല്ലാം അയച്ചുകൊടുക്കുകയും ചെയ്യുക എന്നതാണ് പൊതുരീതി. ഒരു പ്രത്യേക ഉദ്ദേശ്യവും ഇല്ലാതെ ഫോട്ടോകളും വാര്‍ത്തകളും കൃത്രിമം കാട്ടി ആളുകളെ അമ്പരപ്പിക്കുക എന്നത് ഒരു വിനോദമാക്കി മാറ്റിയവരും ധാരാളമുണ്ട്. അവര്‍ക്ക് ദുരുദ്ദേശമുണ്ടാവില്ലായിരിക്കാം. എന്നാല്‍ അവരും അപകടകാരികളാണ്.

അച്ചടിക്കുന്നതെന്തും സത്യമാണ് എന്ന് ജനങ്ങള്‍ വിശ്വസിച്ചിരുന്ന ഒരു കാലമുണ്ടായിരുന്നു. ഇന്ന്്, ഇന്റര്‍നെറ്റില്‍ വരുന്നതെല്ലാം ആധികാരികവുമാണെന്നു വിശ്വസിക്കുന്നവര്‍ ധാരാളമാണ്. അതുണ്ടാക്കുന്ന വിപത്താവട്ടെ, മുന്‍പൊന്നുമില്ലാത്ത വിധം അതിമാരകവുമാണ്. ഈ പ്രവണതയെ നേരിടാന്‍ ഇതിന്റെ വാഹകരായ സോഷ്യല്‍ മീഡിയ വിചാരിച്ചാല്‍ സാധിക്കില്ല. സാമൂഹ്യമാധ്യമം ഉപയോഗിച്ച് നാടൊട്ടുക്കും മലിനമാക്കുന്ന വ്യാജവാര്‍ത്തകളുടെ സത്യാവസ്ഥ ജനങ്ങളില്‍ എത്തിക്കാന്‍ പരമ്പരാഗത മാധ്യമങ്ങള്‍ക്കു കഴിയുമോ എന്നറിയില്ല. അവര്‍ അതിനു ശ്രമിക്കുന്നു പോലുമില്ലല്ലോ.

( Padabhedam Oc 2019)
.

Tuesday, 1 October 2019

കേ.കോ കള്‍ എല്ലാം പിരിഞ്ഞുപോകട്ടെ..

കേ.കോ കള്‍ എല്ലാം പിരിഞ്ഞുപോകട്ടെ..


അപശബ്ദം
എന്‍പിയാര്‍

പാലായില്‍ യു.ഡി.എഫ് തോറ്റു എന്നു കേട്ടപ്പോള്‍ ജനം പൊതുവെ മുന്നണിഭേദമില്ലാതെ 'അതു നന്നായി' എന്നു പറഞ്ഞത്രെ. മുന്‍പൊന്നും ഇങ്ങനെ ഉണ്ടായതായി കേട്ടിട്ടില്ല തോറ്റ യു.ഡി. എഫ് സ്വതന്ത്രന്‍ അത്ര മോശക്കാരനായതാണ് ഈ അഭിപ്രായത്തിനു കാരണം എന്നു ധരിക്കരുത്. നന്നായി എന്നു പറഞ്ഞ മിക്ക ജനത്തിനും ജോസ് വക്കീലിലെ അറിയുക തന്നെയില്ല. അദ്ദേഹം എത്ര നല്ല ആളായിരുന്നാലും ശരി ഇത്തവണ പാലായില്‍ കേ.കോ പാര്‍ട്ടിക്കിട്ട് ഒന്നു കിട്ടണമെന്ന് ജനങ്ങള്‍ക്കിടയില്‍ അഭിപ്രായമുണ്ടായിരുന്നു. പാലായ്ക്കു പുറത്തുള്ള പൊതുജനത്തിന്റെ കാര്യമാണ് പറഞ്ഞത്.

സഹിക്കാന്‍ മേലാഞ്ഞിട്ടു തന്നെയാണ് തോറ്റതുനന്നായി എന്നു യു.ഡി.എഫുകാര്‍ പോലും പറഞ്ഞത്. കേ.കോ പാര്‍ട്ടികളുടെ വക എന്തെല്ലാം ഇനം കോള്‍ക്കളിയും  കൈകൊട്ടിക്കളിയും കണ്ണുപൊത്തിക്കളിയും പല ഇനം കാലുവാരല്‍കളിയും പാര്‍ട്ടി ജനിച്ച കാലം മുതല്‍ ജനം കാണുന്നുണ്ട്. കുത്തിത്തിരിപ്പു കൊണ്ട് പാര്‍ട്ടി എത്രവട്ടം പിളര്‍ന്നു എന്നോ സ്ഥാനമോഹം തലയ്ക്കു പിടിച്ചപ്പോള്‍ വീണ്ടു ലയിച്ചെന്നോ ഉള്ള കണക്ക് ആരുടെയും കൈവശവുമില്ല. കേ.കോകാരുടെ ഇത്തരം കളിതമാശകള്‍ എത്ര കണ്ടാലും കേരളീയര്‍ ഞെട്ടാറില്ല, ചിരിക്കാറേയുള്ളൂ. ചെറിയ ഡോസില്‍ രോഗാണുക്കളെ കുത്തിവെച്ചാല്‍ ഏതു രോഗത്തിനെതിരെയും ക്രമേണപ്രതിരോധശേഷി ഉണ്ടാക്കാമെന്നെ ശാസ്ത്രതത്ത്വമാണ് ഇവിടെയും പ്രാബല്രയത്തില്‍ വരുന്നത്. അതുകൊണ്ടാണ് കേ.കോ പാര്‍ട്ടിക്കാര്‍ എന്തു പോക്രിത്തരം കാണിച്ചാലും ജനം സഹിക്കുന്നത്്. ഇത്തവണ ആ പരിധിയും കടന്നുപോയി ചേട്ടാ, കടന്നു പോയി.

കെ.എം മാണിയുടെ ഒടുവിലത്തെ ജയത്തേക്കാള്‍ വളരെയൊന്നും നാണംകെട്ടതല്ല ഇത്തവണത്തെ തോല്‍വി  എന്നു വേണമെങ്കില്‍ ആശ്വസിക്കാം. ഇക്കളിയെല്ലാം കളിച്ചിട്ടും കെട്ടിവച്ചതു തിരിച്ചുകിട്ടിയത് അത്ഭുതം തന്നെ എന്നു ആശ്വസിക്കുന്നവരും കാണും.

പല അപൂര്‍വതകള്‍ കേ.കോ തോല്‍വിക്കു മകുടം ചാര്‍ത്തുന്നുണ്ട്. കെ.എം മാണിയുടെ മണ്ഡലത്തില്‍, അദ്ദേഹത്തിന്റെ മരണാനന്തരമുള്ള ആദ്യ തിരഞ്ഞെടുപ്പില്‍ പാര്‍ട്ടിക്കു നാണം മറയ്ക്കാന്‍ രണ്ടില ഉണ്ടായില്ല എന്നതുതന്നെ ഏറ്റവും സങ്കടകരമായ അപൂര്‍വത. വോട്ടെണ്ണിയ ശേഷവും അതു മറയ്‌ക്കേണ്ട ആവശ്യം വരും എന്ന് അന്നോര്‍ത്തിരുന്നില്ല. ചിഹ്നം  മരത്തില്‍നിന്നു ഉണങ്ങി വീണുപോയതൊന്നുമല്ല. ബഹുമാനപ്പെട്ട നേതാക്കള്‍ മേശയിലിട്ടു പൂട്ടിയതാണ്. എന്നിട്ടും ഇത്രയും ജനം കൈതച്ചക്കു കുത്തി എന്നതാണ് അത്ഭുതം. എന്തൊരു മഹാമനസ്‌കത. ഒരു തിരഞ്ഞെടുപ്പിനു തൊട്ടുമുമ്പ്് മുന്‍കാലത്തൊന്നും ഒരു പാര്‍ട്ടിയും ഇത്ര ആവേശപൂര്‍വം തമ്മിലടിച്ചിട്ടില്ല. ജോസഫ് ചെല്ലുന്നേടത്തെല്ലാം മാണിപുത്രന്റെ ഗ്രൂപ്പുകാരും മറിച്ചും സംഘടിച്ചുചെന്ന് കൂക്കൂവിളിച്ചത് ജയസാധ്യത കുറച്ചൊന്നുമല്ല വര്‍ദ്ധിപ്പിച്ചത്.

പിന്നെയെന്താണ്, പഴയ പോലുള്ള അനുസരണബോധം വോട്ടര്‍മാര്‍ക്കില്ല. നേതാക്കളുടെ കല്പന അപ്പടി അനുസരിക്കുക, പട്ടിണി കിടന്നിട്ടായാലും പ്രചാരണം നടത്തുക തുടങ്ങിയ സത്സ്വഭാവങ്ങളൊന്നും ഇപ്പോള്‍ ഇല്ലെന്നു മാത്രമല്ല, കൊടുക്കാനുള്ളതു കൊടുത്തില്ലെങ്കില്‍ പണി തരുകയും ചെയ്യും. കേ.കോ വോട്ടിനു മാത്രമല്ല എല്ലാ പാര്‍ട്ടി വോട്ടിനും ഇതു ബാധകമാണ്. 33000 വോട്ടിന്റെ ഭൂരിപക്ഷം നാലുമാസത്തിനിടയില്‍ മൂവായിരമായി കുറഞ്ഞത് ലോകറെക്കോഡ് ആണ്.  ഇതുകൊണ്ടൊന്നും കേ.കോ പാര്‍ട്ടിക്കാര്‍ ഒരു പാഠവും പഠിക്കില്ല എന്നാണ് ലഭ്യമായ വിവരങ്ങള്‍ സൂചിപ്പിക്കുന്നത്. തമ്മിലടിയുടെ പേനാക്കത്തിക്കു പൂര്‍വാധികം മൂര്‍ച്ച വരുത്തയിട്ടുണ്ട്.

ഫലമറിഞ്ഞപ്പോള്‍ അങ്ങനെത്തന്നെ വേണം എന്ന്  ഏറ്റവും ഉച്ചത്തില്‍ പറഞ്ഞത് ആരാവും? പി.ജെ ജോസഫ് അല്ലാതെ വേറെ ആര്! ആ പാവത്താനെ കെട്ടിയിടാന്‍ ഒരു വര്‍ക്കിങ് ചെയര്‍മാന്‍ പോസ്റ്റ് നാട്ടിക്കൊടുത്തിരുന്നുവെങ്കില്‍ ഈ നാണക്കേട് ഉണ്ടാകുമായിരുന്നോ? അദ്ദേഹം തന്നെയാണ് ഈ ചോദ്യം റിസള്‍ട്ട് വന്ന ഉടന്‍ ഉറക്കെ ചോദിച്ചത്. സത്യമാണ്. മാണിപുത്രന് ഇതൊരു വിഷയമല്ല. ചിഹ്നം കിട്ടാതെ പോയതാണ് അദ്ദേഹത്തിന്റെ മുഖ്യപ്രശ്‌നം. അതായത് വോട്ടിങ്ങ് യന്ത്രത്തില്‍ രണ്ടില കാണാഞ്ഞതില്‍ ക്ഷുഭിതരായ കുറെ നിരക്ഷര പാലാക്കാര്‍ ചക്ക പോലെയുള്ള എന്തോ ചിഹ്നം കണ്ടിട്ടും അതില്‍ കുത്താതെ വേറൊരു ക്ലോക്കില്‍ ആഞ്ഞുകുത്തി ദ്വേഷ്യം തീര്‍ത്തതാണ് പരാജയകാരണം. വേറെ കാരണമൊന്നും അദ്ദേഹം നോക്കിയിട്ട് കാണാനില്ല.

ഉടനെ കേ.കോ പാര്‍ട്ടികളുടെ എണ്ണത്തില്‍ ഒന്നിന്റെയോ രണ്ടിന്റെയോ വര്‍ദ്ധന് പൊതുജനം പ്രതീക്ഷിക്കുന്നുണ്ട്്. അതാണ് കീഴ്‌വഴക്കം. ക്രമേണ അതു വര്‍ദ്ധിക്കും. മാണിസാര്‍
 ഇല്ലാത്തതുകൊണ്ട് ആരെയും പേടിക്കാനില്ല. കെ.കോ പെരുകി, ആളെണ്ണം പാര്‍ട്ടി എന്ന സുന്ദരാവസ്ഥയിലെത്തും. ഇങ്ങനെ പെരുകുന്നതിലും നല്ലത് കേ.കോ പാര്‍ട്ടികളെല്ലാം സ്വമേധയാ സമാധാനപരമായി പിരിഞ്ഞുപോവുകയാണ്്. അറുപതുകളിലും അതിനു ശേഷവും കോണ്‍ഗ്രസ് വിട്ട് രൂപം കൊണ്ട് പ്രാദേശിക കോണ്‍ഗ്രസ്സുക്കു വംശനാശം സംഭവിക്കുകയാണ് ഉണ്ടായത്. കോണ്‍ഗ്രസ് തന്നെ മിക്കയിടത്തും ഇല്ലാതായി, പിന്നെയെന്തിന്.....

മുന്‍കൂര്‍ വിവാദം
അവാര്‍ഡ് പ്രഖ്യാപിച്ചതിനു ശേഷം വിവാദം എന്നതാണ് പരമ്പരാഗത രീതി. വയലാര്‍ അവാര്‍ഡ് കാര്യത്തില്‍ ബഹുമാന്യനായ സാനുമാസ്റ്റര്‍ അതു ലംഘിച്ചു. അദ്ദേഹം അവാര്‍ഡ് പ്രഖ്യാപിക്കുംമുന്‍പ് വിവാദത്തിനു തിരി കൊളുത്തി. വേറൊരു പരമ്പരാഗതരീതിയും അദ്ദേഹം ലംഘിച്ചതായി കാണാം. അവാര്‍ഡ് കമ്മിറ്റി ചെയര്‍മാന്‍തന്നെ അവാര്‍ഡിനെക്കുറിച്ചുള്ള വിവാദം ഉദ്ഘാടനം ചെയ്തു. അല്ല, അങ്ങനെ പാടില്ലെന്നു ചട്ടമൊന്നുമൊന്നുമില്ലല്ലോ.

അതുരണ്ടും പോരെങ്കില്‍ ഇതാ വിവാദം ഒന്നു കൂടി. ചെയര്‍മാന്‍ എന്തിനു രാജിവെച്ചു എന്ന പ്രശ്‌നത്തിലാണ് അത്. ആരോഗ്യപരമായ കാരണത്താലാണ് രാജിയെന്നാണ് ചെയര്‍മാന്‍ പറഞ്ഞത്. സാഹിത്യഅവാര്‍ഡ് നിര്‍ണയത്തിനു വലിയ ആരോഗ്യമൊന്നും ആവശ്യമുള്ളതായി കേട്ടിട്ടില്ല. നല്ല പുസ്തകത്തിനു നല്‍കാതെ മോശം പുസ്തകത്തിനാണ് നല്‍കാന്‍ പോകുന്നത് എന്നു പറഞ്ഞാല്‍ അതിനര്‍ത്ഥം വായന എന്ന കടുപ്പമുള്ള പണി കഴിഞ്ഞു എന്നാണ്. പിന്നെയെന്താണ് ആരോഗ്യം കൊണ്ട് വേണ്ടത്? മറ്റേ രണ്ട് അംഗങ്ങളെ കൈകാര്യം ചെയ്യാന്‍ വേണ്ട ആരോഗ്യം ഇല്ല എന്നു പറഞ്ഞാല്‍ മനസ്സിലാക്കാം. സാനുമാസ്റ്റര്‍ അങ്ങനെ പറയുന്നുമില്ല. എന്നാല്‍, ആരോഗ്യം വേണ്ടത് ഇത്തരം വിഷയത്തില്‍ വിവാദം ഉണ്ടാക്കാനാണ്. പ്രസ്താവന നടത്താനും മാധ്യമങ്ങളെ കാണാനും ചോദ്യങ്ങള്‍ക്കു മറുപടി പറയാനും വിവാദത്തിന്റെ ചൂടും പുകയും നേരിടാനുമൊക്കെയാണ് അതു വേണ്ടത്. അതും മാസ്റ്റര്‍ അനായാസേന കൈകാര്യം ചെയ്തു.

അവസാനം സാനുമാസ്റ്റര്‍ നിര്‍ദ്ദേശിച്ച ആള്‍ക്കുതന്നെ അവാര്‍ഡ് കിട്ടി. ഇനി വിവാദമില്ലെന്നും ഇല്ല,  ആ അദ്ധ്യായം അടച്ചു എന്നാണ് മാസ്റ്റര്‍ പറഞ്ഞത്. അങ്ങനെ തുറക്കാന്‍ പറയുമ്പോള്‍ തുറക്കുന്നതും അടക്കാന്‍ പറയുമ്പോള്‍ അടയുന്നതുമല്ലല്ലോ ഈ വിവാദങ്ങളൊന്നും. അവാര്‍ഡ് കമ്മിറ്റിക്കാരേക്കാള്‍ മാന്യന്മാരാണ് അവാര്‍ഡിനു പരിഗണിക്കപ്പെട്ടവരെന്നത് ഭാഗ്യം. ഇല്ലെങ്കില്‍ കുറെനാള്‍ കത്തിനില്‍ക്കുമായിരുന്നു സംഗതി. 

സുപ്രിം കോടതി ഇറങ്ങിവരട്ടെ
എക്‌സിക്യൂട്ടീവ് ഇടപാടുകള്‍ നടത്തി ശീലമില്ലാഞ്ഞിട്ടാവണം കോടതിക്ക് ചില തിരിച്ചറിവുകളുണ്ടാകാന്‍ വൈകിയത്. ജീവിതകാല സമ്പാദ്യം മുഴുവന്‍ മുടക്കി പാര്‍പ്പിടം വാങ്ങിയവര്‍ നാളെ സുപ്രിം കോടതിക്കു മുന്നില്‍ തൂങ്ങിച്ചാവുന്ന അവസ്ഥ ഉണ്ടാകരുതല്ലോ. ഇത്തരം ബാധ്യതകളൊന്നും ഭരണഘടന ജുഡീഷ്യറിയുടെ ചുമലില്‍ വെച്ചുകെട്ടിയിരുന്നില്ല. ഇതൊക്കെ എക്‌സിക്യൂട്ടീവിന്റെ പൊല്ലാപ്പുകളാണ്. സര്‍വകക്ഷിയോഗം വിളിക്കാന്‍ ചീഫ് ജസ്റ്റിസിനു പറ്റില്ലല്ലോ. എന്തായാലും ഇപ്പോള്‍ നഷ്ടപരിഹാരം തുടങ്ങി പല പ്രഖ്യാപനങ്ങളും വന്നതില്‍ എല്ലാവര്‍ക്കുമുണ്ട് സന്തോഷം.

 കിടപ്പാടം നഷ്ടപ്പെടുന്നവര്‍ക്കു നഷ്ടപരിഹാരം, വേറെ താമസത്തിനു സൗകര്യം, കരാറുകാരില്‍ നിന്നു നഷ്ടപരിഹാരം ഈടാക്കല്‍, കെട്ടിടം പണിയാന്‍ വേറെ സ്ഥലം കണ്ടെത്തില്‍, കെട്ടിടം ബോംബിട്ടു പൊട്ടിക്കുമ്പോള്‍ കോണ്‍ക്രീറ്റ് വീണു ചാവുന്ന തദ്ദേശീയ മൃഗ-മനുഷ്യജാതികള്‍ക്കു സഹായം, ശിഷ്ടം കോണ്‍ക്രീറ്റ് കുഴിച്ചുമൂടാന്‍ അറബിക്കടലില്‍ വലിയ ഗുഹകള്‍ ണ്ടെത്തല്‍.....ഇനിയും എന്തെല്ലാം പൊല്ലാപ്പുകള്‍ കിടക്കുന്നു.
അതിനുമുന്‍പുവേണം ഇതേ സ്ഥലത്ത് വേണം വേറെ ഫ്‌ളാറ്റ് പണിയാന്‍, അതേ നിയമവിധേയമായിത്തന്നെ പണിയാം. അന്നു കെട്ടിടം പണിയാന്‍ അനുമതി ഇല്ലാതിരുന്ന സ്ഥലം, ഇനി അനുമതി കിട്ടിയാല്‍ കെട്ടിടം പണിയാവുന്ന ഉടമാണ്. അനുമതി കോടതി തരും. ചട്ടം മാറ്റുംമുമ്പാണ് അവര്‍ പണിതത്. അതു പൊളിക്കണം. ഭിക്ഷയില്ല എന്നു പറയേണ്ടത് തിരുമേനിയാണ്, കാര്യസ്ഥനല്ല. 

മുനയമ്പ്
മത്സരിക്കാന്‍ സമ്മതം കൊടുത്തിട്ടും കുമ്മനം സ്ഥാനാര്‍ത്ഥിലിസ്റ്റിലില്ലാത്തതില്‍ പാര്‍ട്ടിയില്‍ പരിഭവം.
* പാവത്തിനെ ഇത്തവണയെങ്കിലും കഷ്ടപ്പെടുത്തേണ്ട എന്നു വിചാരിച്ചതാവും കേന്ദ്രനേതാക്കള്‍. എന്തുചെയ്യും, അതും കുറ്റമായി.


Tuesday, 24 September 2019

എട്ടുനിലയിലെ അടിപൊളി നിയമപാലനം

എട്ടുനിലയിലെ അടിപൊളി നിയമപാലനം



അടിപൊളിയും അടിച്ചുപൊളിയുമൊന്നും വെറും ന്യൂജന്‍ വാക്കുകള്‍ മാത്രമല്ല. കാലത്തിന്റെ വിളിയാണ്. മരട് കെട്ടിടങ്ങളും പാലാരിവട്ടം പാലവും സൂചനകാളാണ്, സൂചനമാത്രം. ന്യൂജന്‍ കൂട്ടരെയും പാര്‍ട്ടികളെയും വിട്. സുപ്രിം കോടതിയും അടിച്ചുപൊളി ലൈനിലാണ് പോക്ക്.

ഒന്നാലോചിച്ചു നോക്കിയേ....ഏതോ രണ്ടുനില കെട്ടിടം പൊളിക്കുന്ന ലാഘവത്തോടെയല്ലേ മരട് ഭൂമിയിലെ ഫ്‌ളാറ്റുകളെല്ലാം ഫ്‌ളാറ്റാക്കാന്‍ നമ്മള് പുറപ്പെടുന്നത്. ഏതെങ്കിലും കരാറുകാരനെയും നൂറു ബംഗാളികളെയും വിട്ടാല്‍ വൈകുന്നേരമാവുമ്പോഴേക്കും പൊളിച്ചിടാം എന്നാരോ കരാറെടുത്തതായി തോന്നുന്നുണ്ട്. മൊത്തം കെട്ടിടങ്ങളുടെ കോണ്‍ക്രീറ്റ് പണി തന്നെ വരും ഒരു മലയോളം. പിന്നെ ഇരുമ്പുകമ്പികളും പലകകളും മറ്റു മറ്റും. മണ്‍വെട്ടിയും വെട്ടുകത്തിയുമെടുത്ത് പൊളിച്ചാല്‍ തീരാന്‍ യുഗങ്ങളെടുക്കും. സംഗതി ബുദ്ധിമുട്ടാണെങ്കില്‍ ഒരു വഴിയുള്ളത് പ്രതിരോധവകുപ്പിന്റെ സേവനം ആവശ്യപ്പെടുകയാണ്. വെരി ഈസി...കിടിലന്‍ ബോംബുകള്‍ ആഭ്യന്തരമായി ഉദ്പാദിപ്പിക്കുന്നുണ്ട്. നല്ലതു നോക്കി അഞ്ചെട്ടെണ്ണം യുദ്ധവിമാനം വഴി വിക്ഷേപിച്ചാല്‍ എട്ടുനിലയായാലും പത്തുനിലയായാലും എട്ടുനിലയില്‍ പൊട്ടും. സംഗതി ക്ലീനാകും....

അങ്ങനെ സംഗതി അടിപൊളിയാക്കുമ്പോള്‍ കെട്ടിടത്തിന്റെ തവിടുപൊടിയെല്ലാം പ്രദേശത്ത് വമ്പിച്ച പരിസ്ഥിതി പ്രശ്‌നങ്ങള്‍ ഉണ്ടാക്കുമെന്നൊരു ദുര്‍വ്യാഖ്യാനം പ്രചരിക്കുന്നുണ്ട്. അതിനെക്കുറിച്ച് കോടതിയോട് ചോദിക്കാന്‍ ഫ്‌ളാറ്റ് മാഫിയയുടെ ശിങ്കിടികളും ചില പരിസ്ഥിതി വക്കീലന്മാരും ഒരുമ്പെടുന്നുണ്ട് എന്നാണ് സംസാരം. കാര്യമില്ല. പൊടിപടലങ്ങളെക്കുറിച്ചോ കരിങ്കള്‍പാളികളെക്കുറിച്ചോ ഒന്നും ഐ.പി.സി, സി.ആര്‍.പി.സി, ബില്‍ഡിങ്ങ് ആക്റ്റ് എന്നിവയിലൊന്നുമില്ല. ഭരണഘടനയില്‍പോലുമില്ല. അതുകൊണ്ട് അതുപറഞ്ഞ് തടസ്സവാദമൊന്നും ഉന്നയിക്കേണ്ട. പൊളിക്കാന്‍ പറഞ്ഞാല്‍ പൊളിക്കണം. പൊടി സംബന്ധിച്ച ഹരജി പിന്നെ ഫയലാക്കിയാല്‍ മതി. 

അതിനിടെ ഒരു കാര്യം വിട്ടുപോയി. ഈ ഫ്‌ളാറ്റ് കെട്ടിടങ്ങളില്‍ കുറെ മനുഷ്യര്‍ താമസിക്കുന്നുണ്ടത്രെ. എന്തോ, കോടതിയില്‍ ഹാജരാക്കിയ കടലാസ്സുകളില്‍ ഒന്നും താമസക്കാരുടെ പേരില്ല. താമസക്കാരൊന്നും കേസ്സില്‍ കക്ഷികളല്ല. അപ്പോള്‍ പിന്നെ വിധിയില്‍ അവരെ എന്താക്കണം എന്നു കൃത്യമായി പറയാഞ്ഞതില്‍ തെറ്റില്ല. ഇനി അങ്ങനെ കുറെ ആളുകള്‍ അതിലുണ്ടെന്നു തന്നെ വെക്കുക. പൊളിക്കുന്ന സമയത്ത് അവരോട് പുറത്തിറങ്ങി നില്‍ക്കാന്‍ പറഞ്ഞാല്‍ പോരെ? സുപ്രിം കോടതി പറഞ്ഞിട്ടു പൊളിക്കുകയാണ് എന്നു അറിയിച്ചാല്‍ അവര്‍ അനുസരിക്കാതിരിക്കില്ല. അല്ലെങ്കിലും സുപ്രിം കോടതിയെ അനുസരിക്കാതിരിക്കാന്‍ നമുക്ക് പറ്റില്ലല്ലോ. മരട് ശബരിമലയല്ലല്ലോ.

ഇക്കാര്യം സംബന്ധിച്ച് കേരളത്തിലെ ഇടതുമുന്നണി ഏകോപനസമിതി കണ്‍വീനര്‍ എ. വിജയരാഘവനോട് ഒരു കണ്‍സള്‍ട്ടേഷന്‍ നടത്തുന്നത് പ്രയോജനപ്രദമായിരിക്കും. 'കോടതിവിധി യാന്ത്രികമായി നടപ്പാക്കാന്‍ പറ്റില്ല. മരട് ഫ്‌ളാറ്റുകള്‍ പൊളിക്കാനുള്ള വിധി അവിടെ താമസിക്കുന്നവര്‍ക്ക് ബുദ്ധിമുട്ടില്ലാത്ത വിധം നടപ്പാക്കണമെന്നാണ് തങ്ങളുടെ നയം'-അദ്ദേഹം കഴിഞ്ഞ ദിവസം ഒരു മാധ്യമസമ്മേളനത്തില്‍. വിശദീകരിച്ചിരുന്നു. പൊതുവെ വിവരദോഷികളായ ലേഖകന്മാരില്‍ ചിലര്‍ക്ക് ഇതിന്റെ അര്‍ത്ഥം പിടികിട്ടിയില്ല. എങ്ങനെയാണ് പൊളിക്കുക എന്നവര്‍ ചോദിച്ചപ്പോള്‍ കണ്‍വീനര്‍ കൃത്യമായ മറുപടി പറഞ്ഞു.'അതാണ് തങ്ങള്‍ പരിശോധിക്കുന്നത്!!' പരിശോധിച്ചാല്‍ കണ്ടെത്താതിരിക്കില്ല. കുന്തം പോയാല്‍ കുടത്തിലും തപ്പണം. താമസക്കാരുടെ രോമത്തിനു കേടു പറ്റാതെ കെട്ടിടം പൊളിക്കുന്ന യന്ത്രം കണ്ടെത്തുകയാണെങ്കില്‍ വിവരം മാധ്യമദ്വാരാ അറിയിക്കുമായിരിക്കും. പൊളിയന്മാര്‍ ശ്രദ്ധിച്ചോണം.

വളരെ പ്രായോഗികമതികളും കുബുദ്ധിജീവികളുമാണല്ലോ നമ്മടെ നേതാക്കള്‍. ശബരിമലവിധിയും ഇതുപോലൊരു കുടുക്കുമസാല വിധിയായിരുന്നു. അന്നും ഭരണകൂടം ഇതേ സമീപനമാണ് സ്വീകരിച്ചത്. കോടതിവിധിയും തള്ളാന്‍ പറ്റില്ല, വിശ്വാസികളെയും തള്ളാന്‍ പറ്റില്ല.പക്ഷേ, യാന്ത്രികമായി നടപ്പാക്കാന്‍ പറ്റില്ല. എന്തേയ്...യാന്ത്രികമായി നടപ്പാക്കാന്‍ പറ്റില്ലാന്ന്. അതെന്താണ് കുന്ത്രാണ്ടം എന്നു ചോദിക്കരുത്. ശബരിമലയില്‍ കണ്ടതുതന്നെ. ആചാരാനുഷ്ഠാനങ്ങളെല്ലാം പാലിച്ച് വന്ന വനിതാതീര്‍ത്ഥാടകരെ അങ്ങോട്ട് കയറാന്‍ സമ്മതിച്ചില്ല. പകരം, നല്ല ഒന്നാന്തരം അവിശ്വാസിനികളെ ഉടുക്കുവഴികളിലൂടെ നാലാള്‍ കാണാതെ കയറ്റുകയും ചെയ്തു. കോടതിവിധി നടപ്പാക്കിയോ എന്നു ചോദിച്ചാല്‍ നടപ്പാക്കി എന്നുതന്നെ ഉത്തരം. യാന്ത്രികമായി നടപ്പാക്കിയോ എന്നു ചോദിച്ചാല്‍ ഇല്ല, യന്ത്രങ്ങളൊന്നും ഉപയോഗിച്ചില്ല എന്നുത്തരം. കൂടുതല്‍ വിവരങ്ങള്‍ക്കും വ്യാഖ്യാനങ്ങള്‍ക്കും ഇടതുമുന്നണി കണ്‍വീനറും യാന്ത്രിക ബുദ്ധിജീവിയുമായ എ.വിജയരാഘവനുമായി ബന്ധപ്പെടുക.

മരടിലേക്കു മടങ്ങാം. കോടതിയുടെ ഈ പൊളിപ്പന്‍ പരിപാടി രാജ്യവികസനത്തില്‍ അടിയുറച്ചുവിശ്വസിക്കുന്ന ചില മഹാത്മാക്കള്‍ക്ക് ഒട്ടും രുചിച്ചിട്ടില്ല. കോടതിയെന്തിനു പൊളിക്കാന്‍ പുറപ്പെടുന്നു എന്നതാണ് അവരുടെ ചോദ്യം. ഓവര്‍സ്പീഡില്‍ വണ്ടിയോടിച്ചാല്‍ വണ്ടി പൊളിച്ചുകളയുന്നുണ്ടോ ? ഒരു പിഴ ഈടാക്കുന്നല്ലേ ഉള്ളൂ. അതുതന്നെ യാന്ത്രികമായൊന്നും നടപ്പാക്കില്ല. കൂടിപ്പോയെന്നു തോന്നിയാല്‍ ഉടനെ സംസ്ഥാനസര്‍ക്കാറുകളും മറ്റും മറ്റും ഇടപെട്ടു കുറപ്പിച്ചോളും. അതുപോലെയാണ് പരിസ്ഥിതി നിയമലംഘനത്തിന്റെയും കാര്യം. അനധികൃതനിര്‍മിതി പൊളിക്കണം എന്നു പറഞ്ഞാല്‍ അതു യാന്ത്രികമായിപ്പോകും. നല്ല തുക പിഴ മതി. അതുതന്നെ വേണമെങ്കില്‍ സംസ്ഥാനങ്ങള്‍ക്കു കുറപ്പിക്കാം.

അതിനിടയില്‍ കുറെ മണ്ടന്മാര്‍ വേറെ ഒരു ചോദ്യം ചോദിക്കുന്നുണ്ട്. മുന്‍സിഫ് കോടതി മുതല്‍ സുപ്രിം കോടതി വരെയും കാക്കത്തൊള്ളായിരം കമ്മീഷനുകളും ഉദ്യോഗസ്ഥരുമെല്ലാം കണ്ണുമിഴിച്ച് നോക്കിനില്‍ക്കെ എങ്ങനെയാണ് ഈ കെട്ടിടങ്ങളെല്ലാം ഉയര്‍ന്നു വന്നത് എന്നതാണ് ആ ചോദ്യം. കെട്ടിടം പണിയുമ്പോള്‍ അവര്‍ ടാര്‍പോളിന്‍ ഷീറ്റ് കൊണ്ട് മറച്ചാണ് പണി ചെയ്തിരുന്നത്,അതുകൊണ്ടൊന്നും കണ്ടില്ല എന്നു പറയരുത്. നിയമലംഘനമാണ്, തടയണം, പൊളിക്കണം എന്നെല്ലാമുള്ള തര്‍ക്കങ്ങള്‍ സര്‍ക്കാറിലും കോടതിയിലും നടക്കുമ്പോള്‍ ആരുംകാണാതെ കൊണ്ടുവന്നു നാട്ടിയതല്ല കെട്ടിടങ്ങള്‍. സകലമാന പെര്‍മിറ്റുകളും ലൈസന്‍സുകളും വാങ്ങി വര്‍ഷങ്ങളെടുത്ത്്് പടിപടിയായാണ് പണിതത്്. പണി തീര്‍ന്നപ്പോഴാണ്, ശരി ഇനി നമുക്ക് പൊളി തുടങ്ങാം എന്നു തീര്‍പ്പായത്. ഈ കൊടുംപാതകത്തിന് ആരെല്ലാമാണ് ഉത്തരവാദികളെന്ന് ആരും തിരക്കരുത്. വിശുദ്ധപശുക്കള്‍ നിരവധി ലിസ്റ്റിലുണ്ടാകും. പറഞ്ഞാല്‍ പറഞ്ഞവന്‍ കുടുങ്ങും. മൗനം വിദ്വാന് ഭൂഷണം. നിങ്ങളായി നിങ്ങടെ പാടായി....

വ്യാകരണം വിട്ട് കളിയില്ല
കാര്യക്ഷമമായ വിദ്യ അഭ്യാസത്തിന്റെ പേരില്‍ ലോകപ്രശസ്തി നേടിയ ദ യൂണിവേഴ്‌സിറ്റി കോളജില്‍ ദ യൂണിയന്‍ തിരഞ്ഞെടുപ്പില്‍ മത്സരിക്കുന്ന ദ കാന്‍ഡിഡേറ്റ്‌സില്‍  ചിലര്‍ ദ നോമിനേഷന്‍ പേപ്പറില്‍ സ്ഥാനങ്ങളുടെ പേരിനു മുന്നില്‍ ദ ചേര്‍ക്കാതിരുന്നത് ആരെന്തൊക്കെ പറഞ്ഞാലും ഗുരുത്വദോഷം തന്നെയാണ്. ഇത്ര കഷ്ടപ്പെട്ട് ഭാഷയും വ്യാകരണവുമെല്ലാം പഠിപ്പിച്ചിട്ടും അവര്‍ അങ്ങനെ ചെയ്തല്ലോ എന്നോര്‍ത്ത് സങ്കടം സഹിക്കാതെയാവണം ആ വ്യാകരണമൗലികവാദി പത്രിക തള്ളിയത്. അതു ക്ഷമിക്കാവുന്ന കുറ്റം മാത്രമാണത്. ആത്മാര്‍ത്ഥത കൂടിപ്പോയതുകൊണ്ട് ചെയ്തതാണ്. ആരുടെയെങ്കിലും പത്രിക തള്ളിച്ച്്് ദ ഇലക്ഷന്‍ ഫലത്തെ സ്വാധീനിക്കുക എന്ന ഉദ്ദേശ്യമൊന്നും അവര്‍ക്കുണ്ടാകാനിടയില്ല. അതിനുള്ള പണി ചെയ്യാന്‍ മിടുക്കന്മാര്‍ വേറെയുണ്ട്. വന്ദ്യഗുരുക്കന്മാരെക്കൊണ്ട് അതൊന്നും ചെയ്യിക്കയില്ല.
ഇത്രയും സംഭവിച്ചുകഴിഞ്ഞപ്പോള്‍ ഇനി ദ ഇല്ലെങ്കിലും കുഴപ്പമില്ല എന്നു വിദ്യാഭ്യാസവകുപ്പ് തീരുമാനിച്ചതായൊന്നും ദ സറ്റുഡന്റ്്‌സ് ധരിച്ചേക്കരുതേ. എവിടെയെല്ലാം വയ്ക്കണമെന്നു ക്ലാസ്സില്‍ പറഞ്ഞുവോ അവിടെയെല്ലാം വച്ചിരിക്കണം. നൊ എക്‌സ്‌ക്യൂസസ്...

മുനവാക്ക്
ഇന്റര്‍നെറ്റും മൊബൈല്‍ ഫോണുമെല്ലാം മൗലികാവകാശം. അതു നിഷേധിക്കാനാവില്ല എന്നു കോടതി.
* കറക്റ്റ്. പക്ഷേ, അതു കശ്മീര്‍ താഴ്‌വരയിലുള്ളവര്‍ക്ക് ബാധകമല്ല.